Employees job : ఈ కంపెనీ ఉద్యోగుల గుండెల్లో గుబులే.. అతిపెద్ద కోతలకు తెర..!

వాల్ స్ట్రీట్ టైటన్ ఈ నెల (సెప్టెంబరు) నుంచి అనేక వందల మందిని తొలగించాలని యోచిస్తోందట. కోవిడ్‌ తరువాత ఇది భారీ తొలగింపు అని వ్యాపార వర్గాలు భావిస్తున్నాయి. గోల్డ్‌మన్ ఉద్యోగ కోతలకు సిద్ధమవుతున్నట్లు న్యూయార్క్ టైమ్స్ సెప్టెంబ‌ర్ 12వ తేదీన (సోమవారం) నివేదించింది. అయితే దీనిపై వ్యాఖ్యానించేందుకు  గోల్డ్‌మన్ ప్రతినిధి నిరాకరించారు.

కోవిడ్‌ సంక్షోభం తరువాత ఇదే అతిపెద్ద కోత..!
మొత్తం సంఖ్య కొన్ని మునుపటి కంటే తక్కువే అయినప్పటికీ,  ఈ సెప్టెంబరు నుంచి వందల సంఖ్యలో ఉద్యోగులపై వేటు వేయనుంది. కోవిడ్‌ సంక్షోభం తరువాత ఇదే అతిపెద్ద కోత అని అంచనా. ఆదాయాలు భారీగా తగ్గిపోవడంతో ఈ నిర్ణయం తీసుకున్నట్టు తెలుస్తోంది. బ్లూమ్‌బెర్గ్ డేటా ప్రకారం, ఈ సంవత్సరం బ్యాంక్ ఆదాయాలు 40 శాతానికి మించి పడిపోనున్నాయని విశ్లేషకులు భావిస్తున్నారు. ఈ నేపథ్యంలో జూలైలో నియామకాలని తగ్గించడంతోపాటు, ఉద్యోగుల వార్షిక పనితీరు సమీక్షించాలని సంస్థ నిర్ణయించింది.

ఈ సంస్థలో 47వేల ఉద్యోగులుండగా..
సమీక్ష అనంతరం సాధారణంగా ఫెర్‌ఫామెన్స్‌ చెత్తగా ఉన్న సిబ్బందిని తొలగించనుంది. అలాగే అట్రిషన్ కారణంగా కోల్పోయిన సిబ్బందిని భర్తీ చేసే ప్రక్రియను కూడా తగ్గిస్తున్నట్టు సంస్థ సీఎఫ్‌వో డెనిస్ కోల్‌మన్ ఒక సందర్బంలో వెల్లడించారు. కంపెనీ రెండో త్రైమాసికం ముగింపు నాటికి సంస్థలో 47వేల  ఉద్యోగులుండగా, రెండేళ్ల  క్రితం 39,100 ఉద్యోగులు ఉన్నారు. అలాగే గత 12 నెలలుగా ఎస్‌అండ్‌పీ 500 ఫైనాన్షియల్స్ ఇండెక్స్ 7.5 శాతం క్షీణతతో పోలిస్తే గోల్డ్‌మ్యాన్ షేర్లు ఈ ఏడాది 10 శాతానికిపైగా పతనం కాగా గత  ఏడాది క్రితం కంటే దాదాపు 15 శాతం క్షీణించాయి.