సీడీఎస్‌ఈ-2014.. సన్నద్ధతకు మార్గాలు..

యూనియన్ పబ్లిక్ సర్వీస్ కమిషన్ (యూపీఎస్‌సీ) ఏడాదికి రెండుసార్లు నిర్వహించే కంబైన్డ్ డిఫెన్స్ సర్వీసెస్ ఎగ్జామినేషన్ (సీడీఎస్‌ఈ)-2014 ప్రకటన వెలువడింది. ఈ పరీక్ష ద్వారా ఇండియన్ మిలిటరీ అకాడెమీ, ఇండియన్ నావల్ అకాడెమీ, ఎయిర్‌ఫోర్స్ అకాడెమీ, ఆఫీసర్స్ ట్రైనింగ్ అకాడెమీల్లో ప్రవేశం లభిస్తుంది. ఎంపికైనవారు సంబంధిత విభాగంలో ఉన్నత హోదాతో ఉద్యోగం పొందొచ్చు. ఈ నేపథ్యంలో సీడీఎస్‌ఈ అర్హతలు, పరీక్ష విధానం, ప్రిపరేషన్ వివరాలు..

త్రివిధ దళాల్లో ఉద్యోగం సాధించి, మాతృభూమి సంరక్షణలో పాలుపంచుకోవాలనుకునే అభ్యర్థులకు అత్యుత్తమ అవకాశం సీడీఎస్‌ఈ. రాతపరీక్ష, ఇంటెలిజెన్స్ అండ్ పర్సనాలిటీ టెస్ట్‌లో విజయం సాధిస్తే అద్భుతమైన కెరీర్ సొంతమవుతుంది. శిక్షణ తర్వాత ప్రారంభంలోనే నెలకు * 45 వేలకు పైగా అందుకోవచ్చు.

ఖాళీల వివరాలు:

ఇండియన్ మిలిటరీ అకాడెమీ (డెహ్రాడూన్)	250
ఇండియన్ నావల్ అకాడెమీ (ఎజిమల)	40
ఎయిర్‌ఫోర్స్ అకాడెమీ (హైదరాబాద్)	32
ఆఫీసర్స్ ట్రైనింగ్ అకాడెమీ (చెన్నై) (పురుషులు)	175
ఆఫీసర్స్ ట్రైనింగ్ అకాడెమీ (చెన్నై) (మహిళలు)	12

• రాత పరీక్ష; శారీరక, వైద్య పరీక్షలు, ఇంటెలిజెన్స్ అండ్ పర్సనాలిటీ టెస్ట్ ఆధారంగా ఎంపిక ఉంటుంది. రాత పరీక్ష విధానం:
  
• రాత పరీక్ష ఇంగ్లిష్/హిందీ మాధ్యమాల్లో ఉంటుంది. ప్రశ్నలన్నీ మల్టిపుల్ చాయిస్ విధానంలో ఉంటాయి. తప్పుగా గుర్తించిన సమాధానాలకు నెగెటివ్ మార్కులుంటాయి. సరైన సమాధానానికి ఇచ్చే మార్కుల నుంచి 0.33 శాతం మార్కులు తగ్గిస్తారు. మొత్తం మూడు పేపర్లలో ఇంగ్లిష్, జనరల్ నాలెడ్జ్ గ్రాడ్యుయేషన్ స్థాయిలో, ఎలిమెంటరీ మ్యాథమెటిక్స్ పదో తరగతి స్థాయిలో ఉంటాయి.

రాత పరీక్ష ఇలా:
ఇండియన్ మిలిటరీ, నావల్, ఎయిర్‌ఫోర్స్ అకాడెమీ

సబ్జెక్ట్	వ్యవధి	మార్కులు
ఇంగ్లిష్	2 గంటలు	100
జనరల్ నాలెడ్జ్	2 గంటలు	100
ఎలిమెంటరీ మ్యాథమెటిక్స్	2 గంటలు	100

సబ్జెక్ట్	వ్యవధి	మార్కులు
ఇంగ్లిష్	2 గంటలు	100
జనరల్ నాలెడ్జ్	2 గంటలు	100

• రాత పరీక్ష ఉత్తీర్ణులకు శారీరక, వైద్య పరీక్షలు నిర్వహిస్తారు. ఇందులో భాగంగా అభ్యర్థులు నిర్దేశిత ఎత్తు, బరువు కలిగి ఉన్నారో.. లేదో పరీక్షిస్తారు. పరుగుపందెం, ఇతర పోటీలు ఉంటాయి. వైద్య పరీక్షలో భాగంగా దృష్టి లోపాలు, శారీరక వైకల్యాలను గుర్తించి అలాంటి వారిని తొలగిస్తారు.

