ఇంటర్‌తో సంబంధం లేకుండా ఎన్‌ఐటీ, ఐఐటీల్లో ప్రవేశాలు

ఇప్పటికే ప్రవేశాల విధానంలో మార్పులు తెచ్చిన ఐఐటీ కౌన్సిల్ మరిన్ని మార్పులకు శ్రీకారం చుడుతోంది. ఇందులో భాగంగా ఎన్‌ఐటీల్లో ప్రవేశాలకు నిర్వహించే జేఈఈ స్కోర్‌తో పాటు జేఈఈ తుది ర్యాంకు ఖరారు చేయడంలో ఇంటర్ మార్కులకు ఉన్న 40 శాతం వెయిటేజీని ఇప్పటికే రద్దు చేసింది. ఐఐటీల్లో ప్రవేశాలకు నిర్వహించే జేఈఈ అడ్వాన్‌‌సడ్ ర్యాంకుతోపాటు టాప్-20 పర్సంటైల్‌లో ఉండాలన్న నిబంధనను కూడా తొలగించింది. ఎన్‌ఐటీలు అయినా, ఐఐటీలు అయినా విద్యార్థి ఆయా ప్రవేశ పరీక్షల ర్యాంకుతోపాటు ఇంటర్మీడియట్‌లో 75 శాతం (ఎస్సీ, ఎస్టీ, వికలాంగులైతే 65 శాతం) మార్కులు ఉంటేచాలని నిర్ణయించింది. 2017-18 విద్యా సంవత్సరంలో దీని ఆధారంగానే ప్రవేశాలు చేపట్టనుంది. అయితే భవిష్యత్తులో అసలు ఇంటర్మీడియట్ మార్కులతో సంబంధమే లేకుండా, కేవలం జేఈఈ మెయిన్, జేఈఈ అడ్వాన్స్‌డ్ ర్యాంకుల ఆధారంగానే ఎన్‌ఐటీ, ఐఐటీల్లో ప్రవేశాలు చేపట్టేలా కసరత్తు చేస్తున్నట్లు తెలిసింది.