సాక్షి, హైదరాబాద్‌: ఏప్రిల్‌ 3 నుంచి జరిగే పదవ తరగతి పరీక్షలకు సంబంధించిన ప్రశ్నపత్రాల సమయ పాలనపై విద్యార్థులకు అవగాహన కల్పించాలని తెలంగాణ పాఠశాల విద్య డైరెక్టర్‌ దేవసేన క్షేత్రస్థాయి అధికారులకు సూచించారు.
ఆ రెండు పేపర్లకే అదనపు సమయం
ఈ మేరకు ఆమె మార్చి 29న ఉత్తర్వులు జారీ చేశారు. సైన్స్, మొదటి భాష (కాంపొజిట్‌ పేపర్ల) పరీక్షలు 3.20 గంటలు ఉంటాయని, ఈ రెండు మినహా మిగతా పేపర్లన్నీ 3 గంటల పాటు ఉంటాయని ఆమె పేర్కొన్నారు. ఈ రెండు పేపర్లను పార్ట్‌ –1, పార్ట్‌ –2 గా నిర్వహించనుండటంతో అదనపు సమయాన్ని కేటాయించినట్టు తెలిపారు. ఈ ఏడాది పదో తరగతి పరీక్షలను 11 పేపర్లకు బదులుగా 6 పేపర్లకే నిర్వహిస్తున్నట్టు పునరుద్ఘాటించారు. పరీక్షలు ఉదయం 9.30 గంటల నుంచి మధ్యాహ్నం 12.30 గంటల వరకు ఉంటాయని పేర్కొన్నారు.
సైన్స్, కాంపొజిట్‌ పేపర్లను మాత్రం ఉదయం 9.30 గంటల నుంచి మధ్యాహ్నం 12.50 గంటల వరకు నిర్వహిస్తామని పాఠశాల విద్యాశాఖ డైరెక్టర్‌ శ్రీదేవసేన ఉత్తర్వులిచ్చారు.
కాంపొజిట్‌ తెలుగు, ఉర్దూ పేపర్ల పార్ట్‌ –1ను 60 మార్కులకు నిర్వహిస్తారని, ఈ పరీక్ష ఉదయం 9.30 గంటల నుంచి ఉదయం 11.30 గంటల వరకు జరుగుతుందని తెలిపారు.
పార్ట్‌ –బీ (ఆబ్జెక్టివ్‌ టైపు) పేపర్‌ను ఉదయం 11 గంటలకు ఇస్తారని, ఉదయం 11.30 గంటలతో ఈ పేపర్‌ను ముగించాలని స్పష్టం చేశారు. ఆ తర్వాత పార్ట్‌ – 2 పేపర్‌ ఇస్తారని, ఈ పరీక్షను ఉదయం 11. 50 గంటల నుంచి మధ్యాహ్నం 12.50 గంటల వరకు పూర్తి చేయాల్సి ఉంటుందన్నారు.
సైన్స్ పేపర్‌లో మొదట పార్ట్‌ –1 (భౌతికశాస్త్రం) పేపర్‌ను ఇస్తారు. ఈ పరీక్ష ఉదయం 9.30 గంటల నుంచి 11 గంటల వరకు జరుగుతుందని తెలిపారు. పార్ట్‌ –బీ పేపర్‌ (ఆబ్జెక్టివ్‌ టైపు)ను ఉదయం 10:45 గంటలకు ఇస్తారు. 11 గంటలకు ముగించాలని తెలిపారు.
పార్ట్‌ –2 (జీవశాస్త్రం) పేపర్‌ను ఉదయం 11:20 గంటల నుంచి మధ్యాహ్నం 12 : 50 గంటల వరకు, పార్ట్‌ –బీ పేపర్‌ (ఆబ్జెక్టివ్‌ టైపు)ను మధ్యాహ్నం 12.35 గంటల ఇవ్వనుండగా, మధ్యాహ్నం 12.50 గంటల లోపు ముగించాలని వివరించారు. ఈ రెండు పేపర్లకు వేర్వేరు ప్రశ్నపత్రాలు, సమాధాన పత్రాలు ఇవ్వాల్సి ఉండటం, వీటిని మార్చుకునేందుకు గడువునివ్వడంలో భాగంగా అదనపు సమయాన్ని కేటాయించినట్టు పేర్కొన్నారు.
