కేరళలో కొత్త రకం వైరస్‌ కలకలం రేపుతోంది. అంతుచిక్కని టమాటో ఫ్లూ కారణంగా అనేక మంది చిన్నారులు ఆసుపత్రుల పాలవుతున్నారు. కొన్ని మరణాలు కూడా నమోదవ్వడం ఆందోళన కలిగిస్తోంది. ఐదేళ్లలోపు చిన్నారులే ఎక్కువగా ఈ వైరస్‌ బారిన పడుతున్నారని స్థానిక మీడియా కథనాలు వెల్లడించాయి. ఈ వైరస్‌ను టమాటో జ్వరంగా కూడా పిలుస్తున్నారు. ఇది అత్యంత అరుదైన వైరస్‌ వ్యాధిగా నిపుణులు చెబుతున్నారు. దీని కారణంగా చర్మంపై ఎర్రటి బొబ్బలు వస్తాయి. అవి ఎర్రగా, టమాటో ఆకారంలో ఉండటంతో ఈ వ్యాధికి ఆ పేరు పెట్టినట్లు తెలుస్తోంది. ఈ వైరస్‌ సోకిన పిల్లల్లో శరీరంపై చాలాచోట్ల బొబ్బలు వస్తాయి. దీంతో పాటు తీవ్రమైన జ్వరం, ఒళ్లు నొప్పులు,బలహీనత, డీహైడ్రేషన్‌ వంటి లక్షణాలు ఉంటాయి. కొందరు పిల్లల్లో జలుబు, దగ్గు, కడుపునొప్పి, వాంతుల వంటి లక్షణాలు కూడా ఉన్నట్లు వైద్యులు చెబుతున్నారు. ఈ వ్యాధికి గల కారణాలపై ఇంకా స్పష్టత లేదు. ప్రస్తుతానికి కేరళలోని కొల్లం జిల్లాలో మాత్రమే ఈ కేసులు నమోదయ్యాయి.

Tomato Flu: దేశంలోని ఏ రాష్ట్రంలో టమాటో ఫ్లూ వైరస్‌ను గుర్తించారు?