నీట్ యూజీ–2025కు సంబంధించి పలు మార్పులు ప్రకటించారు. ముఖ్యంగా పరీక్ష నాలుగు విభాగాల్లో పార్ట్‌–బిలో అమలు చేసిన ఛాయిస్‌ విధానాన్ని తొలగించారు. పరీక్షను ఒకే రోజు పెన్‌–పేపర్‌ విధానంలో నిర్వహించనున్నారు.
పరీక్ష విధానాన్ని ఆన్‌లైన్, ఆఫ్లైన్, హైబ్రీడ్‌ మోడల్‌లో నిర్వహించాలని పలు ప్రతిపాదనలు, సిఫార్సులు వచ్చినా.. చివరకు ఆఫ్లైన్ విధానంలో, ఒకే రోజు పరీక్ష ఉంటుందని ప్రకటించారు. అదే విధంగా అభ్యర్థులకు అపార్‌ ఐడీ తప్పనిసరి అని కూడా పేర్కొన్నారు. ఈ అపార్‌ ఐడీని పొందేందుకు అవసరమైన విధానాలను ఎన్‌టీఏ వెబ్‌సైట్‌లో అందుబాటులో ఉంచారు.
చదవండి: నీట్ - సక్సెస్ స్టోరీస్ | న్యూస్ | గైడెన్స్ | గెస్ట్ కాలమ్
అన్నింటికీ నీట్ స్కోర్‌
మెడికల్‌ కోర్సులను లక్ష్యంగా చేసుకొని నీట్‌కు హాజరయ్యే విద్యార్థుల సంఖ్య ఏటేటా పెరుగుతోంది. ఈ ఏడాది జాతీయ స్థాయిలో దాదాపు 20 లక్షల మంది పోటీ పడే అవకాశం ఉంది. నీట్–యూజీకి ఏటేటా పోటీ పెరుగుతోంది. దేశంలోని అన్ని మెడికల్‌ ఇన్‌స్టిట్యూట్స్‌లో ప్రవేశానికి నీట్–యూజీ స్కోర్‌ను ప్రామాణికంగా తీసుకోవడమే ప్రధాన కారణంగా చెబుతున్నారు. ఆల్‌ ఇండియా కోటా పేరిట దేశంలోని అన్ని మెడికల్‌ ఇన్‌స్టిట్యూట్స్‌లో 15 శాతం సీట్లను; రాష్ట్రాల స్థాయిలో హెల్త్‌ యూనివర్సిటీల పరిధిలోని సీట్లను; డీమ్డ్‌ యూనివర్సిటీలు, ప్రైవేట్‌ వర్సిటీలు..ఇలా అన్ని కేటగిరీల యూనివర్సిటీలు, ఇన్‌స్టిట్యూట్స్‌లో ఎంబీబీఎస్, బీడీఎస్‌లో నీట్ స్కోర్‌ ఆధారంగానే ప్రవేశాలు కల్పిస్తారు. అదే విధంగా ఆయుష్‌ కోర్సులుగా పేర్కొనే బీహెచ్‌ఎంఎస్, బీఏఎంఎస్, బీయూఎంఎస్, బీఎన్‌వైఎస్‌ తదితర కోర్సులకు కూడా నీట్ స్కోర్‌నే ప్రామాణికంగా తీసుకుంటారు.
720 మార్కులకు పరీక్ష
నీట్–యూజీ పరీక్ష నాలుగు సబ్జెక్ట్‌లలో మొత్తం720 మార్కులకు జరుగుతుంది. ఇందులో ఫిజిక్స్‌ 45 ప్రశ్నలు–180 మార్కులకు, కెమిస్ట్రీ 45 ప్రశ్నలు–180 మార్కులకు, బోటనీ 45 ప్రశ్నలు–180 మార్కులకు, జువాలజీ 45 ప్రశ్నలు–180 మార్కులకు ఉంటాయి. ఆబ్జెక్టివ్‌ విధానంలో బహుళైచ్ఛిక ప్రశ్నలు అడుగుతారు.
