తెలంగాణ స్టేట్ పబ్లిక్ సర్వీస్ కమిషన్ (టీఎస్‌పీఎస్సీ) ప్రకటించిన సిలబస్‌లో కూడా వీటికి సముచిత స్థానం కల్పించారు. ఈ నేపథ్యంలో గ్రూప్స్ తదితర పోటీ పరీక్షలకు అర్థమెటిక్, రీజనింగ్‌లకు సంబంధించి ఏ విధంగా సన్నద్ధమవ్వాలి, ఏయే అంశాలపై అవగాహన పెంచుకోవాలో తెలియజేస్తూ టీఎస్‌పీఎస్సీ సిలబస్ కమిటీ మాజీ సభ్యులు డాక్టర్ బైరి ప్రభాకర్ అందిస్తున్న సూచనలు- స‌ల‌హాలు మీకోసం..
50 మార్కులకు..
అభ్యర్థుల్లో ప్రభుత్వ ఉద్యోగం చేయడానికి ఉండాల్సిన మానసిక సామర్థ్యాన్ని (మెంటల్ ఎబిలిటీస్/జనరల్ ఎబిలిటీస్) పరీక్షించేందుకు టీఎస్‌పీఎస్సీ నిర్వహించే అన్ని పోటీ పరీక్షల సిలబస్‌లో మెంటల్ ఎబిలిటీస్ /జనరల్ ఎబిలిటీస్‌ను చేర్చింది. గ్రూప్-1, గ్రూప్-2, గ్రూప్-3, ఇతర గెజిటెడ్ (ఏఈఈ, లెక్చరర్‌‌స), నాన్ గెజిటెడ్ (ఏఈ) జాబ్స్‌కు జనరల్ స్టడీస్‌లో భాగంగా మెంటల్ ఎబిలిటీస్ సబ్జెక్ట్ ఉంది. గ్రూప్-1 మెయిన్‌లో ప్రత్యేకంగా పేపర్-5లో 50 మార్కులకు ‘డేటా ఇంటర్‌ప్రిటేషన్ అండ్ ప్రాబ్లమ్ సాల్వింగ్’ పై ప్రశ్నలు వచ్చే అవకాశముంది. జనరల్ స్టడీస్‌లో భాగంగా ఉన్న జనరల్ ఎబిలిటీస్‌లో ముఖ్యంగా మూడు భాగాల్లో అభ్యర్థిని పరీక్షిస్తారు.
➤ లాజికల్ రీజనింగ్
➤ అనలిటికల్ ఎబిలిటీ
➤ డేటా ఇంటర్‌ప్రిటేషన్
జనరల్ స్టడీస్ పేపర్ 150 మార్కులకు ఉంటే.. దాదాపు 10 శాతం అంటే 15 మార్కుల వరకు మెంటల్ ఎబిలిటీస్/జనరల్ ఎబిలిటీస్ నుంచి ప్రశ్నలు వచ్చే అవకాశం ఉంది. లాజికల్ రీజనింగ్‌లో వివిధ రకాల ప్రశ్నలు ఉంటాయి. వాటిలో ముఖ్యంగా..
1. స్టేట్‌మెంట్ (ప్రకటన), రెండు అసెంప్షన్‌‌స (భావించిన అంశాలు) ఇస్తారు. ఇచ్చిన ప్రకటన, భావించిన అంశాలను పరిశీలించి ప్రకటన చేయడానికి సరిపోయిన అంశం లేదా అంశాలను గుర్తించాల్సి ఉంటుంది.
2. ఒక ప్రకటన (స్టేట్‌మెంట్), రెండు నిర్ణయాలు (కన్‌క్లూజన్స్) ఇస్తారు. ఇచ్చిన ప్రకటన పూర్తి నిజంగా భావిస్తూ, ఏ నిర్ణయాలు ప్రకటన ఆధారంగా, తర్కబద్ధంగా ఉన్నాయో గుర్తించాలి.
