బిజినెస్ అనలిటిక్స్ విశ్లేషించి.. వ్యాపారాన్ని ఉరకలెత్తించి..

వైఫల్యాల నుంచి నేర్చుకోవడం (Learning from Failure)..
పక్కా ప్రణాళిక (Proper Planning)..
కష్టపడి పనిచేయడం (Hard Work)..
ఓ వ్యాపారం విజయవంతం కావడానికి అనుసరించాల్సిన మార్గాలివి. వీటిలో ఏ ఒక్కటి సరిగా లేకున్నా ‘సక్సెస్’ లక్ష్యాన్ని చేరుకోలేం. ఎప్పటికప్పుడు కొత్త ప్రణాళికల్ని సిద్ధం చేసుకొని అమలు చేసినప్పుడే వ్యాపారం లాభాల బాట పడుతుంది. ఇలాంటి ప్రణాళికల వ్యూహరచనకు ఉపయోగపడేదే ‘బిజినెస్ అనలిటిక్స్’. సరళీకరణ, ప్రైవేటీకరణ, ప్రపంచీకరణల నేపథ్యంలో వ్యాపార సంస్థల మధ్య పోటీ తీవ్రం కావడంతో బిజినెస్ అనలిటిక్స్ నిపుణులకు డిమాండ్ పెరుగుతోంది. ఈ నేపథ్యంలో ‘బిజినెస్ అనలిటిక్స్’ లో కెరీర్‌పై స్పెషల్ ఫోకస్..

వివిధ వనరుల ద్వారా అందుబాటులోకి వచ్చిన సమాచారాన్ని (Raw Data)రకరకాల పద్ధతుల ద్వారా విశ్లేషించి ఓ కంపెనీ పనితీరును మదించడమే బిజినెస్ అనలిటిక్స్. కంపెనీ కొత్త ప్రణాళికలను రూపొందించేందుకు ‘బిజినెస్ అనలిటిక్స్’ ఉపయోగపడుతుంది. బిజినెస్ అనలిటిక్స్ నిపుణులు సాంఖ్యక(స్టాటిస్టికల్), పరిమాణాత్మక (క్వాంటిటేటివ్), సాంకేతిక(టెక్నికల్) పద్ధతులను ఉపయోగించి అందుబాటులో ఉన్న సమాచారాన్ని విశ్లేషిస్తారు. తద్వారా కంపెనీ వ్యాపార అభివృద్ధికి ఉపయోగపడే నిర్ణయాలు తీసుకోవడంలో కీలక పాత్ర పోషిస్తారు. ఉదాహరణకు ఓ సంస్థ వివిధ నగరాల్లో షాపింగ్ మాల్స్ ఏర్పాటు చేసిందనుకుంటే ఓ నగరంలో కొన్ని వస్తువుల అమ్మకాలు చాలా తక్కువగా ఉన్నాయి. దీనికి కారణమేంటన్న దాన్ని బిజినెస్ అనలిటిక్స్ నిపుణులు సంబంధిత సంస్థకు అందించగలుగుతారు.

ఓ రిటైల్ సంస్థ వివిధ ప్రాంతాల్లో కొత్తగా స్టోర్‌లను ప్రారంభించాలనుకునే సందర్భంలో బిజినెస్ అనలిటిక్స్ నిపుణులు ఆయా ప్రాంతాల జనాభా, వారి అభిరుచులు, ఆర్థిక పరిస్థితులు, పోటీదారుల వ్యాపారం తదితరాలకు సంబంధించిన విస్తృత డేటాను విశ్లేషించి వ్యూహాన్ని రూపొందిస్తారు. దీని ఆధారంగా సంస్థ నిర్ణయాలు తీసుకుంటుంది. ఇలా కంపెనీకి సంబంధించిన చాలా విషయాల్లో బిజినెస్ అనలిటిక్స్ నిపుణులు కీలకపాత్ర పోషిస్తారు.

నిపుణులకు పెరుగుతున్న డిమాండ్:
పస్తుతం వ్యాపార సంస్థల మధ్య తీవ్ర పోటీ వాతావరణం నెలకొని ఉంది. కస్టమర్ కింగ్‌ను ఆకట్టుకునేందుకు ఎప్పటికప్పుడు మార్కెట్ పరిస్థితులను విశ్లేషించుకొని, కొత్త ప్రణాళికలను అమలు చేయడంపైనే ఓ సంస్థ మనుగడ ఆధారపడి ఉంటుంది. ఈ నేపథ్యంలో బిజినెస్ అనలిటిక్స్ నిపుణులకు డిమాండ్ పెరుగుతోంది. ‘మెక్‌కిన్సే’ గ్లోబల్ ఇన్‌స్టిట్యూట్ అంచనా ప్రకారం 2018 నాటికి ఒక్క అమెరికాలోనే అనలిటికల్ స్కిల్స్ ఉన్నవారి కొరత 1.40 లక్షల నుంచి 1.90 లక్షల వరకు ఉండనుంది. విస్తృత డేటాకు సంబంధించిన విశ్లేషణను సమర్థవంతమైన నిర్ణయాలు తీసుకునేందుకు ఎలా ఉపయోగించుకోవాలో తెలిసే మేనేజర్లు, అనలిస్టుల కొరత 1.50 లక్షల వరకు ఉండనుంది. భారత్ మార్కెట్లోనూ నిపుణులైన అనలిస్టుల కొరత తీవ్రంగా ఉంది. ఈ పరిస్థితుల్లో బిజినెస్ అనలిటిక్స్ కోర్సులు చేసిన ప్రతిభావంతులకు ఉన్నత కెరీర్ అవకాశాలకు ఢోకా లేదని చెప్పొచ్చు.