• అన్ని విభాగాలకు అవివాహితులైనవారు మాత్రమే అర్హులు.
• ఇండియన్ మిలిటరీ అకాడెమీ, ఆఫీసర్ ట్రైనింగ్ అకాడెమీ పోస్టులకు గుర్తింపు పొందిన యూనివర్సిటీ నుంచి ఏదైనా డిగ్రీ ఉత్తీర్ణత.
• నావల్ అకాడెమీకి బీటెక్/బీఈలో ఉత్తీర్ణత సాధించి ఉండాలి.
• ఎయిర్‌ఫోర్స్ అకాడెమీకి ఏదైనా డిగ్రీ ఉత్తీర్ణతతోపాటు ఇంటర్‌లో మ్యాథ్స్, ఫిజిక్స్ చదివుండాలి లేదా బీటెక్ ఉత్తీ ర్ణులు కూడా అర్హులే. ఫైనల్ ఇయర్ ఫలితాల కోసం ఎదురుచూస్తున్నవారు కూడా దరఖాస్తు చేసుకోవచ్చు. వీరు ఇంటర్వ్యూ నాటికి సర్టిఫికెట్లను చూపాలి.
• ఆఫీసర్స్ ట్రైనింగ్ అకాడెమీకి మాత్రమే మహిళలు అర్హులు. మిగిలిన విభాగాలకు అర్హులు కాదు.

వయోపరిమితి:

• ఇండియన్ మిలిటరీ అకాడెమీ, నావల్ అకాడెమీల కోసం జనవరి 2, 1991- జనవరి 1, 1996 మధ్య
• ఎయిర్‌ఫోర్స్ అకాడెమీ పోస్టులకు జనవరి 2, 1992- జనవరి 1, 1996 మధ్య.
• ఆఫీసర్స్ ట్రైనింగ్ అకాడెమీ (పురుషులు, మహిళలు) పోస్టులకు జనవరి 2, 1990- జనవరి 1, 1996 మధ్య జన్మించినవారు అర్హులు.

దరఖాస్తు విధానం:
ఆన్‌లైన్‌లోనే చేసుకోవాలి. ఎస్‌బీఐ/అనుబంధ బ్యాంకుల్లో నెట్ బ్యాంకింగ్ లేదా క్రెడిట్, డెబిట్ కార్డుల ద్వారా * 200 ఫీజుగా చెల్లించాలి. మహిళలు, ఎస్సీ, ఎస్టీ అభ్యర్థులకు ఫీజు మినహాయింపు ఉంది.

• ఆన్‌లైన్ దరఖాస్తులకు వెబ్‌సైట్:
  www.upsconline.nic. in.
• రాష్ట్రంలో పరీక్ష కేంద్రాలు:
  హైదరాబాద్, విశాఖపట్నం, తిరుపతి.

ముఖ్య తేదీలు:
ఆన్‌లైన్ దరఖాస్తులకు చివరి తేదీ: డిసెంబర్ 2, 2013
పరీక్ష తేదీ: ఫిబ్రవరి 9, 2014
వెబ్‌సైట్: www.upsc.gov.in

సిద్ధమవ్వండిలా..

మ్యాథ్స్
ఇది పదో తరగతి స్థాయిలో ఉంటుంది. సీబీఎస్‌ఈ, లేదా స్టేట్ సిలబస్‌లో 9, 10 తరగతుల మ్యాథ్స్ పుస్తకాలు చదివితే సరిపోతుంది. అదనపు సమయం కేటాయిస్తే ఆర్ట్స్ విద్యార్థులు కూడా మ్యాథ్స్ ప్రశ్నలకు సులువుగా సమాధానాలు గుర్తించొచ్చు. ఆల్జీబ్రా, జామెట్రీ, ట్రిగ్నామెట్రీ, మెన్సురేషన్ చాప్టర్లకు ఎక్కువ సమయం వెచ్చించాలి. ఈ మూడు చాప్టర్ల నుంచే 40 శాతానికి తక్కువ కాకుండా ప్రశ్నలడుగుతారు. మిగతా చాప్టర్లకు సమానమైన వెయిటేజ్ ఉంటుంది. అర్థమెటిక్‌లో భాగంగా నంబర్ సిస్టమ్, సహజ సంఖ్యలు, వాస్తవ సంఖ్యలు, కూడికలు, తీసివేతలు, గుణకారం, భాగహారం, స్క్వేర్‌రూట్స్, కాలం-దూరం, కాలం-పని, శాతాలు, వడ్డీ-చక్రవడ్డీ, బారువడ్డీ, లాభనష్టాలు మొదలైనవాటిపై ప్రశ్నలడుగుతారు. ఇవన్నీ కూడా హైస్కూల్ స్థాయిలో 6 నుంచి పదో తరగతి మ్యాథ్స్‌లో ఉండేవే. అందువల్ల సంబంధిత తరగతుల పాఠ్యపుస్తకాల్లో ప్రశ్నలను సాధన చేయాలి. వీటితోపాటు ఆర్‌ఎస్ అగర్వాల్ ఆబ్జెక్టివ్ అర్థమెటిక్ పుస్తకంలోని సమస్యలను ప్రాక్టీస్ చేయాలి.