3. ఒక ప్రకటన (స్టేట్‌మెంట్), రెండు తీసుకోవాల్సిన చర్యలు (కోర్స్‌ ఆఫ్ యాక్షన్) ఇస్తారు. ఈ తరహా ప్రశ్నల్లో తీసుకోవాల్సిన చర్య ప్రకటనలోని సమస్యకు పరిష్కారం చూపుతూ పాలనా సౌలభ్యంగాను, అమలుకు వీలుగాను ఉండాలి. ప్రకటనను చదివి, తీసుకోవాల్సిన చర్యలను పరిశీలించి ఏ చర్యలు అర్హమైనవో నిర్ణయించాలి.
4. ఒక ప్రశ్న, రెండు వాదాలు ఇస్తారు. అవి బలమైన వాదం(స్ట్రాంగ్ ఆర్గ్యూమెంట్), బలహీనమైన వాదం(వీక్ ఆర్గ్యూమెంట్). బలమైన వాదాలు ప్రశ్నలోని అంశానికి నేరుగా సంబంధం కలిగి ముఖ్యమైనవిగా ఉంటాయి. బలహీనమైన వాదాలు ప్రశ్నలోని అంశానికి పరోక్ష సంబంధం కలిగి ఉంటాయి లేదా అల్ప ప్రాధాన్యం కలిగి ఉంటాయి. ఇచ్చిన ప్రశ్నలు, వాదాలను పరిశీలించి ఏది బలమైందో / బలహీనమైందో గుర్తించాలి.
5. ఇందులో రెండు సంఘటనలు ఇస్తారు. వాటిని పరిశీలించి వాటి మధ్య ఉన్న సంబంధాన్ని నిర్ణయించాల్సి ఉంటుంది. ఇక సంఘటన కారణం(కాజ్) అయితే, మరో సంఘటన దాని ప్రభావం (ఎఫెక్ట్) కావచ్చు. అందులో కారణం, ప్రభావాలను నిర్ణయించాల్సి ఉంటుంది.
Competitive Exam Preparation Tips: పోటీపరీక్షల్లో విజయానికి కరెంట్ అఫైర్స్
సీటింగ్ అరెంజ్‌మెంట్, బ్లడ్ రిలేషన్స్, డెరైక్షన్ సెన్స్ టెస్ట్, నంబర్ సిరీస్, కోడింగ్-డీకోడింగ్, క్యూబ్స్-అపోజిట్ నంబర్/కలర్, ఈక్వాలిటీ అండ్ ఇన్‌ఈక్వాలిటీ, వర్డ్‌/అల్ఫాబెట్ బేస్డ్ ప్రశ్నలు, ర్యాంకింగ్.. అనలిటికల్ ఎబిలిటీస్‌లో ముఖ్య అంశాలు. వీటిలో కొన్ని అంశాల ప్రశ్నలు వచ్చే అవకాశం ఉంటుంది.
TSPSC & APPSC: గ్రూప్స్ పరీక్షల్లో ‘సైన్స్ అండ్ టెక్నాలజీ’ నుంచి ఎన్ని మార్కులు వ‌స్తాయంటే..?
డేటా ఇంటర్‌ప్రిటేషన్‌లో..
1) ఒక టేబుల్, 2) పై చార్ట్‌, 3) గ్రాఫ్ (లైన్ లేదా బార్), 4) ఒక పేరాగ్రాఫ్, 5) రాడార్ గ్రాఫ్ గానీ ఇస్తారు. డేటాను క్షుణ్నంగా చదివి ఇచ్చిన డేటాను విశ్లేషించి పాయింట్స్ నోట్ చేసుకుంటే వీటిలో ఇచ్చే అయిదు ప్రశ్నలకు సులువుగా సమాధానాలు గుర్తించవచ్చు.
