రిక్షాపుల్లర్ కుటుంబం నుంచి ఐఐటీ జేఈఈ విజేతగా -ఈర్లపల్లి రాజు, ఐఐటీ-జేఈఈ విజేత

తండ్రి రిక్షా పుల్లర్. తల్లి కూలీ.  అలాంటి కుటుంబంలో పుట్టిన ఆ యువకుడికి ఐఐటీలో చదివి ఇంజనీర్ కావాలనే స్వప్నం. పదో తరగతిలో 551మార్కులు రావడంతో ఓ ఐఏఎస్ అధికారి కార్పొరేట్ కళాశాలలో ఉచితంగా చేర్పించారు. అంతవరకు సాఫీగానే సాగినా.. పుస్తకాలకు రెండు వేలు కూడా వెచ్చించలేని స్థితిలో చదువు మానేయాలనుకుని.. మళ్లీ లక్ష్యం గుర్తొచ్చి స్నేహితుల పుస్తకాలతో చదువుకుని.. ఐఐటీలో 1387 ర్యాంకు సాధించిన ఈర్లపల్లి రాజు విజయగాథ..

ఆలోచనలకు పేదరికం తెలియదు కదా:
మా స్వస్థలం మహబూబ్ నగర్ జిల్లా ఆమనగల్ మండలమైనా హైదరాబాద్‌లోనే నివాసం. అయిదు నుంచి పదో తరగతి వరకు ఏపీ రెసిడెన్షియల్ స్కూళ్లో చదివాను. కా నీ ఈ క్రమంలో ప్రతి దశలో పేదరికం వెక్కిరిస్తూనే ఉం ది. ఈ దుస్థితి ఒకానొకదశలో ఆత్మ విశ్వాసాన్ని చంపేసింది. కానీ సమాజం ఎన్నో పాఠాలు నేర్పింది. నాలాగే ఎందరో పేదవిద్యార్థులు చదువు కోసం ఇబ్బందులు పడుతున్నారనిపించింది. అందుకే పట్టుదలతో చదువు కొనసాగించా.
రూ.2 వేలు కట్టలేక  కన్నీళ్లొచ్చాయి:
ఉచితంగా ఇంటర్లో సీటొచ్చిందనే ఆనందం ఎన్నాళ్లోలేదు. అక్కడ మధ్యమధ్యలో అడ్మిషన్, ట్యూషన్ ఫీజులు కట్టడం తప్పనిసరి. వాటిని కట్టడం స్థాయికి మించిన పని. ఒక్కోసారి ఎవరో ఒకరు ఆదుకునేవారు.

పేదరికం శాపం కాదని గుర్తిస్తే చాలు:
పేదరికం శాపంకాదు. చాలామంది విద్యార్థులు గ్రామీణ ప్రాంతాల్లో బాగా చదువుతున్నా ఆర్థిక స్థోమత లేక మధ్యలోనే చదువులు మానేసి తమ కలలను నిర్వీర్యం చేసుకుంటున్నారు. అది మంచిది కాదు. ప్రతిభ ఉంటే పేదరికాన్ని అధిగమించడం కష్టం కాదు. ఐఐటీ-జేఈఈలో కేవలం ధనవంతుల పిల్లలే రాణించగలరనుకుంటే పొరపాటే. సబ్జెక్టుపై పట్టు, లోతైన విశ్లేషణతో లెస్సన్స్‌ను అర్థం చేసుకోగల నేర్పు ఉంటే ఐఐటీలో మంచి ర్యాంకు సాధించడం సులువే. కోచింగ్ లేకున్నా కేవలం ప్రామాణిక పుస్తకాలు చదివితే కోరుకున్న ర్యాంకు సాధించడం కష్టంకాదు.