పదిలమైన కెరీర్‌కు...పారామెడికల్ కోర్సులు

కానీ డిమాండ్‌కు తగ్గట్లు టెక్నీషియన్స్ అందుబాటులో లేరు. ఇంటర్ బైపీసీ అర్హతతో ఆంధ్రప్రదేశ్‌లో ఎన్టీఆర్ ఆరోగ్య విశ్వవిద్యాలయం తన అనుబంధ కళాశాలల్లో డిగ్రీ స్థాయిలో వివిధ పారామెడికల్ కోర్సులను నిర్వహిస్తోంది. ఈ ఏడాది నుంచి ఈ కోర్సులకు ఏపీ ఎంసెట్‌లో ర్యాంకు ద్వారా ప్రవేశాలు కల్పించాలని నిర్ణయించింది. ఈ నేపథ్యంలో ఉపాధి అవకాశాలు కల్పిస్తున్న పలు పారామెడికల్ కోర్సుల గురించి తెలుసుకుందాం...

బీఎస్సీ ఆప్టోమెట్రిక్ టెక్నాలజీ :
సర్వేంద్రియానాం నయనం ప్రధానం అంటారు. అలాంటి నేత్రాలకు ఏదైనా సమస్య వస్తే... చికిత్స అందించేందుకు దోహదపడేదే.. బీఎస్సీ ఆప్టోమెట్రిక్ టెక్నాలజీ. ఈ కోర్సును ఆంధ్రప్రదేశ్ రాష్ట్రంలో ఎన్టీఆర్‌హెల్త్ యూనివర్సిటీ నిర్వహిస్తోంది. ఏపీ ఎంసెట్ ద్వారా ప్రవేశాలు కల్పిస్తోంది. కోర్సు వ్యవధి మూడేళ్లు. ఈ కోర్సు పూర్తిచేసిన అభ్యర్థులు ఆప్టోమెట్రిస్ట్‌గా ఉద్యోగావకాశాలు పొందొచ్చు. అనుభవం సంపాదించుకున్న తర్వాత ఆప్టోమెట్రీ టెక్నీషియన్స్‌గా స్థిరపడొచ్చు.

బీఎస్సీ ఇమేజింగ్ టెక్నాలజీ :
మానవ శరీరంలో రోగ నిర్ధారణలో ఇమేజింగ్ టెక్నాలజీ ప్రముఖ పాత్ర పోషిస్తుంది. ఈ కోర్సు పూర్తిచేసిన వారు ఎక్స్‌రే టెక్నీషియన్స్‌గా, ఎంఆర్‌ఐ, సిటీ స్కానర్స్‌గా ఆసుపత్రుల్లో ఉద్యోగాలు సంపాదించవచ్చు. సొంతంగా ల్యాబ్‌లు నడుపుకోవచ్చు. డయాగ్నస్టిక్ సెంటర్స్‌లో స్థిరపడొచ్చు. ఈ కోర్సును ఎన్టీఆర్ హెల్త్ యూనివర్సిటీ అందిస్తోంది. కోర్సు వ్యవధి మూడేళ్లు. ఏపీ ఎంసెట్ ద్వారా ప్రవేశం కల్పిస్తారు.

బీఎస్సీ ఎనస్థీషియా అండ్ ఆపరేషన్ టెక్నాలజీ :
రోగికి శస్త్ర చికిత్స సమయంలో మత్తుమందు ఎంతో అవసరం. ఇందుకు ప్రత్యేక నిపుణుల అవసరం ఉంటుంది. రోగికి ఎంత మోతాదులో మత్తు మందు ఇవ్వాలో వీరే నిర్ణయిస్తారు. ఓ సర్వే ప్రకారం ప్రతి లక్ష మందికి ఒక మత్తు మందు నిపుణుడు మాత్రమే అందుబాటులో ఉన్నాడు. కాబట్టి ఈ నిపుణులకు భవిష్యత్‌లో మంచి అవకాశాలు ఉంటాయని చెప్పొచ్చు.