గ్రూప్-1 మెయిన్‌లో అయిదో పేపర్‌లోని డేటా ఇంటర్‌ప్రిటేషన్‌లో కూడా దాదాపు ఇదే సిలబస్ ఉంటుంది. కానీ ప్రశ్నల తీరు మారుతుంది. ఈ ప్రశ్నలకు వివరణాత్మకంగా సమాధానాలు రాయాల్సి ఉంటుంది. ఈ భాగంలో అభ్యర్థి డేటా విశ్లేషణ, సమస్య పరిష్కార సామర్థ్యాన్ని పరీక్షిస్తారు. డేటా విశ్లేషణలో భాగంగా స్టాటిస్టికల్ డేటా టేబుల్స్, బార్ గ్రాఫ్స్, లైన్ గ్రాఫ్స్, పై చార్‌‌టలు ఇచ్చి ప్రశ్నలు అడుగుతారు. అభ్యర్థి ఇచ్చిన డేటాను క్షుణ్నంగా అర్థం చేసుకొని సమాధానాలు ఇవ్వాల్సి ఉంటుంది. అలాగే సంభావ్యత, లాజికల్ రీజనింగ్, అనలిటికల్ ఎబిలిటీస్‌కు సంబంధించిన ప్రశ్నలు కూడా ఉంటాయి. క్వాంటిటేటివ్ ఆప్టిట్యూడ్‌కు సంబంధించి నంబర్ సీక్వెన్స్, సిరీస్, సగటు, నంబర్ సిస్టమ్స్, నిష్పత్తులు, లాభ నష్టాలు మొదలైన వాటిపై ప్రశ్నలు వచ్చే అవకాశం ఉంది. వీటితోపాటుగా కాలం-పని, కాలం- వేగం-దూరం, సరళ వడ్డీ, అనలిటికల్, క్రిటికల్ రీజనింగ్‌పై ప్రశ్నలు వచ్చే అవకాశం ఉంది. డెసీషన్ మేకింగ్ అండ్ ప్రాబ్లమ్ సాల్వింగ్ సామర్థ్యాన్ని పరీక్షించేందుకు, ఒక పరిస్థితినిచ్చి (స్ట్రక్చర్డ్ సిచ్యూయేషన్) దాని నుంచి వచ్చే సమస్యలకు అభ్యర్థి పరిష్కారాలను సూచించాల్సి ఉంటుంది. ఇందుకోసం అభ్యర్థి ఇచ్చిన పరిస్థితిని పూర్తిగా విశ్లేషించి పరిష్కారాలను సూచించాలి. ఈ విధంగా డేటా ఇంటర్‌ప్రిటేషన్ అండ్ మెంటల్ ఎబిలిటీస్ ప్రాముఖ్యం ప్రతి పరీక్షకు ఉంటుంది. ఈ విభాగంలో అభ్యర్థులు తక్కువ శ్రమతో ఎక్కువ స్కోర్ చేసే అవకాశం ఉంది.
TSPSC & APPSC : గ్రూప్-1 & 2లో ఉద్యోగం కొట్ట‌డం ఎలా? ఎలాంటి బుక్స్ చ‌ద‌వాలి..?
అభ్యర్థులకు స‌ల‌హాలు..
చాలా మంది అభ్యర్థులు సంఖ్యల మీద భయం ఉండటం వల్ల ఈ విభాగాన్ని కఠినమైనదిగా భావిస్తారు. అలాగే ఇది గణితం, ఇంగ్లిష్‌కు సంబంధించిన సబ్జెక్ట్ అని భావిస్తారు. కానీ కొంత ప్రాక్టీస్ చేయటం ద్వారా దీన్ని కూడా సులభంగా, తక్కువ సమయంలోనే చేయవచ్చు. ఒకసారి శ్రద్ధతో సాధన చేస్తే మంచి మార్కులు సంపాదించటంతో పాటు తుది ఎంపికకు దోహదం చేసే విధంగా ఉంటుంది.
