Prof BS Murty: ‘స్టార్టప్‌’లతో వికసిత భారత్‌!.. డ్రైవ‌ర్‌ రహిత వాహనాల పరిశోధనలు

పరిశోధనలకే ప్రాధాన్యం..

ఐఐటీహెచ్‌ మొదటి నుంచీ పరిశోధనలపై ఫోకస్‌ పెట్టింది. 6జీ, 5జీ వంటి టెలికం, హెల్త్‌కేర్, మాన్యుఫ్యాక్చరింగ్, కోల్‌ రీసెర్చ్, కంప్యూటేషనల్‌ వంటి రంగాల్లో పరిశోధనలు ప్రగతిలో ఉన్నాయి. 2023–24లో పరిశోధనల కోసం రూ.250 కోట్ల నిధులు వచ్చాయి.

ఐఐటీహెచ్‌లో చదువుతున్న 5,300 మంది విద్యార్థుల్లో 60 శాతం మంది పీహెచ్‌డీ, ఎంటెక్‌ వాళ్లే. అందులోనూ సుమారు 1,500 మంది పీహెచ్‌డీ వాళ్లున్నారు.

చదవండి: Technozion 24: విద్యార్థులే నిర్వాహకులుగా.. ఏడాదిలో రెండుసార్లు..

స్టార్టప్‌ల దిశగా ప్రోత్సహిస్తున్నాం..

విద్యార్థులు వారి అభిరుచులకు అనుగుణంగా బీటెక్‌లో సబ్జెక్టులను ఎంచుకునే స్వేచ్ఛ కల్పిస్తున్నాం. విద్యార్థులెవరికైనా స్టార్టప్‌ పెట్టాలనే ఆసక్తి ఉంటే బీటెక్‌ రెండో సంవత్సరం తర్వాత బయటికి వెళ్లి స్టార్టప్‌పై పనిచేసేందుకు అనుమతి ఇస్తున్నాం.

ఐదేళ్లలో వారు తిరిగొచ్చి మిగతా రెండేళ్లు చదువు పూర్తి చేసే అవకాశం కల్పిస్తున్నాం. ఇన్నోవేటివ్‌ ఐడియా ఉంటే వారికి రూ.లక్ష ఫండింగ్‌ ఇచ్చి.. స్టార్టప్‌ల దిశగా పనిచేసుకునేందుకు ప్రోత్సహిస్తున్నాం. గత 14 ఏళ్లలో మా విద్యార్థుల భాగస్వామ్యంతో ఏకంగా 260 స్టార్టప్‌లు వచ్చాయి. వాటికి రూ.1,500 కోట్ల వరకు పెట్టుబడులు వచ్చాయంటే సక్సెస్‌ రేట్‌ ఏ స్థాయిలో ఉందో అర్థం చేసుకోవచ్చు.