పరీక్షను పెన్‌ పేపర్‌ విధానంలో ఓఎంఆర్‌ షీట్‌ ఆధారంగా నిర్వహిస్తారు. ప్రతి ప్రశ్నకు నాలుగు మార్కులు కేటాయిస్తారు. నెగెటివ్‌ మార్కింగ్‌ నిబంధన ఉంది. ప్రతి తప్పు సమాధానానికి ఒక మార్కును తగ్గిస్తారు. పరీక్ష సమయం మూడు గంటలు.
సమయం సద్వినియోగం
నీట్ యూజీ–2025 పరీక్షను మే 4న నిర్వహించనున్నారు. అంటే.. విద్యార్థులకు దాదాపు మూడు నెలల సమయం అందుబాటులో ఉంది. ఈ సమయాన్ని సద్వినియోగం చేసుకుని సబ్జెక్ట్‌ల వారీగా నిర్దేశిత వ్యూహాలతో ప్రిపరేషన్‌ సాగిస్తే..మంచి స్కోర్‌ సాధించే అవకాశం ఉంది. మార్చి చివరి నాటికి ఇంటర్మీడియెట్‌ పరీక్షలు పూర్తవుతాయి. ఆ తర్వాత నీట్ పరీక్ష తేదీకి దాదాపు నెల రోజుల సమయం అందుబాటులో ఉంటుంది. ఈ సమయంలో పూర్తిగా ప్రాక్టీస్, రివిజన్, మాక్‌ టెస్ట్‌లకు హాజరవడం ద్వారా ప్రిపరేషన్‌కు పదును పెట్టుకోవాలి.
 Join our WhatsApp Channel: Click Here Join our Telegram Channel: Click Here |
 Follow our YouTube Channel: Click Here Follow our Instagram Page: Click Here |
బెస్ట్‌ స్కోర్‌కు మార్గం
ప్రాక్టీస్‌తో ఫిజిక్స్‌లో మంచి మార్కులు
ఫిజిక్స్‌లో స్కోర్‌ కోసం విద్యార్థులు ప్రాక్టీస్‌కు ప్రాధాన్యమివ్వాలి. ఆప్టిక్స్, మెకానిక్స్, హీట్‌ అండ్‌ థర్మోడైనమిక్స్, ఎలక్ట్రానిక్‌ డివైజెస్, కరెంట్‌ ఎలక్ట్రిసిటీ, మోడరన్‌ ఫిజిక్స్‌ చాప్టర్లపై ప్రత్యేక దృష్టిపెట్టాలి. ఎన్‌సీఈఆర్‌టీ పుస్తకాల్లో అధ్యాయానికి చివర ఇచ్చిన ప్రశ్నలను సాధించాలి. అవకలనం, సమాకలనం అనువర్తనాలపై పట్టు సాధించాలి. ఇంటర్ రెండేళ్ల పాఠ్యాంశాలకు సమాన ప్రాధాన్యం ఇవ్వాలి. రొటేషనల్‌ డైనమిక్స్, సిగ్మా పార్టికల్స్‌పై ఎక్కువగా దృష్టిపెట్టాలి. అదేవిధంగా ఎలక్ట్రోమ్యాగ్నటిజం, ఇండక్షన్, కరెంట్‌ ఎలక్ట్రిసిటీ వంటి చాప్టర్లను చదవడంతోపాటు ప్రాక్టీస్‌కు ప్రాధాన్యం ఇవ్వాలని గుర్తించాలి.