గ్రూప్-1,2,3,4 ప్రీవియ‌స్ కొశ్చన్‌ పేపర్స్ కోసం క్లిక్ చేయండి
గత పరీక్షలో వచ్చిన ప్రశ్నలు
1.సూచనలు: ఈ ప్రశ్నలో ఒక ప్రకటన (స్టేట్‌మెంట్), రెండు ‘భావించిన అంశాలు’ (అసెంప్షన్స్) ఇచ్చారు. ఒక ప్రకటన చేయడానికి ఉపయోగపడుతూ నిజాలుగా భావించిన అంశాలనే ‘భావించిన అంశాలుగా’ పేర్కొనొచ్చు. ‘భావించిన అంశాల’ ఆధారంగానే ప్రకటన చేస్తారు. ఇచ్చిన ప్రకటన, ‘భావించిన అంశాలను’ పరిశీలించి ప్రకటన చేయడానికి ఏ అంశం లేదా అంశాలు భావించబడ్డాయో గుర్తించండి.
ప్రకటన: చాలా కాలంగా కోరుతున్నప్పటికీ కాలనీలో తపాలా కార్యాలయం ఏర్పాటు చేయలేదు. కాలనీకి దగ్గరలో ఉన్న తపాలా కార్యాలయం సుమారు 4 కి.మీ. దూరంలో ఉంది.
భావించిన అంశం 1: ఈ మధ్య ప్రజలు తపాలా సేవలను ఉపయోగించుకోవట్లేదు.
భావించిన అంశం 2: తమ కాలనీలో తపాలా కార్యాలయం ఉండాలని కాలనీ వాసుల కోరిక.
ఎ) భావించిన అంశం-1 మాత్రమే
బి) భావించిన అంశం-2 మాత్రమే
సి) భావించిన అంశం-1, 2 కావు
డి) భావించిన అంశం-1, 2
- View Answer
- సమాధానం: బి
2. ఈ ప్రశ్నలో ఒక ప్రకటన (స్టేట్‌మెంట్), రెండు నిర్ణయాలు (కన్‌క్లూజన్స్) ఇచ్చారు. ఇచ్చిన ప్రకటనను పూర్తిగా నిజంగా భావిస్తూ ఏ నిర్ణయాలను ప్రకటన ఆధారంగా, తర్కబద్ధంగా చేశారో గుర్తించండి.
ప్రకటన: ఢిల్లీలో ఒక్కసారిగా ఉల్లిపాయల ధర కిలో 100 రూపాయలకు చేరింది.
నిర్ణయం 1: ఉల్లిపాయల ధర పెరగడానికి కారణం తగినంత సరఫరా లేకపోవడమే.
నిర్ణయం 2: ఢిల్లీతో పోలిస్తే హైదరాబాద్లో ఉల్లిపాయల ధర తక్కువే.
ఎ) నిర్ణయం-1 మాత్రమే
బి) నిర్ణయం-2 మాత్రమే
సి) నిర్ణయం-1, 2 కావు
డి) నిర్ణయం-1, 2 కూడా
- View Answer
- సమాధానం: ఎ
3. సూచనలు: ఇచ్చిన ప్రశ్నలో ఒక ప్రకటన (స్టేట్‌మెంట్), రెండు తీసుకోవాల్సిన చర్యలు (కోర్స్‌ ఆఫ్ యాక్షన్) ఇవ్వబడ్డాయి. తీసుకోవాల్సిన చర్య ప్రకటనలోని సమస్యకు పరిష్కారం చూపుతూ పాలనా సౌలభ్యంగా, అమలుకు వీలుగా ఉండాలి. ప్రకటనలో పేర్కొన్న అంశాలను నిజాలుగా భావించాలి. ప్రకటనను, తీసుకోవాల్సిన చర్యలను పరిశీలించాక మీరు తీసుకునే నిర్ణయం ఏమిటి?
ప్రకటన: ఆహారం తీసుకున్నాక హాస్టళ్లో ఉండే చాలా మంది విద్యార్థులు అనారోగ్యానికి గురయ్యారు. వారు తీసుకున్న ఆహారం కలుషితమైందని గుర్తించారు.
