హొసపేటె: విజయనగర జిల్లాలో సెప్టెంబర్‌ 3న జరగనున్న కర్ణాటక ఉపాధ్యాయ అర్హత పరీక్ష(టెట్)కు ప్రభుత్వ మార్గదర్శకాల ప్రకారం నిర్వహించేందుకు అన్ని చర్యలు తీసుకోవాలని అధికారులకు జిల్లాధికారి ఎంఎస్‌ దివాకర్‌ సూచించారు. ఆయన మంగళవారం సాయంత్రం తమ కార్యాలయ సభాంగణంలో ఏర్పాటు చేసిన సమీక్షా సమావేశంలో మాట్లాడారు. జిల్లాలో పరీక్షకు కేటాయించిన ఇన్విజిలేటర్లు, పరీక్ష కేంద్రాల అధిపతులు, గదుల పర్యవేక్షకులకు తగిన సలహా సూచనలు అందించారు. పరీక్ష కేంద్రం, గదుల్లో సీసీ కెమెరాలు, తాగునీటి వ్యవస్థ, విద్యుత్‌ సరఫరాను పర్యవేక్షించాలని సూచించారు. సమావేశం ప్రారంభంలో పాఠశాల విద్యాశాఖ తరపున అధికారులు పరీక్ష ఏర్పాట్ల గురించి వివరించారు. ఆ రోజున హొసపేటెలోని 16 పరీక్ష కేంద్రాల్లో రెండు సెషన్లలో పరీక్ష జరుగుతుందని తెలిపారు. మొదటి సెషన్‌లో 12 పరీక్ష కేంద్రాల్లో 3651 మంది, రెండో సెషన్‌లో 16 కేంద్రాల్లో 5116 మంది విద్యార్థులు పరీక్షకు హాజరవుతారని తెలిపారు. ఈ సందర్భంగా జెడ్పీ సీఈఓ సదాశివ ప్రభు తదితరులు పాల్గొన్నారు.