కెమిస్ట్రీ.. బేసిక్స్‌పై ఫోకస్‌
విద్యార్థులు కెమిస్ట్రీలో కాన్సెప్ట్‌లపై ఎక్కువగా ఫోకస్‌ చేయాలి. అదే విధంగా రివిజన్‌కు ప్రాధాన్యం ఇవ్వాలి. ముఖ్యంగా జనరల్‌ ఆర్గానిక్ కెమిస్ట్రీ, మోల్‌ కాన్సెప్ట్, కెమికల్‌ బాండింగ్, ఎలక్ట్రోకెమిస్ట్రీ, కోఆర్డినేషన్‌ కాంపౌండ్, ఈక్విలిబ్రియమ్, పాలిమర్‌లు, బయో మాలిక్యూల్స్, పరమాణు నిర్మాణం, సాలిడ్‌ స్టేట్, ద్రావణాలు, సర్ఫేజ్‌ కెమిస్ట్రీ; ఆర్గానిక్ కెమిస్ట్రీలో ఐసోమెరిసమ్, సమ్మేళనాల తయారీలకు కొంత వెయిటేజీ ఎక్కువగా ఉంటుంది. కెమిస్ట్రీలో విద్యార్థులు చర్యలు, సమీకరణాలను మర్చిపోతుంటారు. కాబట్టి నిరంతరం పునఃశ్చరణ చేయాలి. ఇనార్గానిక్‌ కెమిస్ట్రీలో వివిధ మూలకాలు, వాటి సమ్మేళనాల ధర్మాలను అధ్యయనం చేయాలి. కెమిస్ట్రీలో ఫిజికల్, ఆర్గానిక్, ఇనార్గానిక్‌ కెమిస్ట్రీలను వాటి వాటి స్వభావాల ఆధారంగా ప్రిపేరవ్వాలి. ఫిజికల్ కెమిస్ట్రీలో ఫార్ములాలతో సొంత నోట్స్‌ రూపొందించుకోవాలి. పీరియాడిక్‌ టేబుల్‌పై పట్టు సాధిస్తే.. ఇనార్గానిక్‌ కెమిస్ట్రీలో మంచి స్కోర్‌కు ఆస్కారం ఉంటుంది.
బోటనీలో కాన్సెప్టులపై స్పష్టత
నీట్‌లో కీలకంగా భావించే బోటనీకి సంబంధించి విద్యార్థులు ప్రత్యేక దృష్టితో ప్రిపరేషన్‌ సాగించాలి. ఫిజియాలజీ ఆఫ్‌ ప్లాంట్స్ అండ్‌ యానిమల్స్, మార్ఫాలజీ, జెనెటిక్స్ అండ్‌ ఎవల్యూషన్, సెల్‌ బయాలజీ, బయోటెక్నాలజీ, హ్యూమన్‌ ఫిజియాలజీ, డైవర్సిటీ ఆఫ్‌ లివింగ్‌ ఆర్గానిజమ్‌లను ముఖ్య చాప్టర్లుగా భావించి చదవాలి. అన్ని అంశాలకు సంబంధించి కాన్సెప్ట్ట్‌లపై పట్టు సాధించాలి. ఎకాలజీలో ఆర్గనైజేషన్స్‌ అండ్‌ పాపులేషన్, ఎకోసిస్టమ్‌పై ప్రశ్నలు వస్తున్నాయి.
వీటితోపాటు బయోడైవర్సిటీ, ఎన్విరాన్‌మెంట్‌ ఇష్యూస్‌ పాఠ్యాంశాలపై ఫోకస్‌ చేయడం లాభిస్తుంది. ప్లాంట్‌ ఫిజియాలజీలో ప్లాంట్‌ గ్రోత్‌ అండ్‌ డెవలప్‌మెంట్, మొక్కల హార్మోనులు, ట్రాన్స్‌పోర్ట్‌ ఇన్‌ ప్లాంట్స్, మినరల్‌ న్యూట్రిషన్‌ చాప్టర్లను ప్రిపేరవ్వాలి. సెల్‌ స్ట్రక్చర్‌ అండ్‌ ఫంక్షన్స్‌లో కణవిభజన (సమ విభజన, క్షయకరణ విభజన)లోని వివిధ దశల్లో జరిగే మార్పులు, కణచక్రం తదితరాలను అధ్యయనం చేయాలి. బయోమాలిక్యూల్స్‌ నుంచి కంటెంట్‌ సంబంధిత ప్రశ్నలు వస్తాయి. రీప్రొడక్షన్‌ నుంచి దాదాపు 10 ప్రశ్నల వరకు అడుగుతున్నారు. మాలిక్యులర్‌ బేసిస్‌ ఆఫ్‌ ఇన్‌హెరిటన్స్‌లో రెప్లికేషన్,ట్రాన్‌స్క్రిప్షన్, ట్రాన్స్‌లేషన్,రెగ్యులేషన్‌లపై దృష్టిపెట్టాలి.