తీసుకోవాల్సిన చర్య 1: క్యాంటీన్ను తక్షణమే మూసివేయాలి.
తీసుకోవాల్సిన చర్య 2: ప్రిన్సిపాల్, ఇతర అధికారులను తక్షణమే తాత్కాలికంగా తొలగించాలి.
ఎ) చర్య-1 మాత్రమే సరైంది
బి) చర్య -2 మాత్రమే సరైంది
సి) రెండూ తీసుకోవాల్సిన చర్యలు కావు
డి) రెండూ తీసుకోవాల్సిన చర్యలే
- View Answer
- సమాధానం: సి
4.సూచనలు: నిర్ణయాలు తీసుకునే ముందు ఆ నిర్ణయాలకు ఆధారమైన వాదాల్లో ఏవి బలమైనవి, ఏవి బలహీనమైనవి అని తెలిసి ఉండటం అవసరం. బలమైన వాదాలు ప్రశ్నలోని అంశానికి నేరుగా సంబంధం కలిగి ముఖ్యమైనవిగా కూడా ఉంటాయి. బలహీనమైన వాదాలు ప్రశ్నలోని అంశానికి దూరంగా సంబంధం కలిగి ఉంటాయి. లేదా అల్పప్రాధాన్యం కలిగి ఉంటాయి.
ఇచ్చిన వాదం బలమైందో / బలహీనమైందో గుర్తించండి.
ప్రశ్న: ప్రతి ఇంటిలో ‘కంపోస్ట్ గుంత’ ఉండేలా ప్రభుత్వం ప్రోత్సహించాలా?
వాదం-1: కాదు. అసలు కంపోస్ట్ గుంతలు ఎందుకు ఉండాలి?
వాదం-2: అవును. నగరాన్ని పరిశుభ్రంగా ఉంచడం ప్రతి పౌరుని బాధ్యత. కంపోస్టింగ్ వల్ల చెత్త సరైన పద్ధతిలో వినియోగపడుతూ చెత్తను నిల్వ ఉంచే కేంద్రాల నిర్వహణ భారం తగ్గుతుంది.
ఎ) వాదం-1 మాత్రమే బలమైంది
బి) వాదం-2 మాత్రమే బలమైంది
సి) రెండు వాదాలూ బలమైనవి కావు
డి) రెండు వాదాలు బలమైనవి
- View Answer
- సమాధానం: బి
5. సూచనలు: కింద ఇచ్చిన రెండు సంఘటనలను పరిశీలించి వాటి మధ్య ఉన్న సంబంధాన్ని నిర్ణయించండి?
సంఘటన-1: జంతు ప్రదర్శనశాల సందర్శకుల సంఖ్య ఏటా తగ్గుతూ వస్తోంది.
సంఘటన-2: జంతు ప్రదర్శనశాల నిర్వహణ సరిగా ఉండటం లేదు. అపరిశుభ్రత పరిస్థితుల వల్ల జంతువులు అనారోగ్యానికి గురవుతున్నాయి.
ఎ) సంఘటన-1 ప్రభావం, దానికి ప్రధాన కారణం సంఘటన-2
బి) సంఘటన-2 ప్రభావం, దానికి ప్రధాన కారణం సంఘటన-1
సి) సంఘటన-1 ప్రభావం, కానీ దానికి ప్రధాన కారణం సంఘటన-2 కాదు
డి) సంఘటన-2 ప్రభావం, కానీ దానికి ప్రధాన కారణం సంఘటన-1 కాదు
- View Answer
- సమాధానం: ఎ
6. A, B, C, D, E, F అనే ఆరుగురు వ్యక్తులు (అదే క్రమంలో కాకపోవచ్చు) ఒక సరళరేఖపై ఉత్తర దిక్కును చూస్తూ నిలబడి ఉన్నారు. Dకి కుడి పక్క రెండో స్థానంలో B ఉన్నాడు. Fకు ఎడమ పక్క నాలుగో స్థానంలో A ఉన్నాడు. సరళరేఖకు ఏ చివరిలోనూ F లేడు. Bకి కుడిపక్క రెండో స్థానంలో C ఉన్నాడు. Aకి కుడిపక్క రెండో స్థానంలో ఎవరు ఉన్నారు?