• ఆపరేషన్ టెక్నాలజీ.. శస్త్ర చికిత్స సమయంలో ఎంతో ప్రాధాన్యత కలిగి ఉంది. శస్త్ర చికిత్సకు అవసరమయ్యే సరంజామాను వీరే నిర్ణయించాల్సి ఉంటుంది. రోగిని ఆపరేషన్ థియేటర్‌లోకి తీసుకురావడం దగ్గర నుంచి తీసుకెళ్లే వరకూ వీరిదే కీలక పాత్ర. ఈ కోర్సు పూర్తిచేసిన వారు ఆసుపత్రుల్లో ఓటీ టెక్నీషియన్స్‌గా, వైద్యులకు సహాయకులుగా ఉద్యోగావకాశాలు పొందొచ్చు. అనుభవం సంపాదించుకున్న తర్వాత అనస్థీషియా టెక్నీషియన్స్‌గా స్థిరపడొచ్చు. ఈ కోర్సును ఎన్టీఆర్ యూనివర్సిటీ అందిస్తోంది. ఏపీ ఎంసెట్ ద్వారా ప్రవేశాలు కల్పిస్తోంది. కోర్సు వ్యవధి మూడేళ్లు.

బీఎస్సీ కార్డియాక్ కేర్ టెక్నాలజీ అండ్ కార్డియో వెస్కాలర్ టెక్నాలజీ :
మానవ శరీరంలో గుండె ఎంతో ప్రధానమైంది. గుండె సంబంధిత వ్యాధులు, రక్తనాళాల పనితీరు గురించి ఈ కోర్సులో బోధిస్తారు. ఓపెన్ హార్ట్ సర్జరీ, పేస్ మేకర్, స్టంట్స్ అమరిక వంటి వాటిల్లో ఈ నిపుణుల పాత్ర ఎంతో కీలకం. ఈ కోర్సు పూర్తిచేసిన వారు ఆసుపత్రుల్లో ఓటీ అసిస్టెంట్స్‌గా ఉద్యోగం సంపాదించవచ్చు. తగిన అనుభవంతో కార్డియాలజీ టెక్నీషియన్స్‌గా, క్యాత్‌లాబ్ విభాగంలో ఉద్యోగులుగా స్థిరపడే అవకాశాలు మెండు. ఈ కోర్సును ఎన్టీఆర్ హెల్త్ యూనివర్సిటీ అందిస్తోంది. ఏపీ ఎంసెట్ ద్వారా ప్రవేశాలు కల్పిస్తారు. కోర్సు వ్యవధి మూడేళ్లు.

బీఎస్సీ పెర్‌ఫ్యూషన్ టెక్నాలజీ :
గుండెకు సంబంధించిన వ్యాధులను అరికట్టడం, చికిత్స విధానం వంటివి ఈ కోర్సులో భాగం. గుండె, ఊపిరితిత్తుల పర్యవేక్షణ, చికిత్సలో ఈ నిపుణుల పాత్ర కీలకం. ఈ కోర్సును పూర్తిచేసిన వారు ప్రభుత్వ, ప్రైవేటు ఆసుపత్రుల్లో సర్జన్ అసిస్టెంట్‌లు, ఓటీ టెక్నీషియన్స్‌గా స్థిరపడొచ్చు. ఈ కోర్సును ఎన్టీఆర్ హెల్త్ యూనివర్సిటీ అందిస్తోంది. ఏపీ ఎంసెట్ ద్వారా ప్రవేశాలు కల్పిస్తారు. కోర్సు వ్యవధి మూడేళ్లు.

బీఎస్సీ రెనాల్ డయాలసిస్ టెక్నాలజీ :
రక్తాన్ని శుద్ధి చేయడం కిడ్నీల విధి. వీటి పనితీరులో ఏదైనా ఇబ్బంది ఏర్పడినప్పుడు ఆ వ్యక్తికి డయాలసిస్ చేయాల్సి ఉంటుంది. మన దేశంలో చాలామంది కిడ్నీ వ్యాధుల బారిన పడుతున్నారు. వీరికి అవసరమైన డయాలసిస్ చికిత్సను నిపుణుల పర్యవేక్షణలో చేయాలి. దీంతో ఈ నిపుణులకు ఎంతో డిమాండ్. ఈ కోర్సును పూర్తిచేసిన వారు డయాలసిస్ సెంటర్లు, ఆసుపత్రుల్లో ఉద్యోగాలు పొందే వీలుంది. సొంతంగా ల్యాబ్‌లు కూడా ఏర్పాటు చేసుకోవచ్చు. ఈ కోర్సు ఎన్టీఆర్ హెల్త్ యూనివర్సిటీ అందిస్తోంది. ఏపీ ఎంసెట్ ద్వారా ప్రవేశాలు కల్పిస్తారు. కోర్సు వ్యవధి మూడేళ్లు.