జువాలజీ
జువాలజీ సబ్జెక్ట్‌లో రాణించేందుకు హ్యూమన్‌ ఫిజియాలజీ, ఎకాలజీ, జెనెటిక్స్, ఎవల్యూషన్ టాపిక్స్‌పై ప్రత్యేక దృష్టిపెట్టాలి. ఎన్‌సీఈఆర్‌టీతోపాటు ఇంటర్ పుస్తకాల నుంచీ ప్రశ్నలు అడుగుతున్నారు. కాబట్టి గత ప్రశ్న పత్రాలను, ఇంటర్‌లో ఆయా చాప్టర్స్‌ చివరలో ఉండే ప్రశ్నలను సాధన చేయాలి. దీంతోపాటు ఎన్‌సీఈఆర్‌టీ, ఇంటర్ పుస్తకాలను క్షుణ్నంగా చదివితే ఉపయుక్తంగా ఉంటుంది.
బోర్డ్‌ పరీక్షలతో సమన్వయం
బోర్డ్‌ పరీక్షలతో నీట్–యూజీ ప్రిపరేషన్‌ను సమన్వయం చేసుకోవడం ముఖ్యం. బోర్డ్‌ పరీక్షలకు నెల రోజుల ముందు వరకు ఇంటర్, నీట్ సిలబస్‌లను సమన్వయం చేసుకుంటూ చదవాలి. బోర్డ్‌ పరీక్షలు పూర్తయిన తర్వాత.. నీట్ సిలబస్‌కు అనుగుణంగా ఆయా సబ్జెక్ట్‌లకు సమయం కేటాయించుకోవాలి.
ప్రతి రోజు చదవాల్సిన టాపిక్స్‌ను ముందుగానే విభజించుకుని దానికి అనుగుణంగా అధ్యయనం చేయాలి. ప్రతి రోజు మాక్‌ టెస్టులకు హాజరవ్వాలి. మోడల్‌ కొశ్చన్స్‌ను ప్రాక్టీస్ చేయాలి. డైరెక్ట్‌ కొశ్చన్స్‌ కంటే ఇన్‌ డైరెక్ట్‌ కొశ్చన్స్‌నే ఎక్కువ అడుగుతున్న విషయాన్ని గుర్తించాలి. దీనికి అనుగుణంగా మోడల్‌ టెస్ట్‌లను వీలైనంత ఎక్కువగా ప్రాక్టీస్ చేయాలి. ప్రిపరేషన్‌ సమయంలోనే షార్ట్‌ నోట్స్‌ రూపొందించుకోవాలి. ఇది వేగంగా రివిజన్ పూర్తిచేయడంలో దోహదపడుతుంది.
450కు పైగా మార్కులతో సీటు!
నీట్‌లోప్రతి సబ్జెక్ట్‌లోనూ 180 మార్కులకు గాను కనీసం 130 మార్కులు సాధించేలా కృషి చేయాలి. అప్పుడే ఉత్తమ ర్యాంకు లభించే అవకాశాలు మెరుగవుతాయి. మొత్తంగా 720 మార్కులకు గాను 450 మార్కుల నుంచి 500 మార్కులు సాధించేలా ప్రయత్నం చేస్తే డాక్టర్‌ కల నెరవేర్చుకోవచ్చు.
More Articles
Most Read