ఇంగ్లిష్
బేసిక్ ఇంగ్లిష్ గ్రామర్‌పై ప్రశ్నలుంటాయి. అభ్యర్థి ఇంగ్లిష్‌ని ఎలా అర్థం చేసుకుంటున్నాడో పరిశీలించే విధంగా ప్రశ్నలడుగుతారు. మార్కెట్లో దొరికే ప్రామాణిక ఆంగ్ల వ్యాకరణ పుస్తకంలో సిలబస్‌లోని అంశాల వరకు చదివితే చాలు. ఈ విభాగంలో 70 శాతం ప్రశ్నలు ప్రాథమిక వ్యాకరణం నుంచి, 30 శాతం ప్రశ్నలు కాంప్రహెన్సన్, యాంటోనిమ్స్, సినోనిమ్స్, అనాలజీ అంశాలపై అడుగుతారు. ఇంగ్లిష్ విభాగంలో ఎక్కువ మార్కులు పొందడానికి రెన్ అండ్ మార్టిన్ హైస్కూల్ ఇంగ్లిష్ గ్రామర్ పుస్తకం, నార్మన్ లూయీస్ రాసిన వర్డ్ పవర్ మేడ్ ఈజీ బాగా ఉపయోగపడతాయి.

జనరల్ నాలెడ్జ్
వర్తమాన వ్యవహారాల కోసం ప్రతిరోజూ ప్రామాణిక దినపత్రికలు చదవాలి. స్టాక్ జీకే కోసం ఏదైనా జనరల్ నాలెడ్జ్ పుస్తకం చదివితే సరిపోతుంది. పరిసరాలపై కాస్త అవగాహన ఉంటే జీకే ప్రశ్నలకు సమాధానాలు గుర్తించడం తేలికే. భారతదేశ చరిత్ర, భూగోళశాస్త్రం, పాలిటీ, ఎకానమీ ప్రశ్నల కోసం 8,9,10 తరగతుల సోషల్ పుస్తకాలు చదవాలి. సైన్స్ అండ్ టెక్నాలజీ, అవార్డులు, ఆవిష్కరణల కోసం ఏదైనా ఇయర్ బుక్‌లోని కరెంట్ అఫైర్స్ సెక్షన్‌ను ఔపోసన పట్టాలి. శాస్త్ర, సాంకేతిక అంశాలు ముఖ్యమైనవే. ఇటీవల కాలంలో మన దేశం ప్రయోగించిన వివిధ క్షిపణులు, వాటి పరిధి, అంతరిక్ష ఉపగ్రహాలు, వాటిని వేటి కోసం ఉద్దేశించారు? ఎక్కడి నుంచి ప్రయోగించారు? ఇలా అన్ని కోణాల్లో సిద్ధమవ్వాలి.

ఇంటెలిజెన్స్ అండ్ పర్సనాలిటీ టెస్ట్
రాత పరీక్ష, వైద్య, శారీరక పరీక్షల్లో విజయం సాధించిన వారిని ఖాళీలకనుగుణంగా పర్సనాలిటీ టెస్ట్‌కు ఎంపిక చేస్తారు. దీన్ని వ్యక్తిత్వ పరీక్షగా చెప్పుకోవచ్చు. ఇందులో విజయం సాధించడానికి ప్రతిరోజూ ఏదైనా పేపర్ చదవాలి. జాతీయ ఇంగ్లిష్ చానళ్లలో వచ్చే చర్చా కార్యక్రమాలు వినాలి. ఏదైనా టాపిక్ ఎంచుకొని అద్దం ముందు నిల్చొని కనీసం ఐదు నిమిషాలు మాట్లాడాలి. అలా కమ్యూనికేషన్ స్కిల్స్ మెరుగుపర్చుకోవాలి. ఇంటర్వ్యూలో భాగంగా ఇంకా వివిధ పరీక్షలు నిర్వహిస్తారు. గ్రూప్ డిస్కషన్‌తోపాటు ఏదైనా సందర్భం చెప్పి దానికి అభ్యర్థి ఎలా స్పందిస్తారో తెలుసుకుంటారు. ఔట్‌డోర్ గ్రూప్ టాస్క్ కూడా ఉంటుంది. ఏదైనా అంశంలో ఉపన్యసించమని కూడా అడుగుతారు. ఎయిర్‌ఫోర్స్ అకాడెమీ అభ్యర్థులకు పైలట్ బ్యాటరీ ఆప్టిట్యూడ్ టెస్ట్ (పీబీఏటీ) ను కూడా నిర్వహిస్తారు. వర్తమాన వ్యవహారాలతోపాటు వివిధ అంశాలపై ప్రశ్నిస్తారు. ఇంటర్వ్యూలో ఎక్కువ మార్కుల కోసం అన్ని విషయాల్లోనూ ప్రాథమిక పరిజ్ఞానంతో పాటు లాజికల్ థింకింగ్‌ను అలవర్చుకోవాలి.