ఉన్నత విద్యా సంస్థల్లో:
పస్తుతం దేశ జాబ్ మార్కెట్లో బిజినెస్ అనలిటిక్స్‌కు ఉన్న డిమాండ్‌ను దృష్టిలో ఉంచుకొని చాలా ఉన్నత విద్యా సంస్థలు వివిధ రకాల కోర్సులను అందిస్తున్నాయి. ఔత్సాహిక విద్యార్థులకు, వర్కింగ్ ప్రొఫెషనల్స్‌కు టెక్నికల్, మేనేజ్‌మెంట్ స్కిల్స్ మేళవింపుతో కోర్సులను ఆఫర్ చేస్తున్నాయి. వీటిలో ఇండియన్ ఇన్‌స్టిట్యూట్ ఆఫ్ మేనేజ్‌మెంట్- కలకత్తా; ఇండియన్ స్కూల్ ఆఫ్ బిజినెస్ (ఐఎస్‌బీ-హైదరాబాద్); ఐఐఎం-లక్నో; ఐఐఎం-బెంగళూరు వంటి ప్రతిష్ఠాత్మక సంస్థలు ఉన్నాయి. సంస్థలు ఆన్ క్యాంపస్, ఆన్‌లైన్ బోధనా పద్ధతులను అవలంబిస్తున్నాయి. కొన్ని సంస్థలు విదేశీ బీ-స్కూల్స్ సహకారం తీసుకొని నాణ్యమైన విద్యను అందిస్తున్నాయి.

ఎవరు అర్హులు:

ఏయే ఉద్యోగాలుంటాయి?
ఔత్సాహికులు ఫ్రెషర్స్‌గా లేదా రెండు-మూడేళ్ల పని అనుభవంతో బిజినెస్ అనలిటిక్స్‌లో కెరీర్‌ను ప్రారంభించవచ్చు. అనలిటిక్స్ కోర్సులు పూర్తి చేసిన వారికి అందుబాటులో ఉన్న ఉద్యోగాలు.. జూనియర్ బిజినెస్ అనలిటిక్స్ ఎగ్జిక్యూటివ్; సీనియర్ బిజినెస్ అనలిటిక్స్ ఎగ్జిక్యూటివ్; అసిస్టెంట్ మేనేజర్ (బిజినెస్ ఇంటెలిజెన్స్ అండ్ కస్టమర్ అనలిటిక్స్); డేటా మోడలర్(బిజినెస్ ఇంటెలిజెన్స్ అండ్ అనలిటిక్స్); బిజినెస్ కన్సల్టెంట్ (ఫైనాన్సియల్ అనలిటిక్స్); బిజినెస్ కన్సల్టెంట్ (బీపీవో/కేపీవో/ఐటీఈఎస్); ప్రాజెక్టు మేనేజర్ (అనలిటిక్స్); టీమ్ లీడర్.

కెరీర్ గ్రాఫ్:
జూనియర్ బిజినెస్ అనలిస్టులుగా కెరీర్‌ను ప్రారంభించిన వారు ప్రతిభ, శ్రమించే తత్వం ఉంటే రెండుమూడేళ్లలోనే ఉన్నత స్థానాలకు చేరుకోవచ్చు. సీనియర్, టీమ్ లీడర్ హోదాలు పొందొచ్చు. బిజినెస్ అనలిటిక్స్‌కు సంబంధించి ఉన్నత స్థాయి కోర్సులు పూర్తిచేసిన వారు సొంతంగా సంస్థలు ఏర్పాటు చేసుకోవచ్చు.

వేతనాలు:
మైక్రోసాఫ్ట్, గూగుల్, జెన్‌ప్యాక్ట్, టీసీఎస్, ఐబీఎం, విప్రో, డెల్ వంటి సంస్థలు ప్రతిభ కలిగిన అనలిటిక్స్ నిపుణులకు అత్యుత్తమ ప్యాకేజీలు అందిస్తున్నాయి. ప్రతిభ ఉన్న బిజినెస్ అనలిటిక్స్ నిపుణులకు కార్పొరేట్ కంపెనీలు నెలకు రూ.80 వేల నుంచి రూ.లక్ష వరకు ఆఫర్ చేస్తున్నాయి.
---------------------------------------------------

ఏటా 25 శాతం పెరుగుదల
అనలిటిక్స్ నిపుణులకు భారత్‌తో పాటు విదేశాల్లోనూ అధిక డిమాండ్ ఉంది. ఏటా అనలిటిక్స్ నిపుణులకు దాదాపు 25 శాతం మేర డిమాండ్ పెరుగుతోంది. అనలిటిక్స్‌లో రాణించాలంటే స్టాటిస్టిక్స్/మ్యాథమెటికల్, డేటా వేర్‌హౌజ్ స్కిల్స్ తప్పనిసరి. ప్రతిభావంతులైన మానవ వనరులకు దేశ, విదేశాల్లోని ఎంఎన్‌సీలు స్వాగతం పలుకుతున్నాయి.
- భాస్కర్ గుప్త,
అనలిటిక్స్ ఇండియా మేగజైన్ వ్యవస్థాపకులు.
---------------------------------------------------

బిజినెస్ అనలిటిక్స్ కోర్సులు ఆఫర్ చేస్తున్న ఉన్నత సంస్థలు
ఐఎస్‌బీ- హైదరాబాద్‌
హైదరాబాద్‌లోని ఇండియన్ స్కూల్ ఆఫ్ బిజినెస్ సర్టిఫికెట్ ప్రోగ్రాం ఇన్ బిజినెస్ అనలిటిక్స్ (సీబీఏ)ను ఆఫర్ చేస్తోంది. ఇది ఏడాది వ్యవధి గల ఎగ్జిక్యూటివ్ కోర్సు.