బీఎస్సీ న్యూరో ఫిజియాలజీ టెక్నాలజీ :
నరాలకు సంబంధించిన చికిత్స, తీసుకోవాల్సిన జాగ్రత్తల గురించి అవగాహన కల్పించడంతోపాటు ప్రాక్టికల్ నాలెడ్జ్ అందించే కోర్సు ఇది. ఈ కోర్సులో భాగంగా నరాలు, కండరాల పనితీరు గురించి బోధిస్తారు. ఈ కోర్సు పూర్తిచేసిన అభ్యర్థులు ఆసుపత్రుల్లో న్యూరోసర్జన్స్, న్యూరోఫిజీషియన్లు, న్యూరాలజిస్ట్‌లకు అసిస్టెంట్‌లుగా సేవలు అందించొచ్చు. సొంతంగా క్లినికల్‌లు ఏర్పాటు చేసుకోవచ్చు. ఈ కోర్సును ఎన్టీఆర్ హెల్త్ యూనివర్సిటీ అందిస్తోంది. ఏపీ ఎంసెట్ ద్వారా ప్రవేశం కల్పిస్తారు. ఈ కోర్సు వ్యవధి మూడేళ్లు.

బీఎస్సీ మెడికల్ ల్యాబ్ టెక్నాలజీ (ఎంఎల్‌టీ) :
ఎవరైనా ఏదైనా వ్యాధితో బాధపడుతుంటే అందుకు గల కారణాలను తెలిపేవారే మెడికల్ ల్యాబ్ టెక్నీషియన్లు. వ్యాధి నిర్థారణ పరీక్షల్లో వీరు కీలక పాత్ర పోషిస్తారు. ఈ కోర్సు పూర్తిచేసిన వారు మెడికల్ ల్యాబ్ టెక్నీషియన్లుగా స్థిరపడొచ్చు. ఈ రంగంలో ఉద్యోగ అవకాశాలు అపారం. ఈ కోర్సును ఎన్టీఆర్ హెల్త్ యూనివర్సిటీ అందిస్తోంది. ఏపీ ఎంసెట్ ద్వారా ప్రవేశాలు కల్పిస్తారు. కోర్సు వ్యవధి మూడేళ్లు.

బీఎస్సీ నర్సింగ్ :
రోగికి సేవ విషయంలో నర్సింగ్ ప్రధానమైంది. అందుకే వైద్య రంగంలో ఈ వృత్తి ద్వారా అందించే సేవను ప్రత్యేకమైనదిగా చెప్పొచ్చు. నర్సింగ్ నైపుణ్యాలను ఈ కోర్సు ద్వారా అందిస్తారు. థియరీతోపాటు ప్రాక్టికల్ నాలెడ్జ్ కూడా అందిస్తారు. రోగికి అందించాల్సిన ప్రథమ చికిత్స నుంచి వైద్యానికి సంబంధించిన అన్ని విషయాలను నేర్పిస్తారు. ఈ కోర్సును ఎన్టీఆర్ హెల్త్ యూనివర్సిటీ అందిస్తోంది. ఏపీ ఎంసెట్ ద్వారా ప్రవేశాలు కల్పిస్తారు.

బ్యాచిలర్ ఆఫ్ ఫిజియోథెరపీ :
వ్యక్తికి ఏదైనా ప్రమాదం జరగడం ద్వారాకాని, వృద్ధాప్యం వల్ల కాని శరీర భాగాల్లో ముఖ్యంగా జాయింట్స్‌లో బెణకడం, విరగడం వంటి సమస్యలు ఏర్పడినప్పుడు వాటికి ఫిజియోథెరపీ ద్వారా చికిత్స అందిస్తారు. ముఖ్యంగా ఈ కోర్సులో భాగంగా మానవ శరీరంలో వివిధ భాగాలు, వాటి అమరిక గురించి అవగాహన కల్పిస్తారు. ఎన్టీఆర్ హెల్త్ యూనివర్సిటీ ఈ కోర్సును అందిస్తోంది. ఏపీ ఎంసెట్ ద్వారా ప్రవేశాలు కల్పిస్తారు. ఈ కోర్సు వ్యవధి నాలుగున్నరేళ్లు.

• పై కోర్సులతోపాటు ఇంటర్‌లో ఏ గ్రూప్ పాసైన వారికైనా.. మూడేళ్ల వ్యవధి గల జనరల్ నర్సింగ్ మిడ్ వైఫరీ (జీఎన్‌ఎం), పదిహేడు పారామెడికల్ డిప్లొమా కోర్సులు.. పారామెడికల్ బోర్డు ఆధ్వర్యంలో వివిధ విద్యాసంస్థలు నిర్వహిస్తున్నాయి. ఈ కోర్సులు చదివిన వారికి ఉపాధి అవకాశాలు పుష్కలమని చెప్పొచ్చు.