ఎ) E
బి) B
సి) F
డి) C
- View Answer
- సమాధానం: ఎ
7. P, Q, Rలు అక్కాచెల్లెళ్లు. N సోదరి M. R కుమారుడు N. అయితే Mకు P ఏమవుతారు?
ఎ) సోదరి
బి) పిన్ని
సి) కజిన్
డి) మేనకోడలు
- View Answer
- సమాధానం: బి
8. ప్రశ్నార్థక స్థానంలో వచ్చే సంఖ్య?
-4, 8, -16, 32, -64, ?
ఎ) -128
బి) -96
సి) 128
డి) 96
- View Answer
- సమాధానం: సి
9. క్లాక్ను టెలివిజన్ అని, టెలివిజన్ను రేడియో అని, రేడియోను ఓవెన్ అని, వోవెన్ను గ్రైండర్ అని, గ్రైండర్ను ఐరన్ అని పిలిస్తే పచ్చడి చేయడానికి దేన్ని ఉపయోగించాలి?
ఎ) రేడియో
బి) గ్రైండర్
సి) ఓవెన్
డి) ఐరన్
- View Answer
- సమాధానం: డి
10. ఈ కింది మాటలను నిఘంటువులో వచ్చే క్రమంలో రాయండి.
1) Endeavour
2) Endorse
3) Endure
4) Endless
5) Endemic
ఎ) 1, 5, 4, 2, 3
బి) 1, 5, 2, 4, 3
సి) 5, 1, 4, 2, 3
డి) 1, 5, 2, 3, 4
- View Answer
- సమాధానం: ఎ
తెలంగాణలో భర్తీ చేయనున్న గ్రూప్స్ ఉద్యోగాలు ఇవే..
➤ గ్రూప్-1 పోస్టులు: 503
➤ గ్రూప్-2 పోస్టులు : 582
➤ గ్రూప్-3 పోస్టులు: 1,373
➤ గ్రూప్-4 పోస్టులు : 9,168
Success Story: వేలల్లో వచ్చే జీతం కాదనీ.. నాన్న కోరిక కోసం గ్రూప్-2 సాధించానిలా..
TSPSC & APPSC Groups Questions : గ్రూప్స్ పరీక్షల్లో ప్రశ్నల స్థాయి ఎలా ఉంటుంది..?
ఇటు ఆంధ్రప్రదేశ్లో.. గ్రూప్–1, 2 పోస్టుల భర్తీ ఇలా..
గ్రూప్–1లో 110, గ్రూప్–2లో 182 పోస్టులు భర్తీ చేయనున్నారు. గతంలో ప్రకటించిన జాబ్ క్యాలండర్ కంటే అధికంగా పోస్టులు భర్తీ చేయాలని ఇటీవల ముఖ్యమంత్రి వైఎస్ జగన్ మోహన్ రెడ్డి ఆదేశించిన విషయం తెలిసిందే. దీంతో గ్రూప్ 1, 2 విభాగాల్లో 292 ఉద్యోగాలను ప్రకటించారు. ఆ పోస్టుల భర్తీకి ఆర్థిక శాఖ అనుమతినివ్వడంతో త్వరలోనే నోటిఫికేషన్ వెలువడనుంది. గ్రూప్–1లో డిప్యూటీ కలెక్టర్లు, డీఎస్పీ, ఆర్టీవో, సీటీవో, మున్సిపల్ కమిషనర్లు, డీఎఫ్వో, ఎంపీడీవో వంటి పోస్టులు ఉండగా, గ్రూప్–2లో డిప్యూటీ తహశీల్దార్లు, సబ్ రిజిస్ట్రార్లు, ట్రెజరీ పోస్టులు ఉన్నాయి.
