ఫోరెన్సిక్ ఆడిటింగ్... అప్ కమింగ్ కెరీర్

ఫోరెన్సిక్ ఆడిటర్‌గా మారడానికి బీకామ్ సరిపోతుందా.. ఎలాంటి సర్టిఫికేషన్స్ పూర్తిచేయాలి.. సీఏలకు ఈ రంగంలో ఎలాంటి అవకాశాలు లభిస్తున్నాయి.. అధీకృత ఫోరెన్సిక్ ఆడిటర్స్‌గా మారేందుకు మార్గాలేంటి.. కార్పొరేట్ సంస్థల్లో కొలువులు అందుకునే మార్గాలేంటి..? ఇలాంటి ఎన్నో సందేహాలకు సమాధానమే.. ఈ కథనం...

ఫోరెన్సిక్ ఆడిటింగ్ అంటే?
ఫోరెన్సిక్ అంటే... నేర పరిశోధనలో సైంటిఫిక్ టెక్నిక్స్ ఉపయోగించడం! ఓ కంపెనీ ఖాతాలను, కార్యకలాపాలను నిష్పాక్షికంగా, స్వతంత్రంగా పరిశీలించడమే... ఆడిటింగ్!! దీన్నిబట్టి ఆయా సంస్థలు లేదా వ్యక్తుల ఆర్థిక లావాదేవీలను సునిశితంగా, శాస్త్రీయంగా పరిశీలించే ప్రక్రియను ఫోరెన్సిక్ ఆడిటింగ్ అని చెప్పొచ్చు. ఈ ప్రక్రియ నిధుల మళ్లింపు, ఎగవేతలు, ఇతర ఆర్థిక అవకతవలకు పాల్పడిన వారికి వ్యతిరేకంగా కోర్టులో సాక్ష్యంగా కూడా ఉపయోగపడుతుంది. ఇటీవల కాలంలో కార్పొరేట్ రంగంలో ఆర్థిక లావాదేవీల్లో అవకతవకలు.. బ్యాంకుల్లో ఎన్‌పీఏలు (నిరర్థక ఆస్తులు) పెరిగిపోవడం.. భారీగా రుణాల ఎగవేతలు.. మనీ లాండరింగ్ వంటివి సర్వసాధారణమయ్యాయి. అందుకే భారీ లావాదేవీలను ఫోరెన్సిక్ ఆడిటింగ్ చేయడాన్ని ఆర్‌బీఐ కూడా తప్పనిసరి చేసింది. ప్రపంచవ్యాప్తంగా దాదాపు అన్ని టాప్ కంపెనీల్లో ఫోరెన్సిక్ డిపార్ట్‌మెంట్ ఉంది. మన దేశంలోనూ బ్యాంకింగ్ రంగంలో ఉద్దేశపూర్వకంగా రుణాల ఎగవేతలు పెరిగిపోతున్న నేపథ్యంలో ఫోరెన్సిక్ ఆడిటింగ్ ప్రాధాన్యం మరింతగా పెరిగింది. దాంతో ఈ విభాగంలో యువతకు ఉపాధి అవకాశాలు మెరుగవుతున్నాయి.

ఫోరెన్సిక్ ఆడిటర్ విధులు..
ఫోరెన్సిక్ ఆడిటర్స్...సంస్థల్లో ఆర్థిక లావాదేవీల్లో అవకతవకల నివారణకు, నిర్థారణకు కీలకంగా నిలుస్తున్నారు. అంతర్జాతీయ స్థాయిలోనూ ఫార్చూన్-500 కంపెనీల్లో 80 శాతం సంస్థలు ఫోరెన్సిక్ ఆడిటర్లను నియమించుకున్నాయంటేనే ఫోరెన్సిక్ ఆడిటర్ల ప్రాధాన్యాన్ని అర్థం చేసుకోవచ్చు. ప్రస్తుత పరిస్థితుల్లో ఫోరెన్సిక్ ఆడిటర్ల విధులు చాలా కీలకంగా మారుతున్నాయి. ఆర్థిక లోపాలు జరిగిన సంస్థల్లో వీరు అన్ని అకౌంట్‌లను క్షుణ్నంగా పరిశీలిస్తారు. అకౌంటింగ్, ఆడిటింగ్ విభాగాల్లోని రికార్డులను క్షుణ్నంగా, సునిశితంగా పరిశీలించి లోపం ఎక్కడ జరిగిందో ఇట్టే పసిగడతారు. ఈ ప్రక్రియలో భాగంగా సైబర్ ‘లా’స్, సైబర్ సెక్యూరిటీ వంటి విభాగాలతో కలిసి పనిచేస్తారు. ఫలితంగా మోసాలకు పాల్పడిన వ్యక్తులపై చర్యలకు అవసరమైన ఆధారాలను వీరు సిద్ధం చేస్తారని చెప్పొచ్చు. ఫోరెన్సిక్ ఆడిటింగ్ వల్ల భవిష్యత్‌లో లోపాలు పునరావృతం కాకుండా జాగ్రత్తలు తీసుకునేందుకు కూడా అవకాశం లభిస్తుంది.

కెరీర్ అడుగులు..
ఫోరెన్సిక్ ఆడిటింగ్ విభాగంలో బీకాంతోనే కెరీర్ ప్రారంభించే అవకాశముంది. బీకామ్‌తోపాటు ఫోరెన్సిక్ ఆడిటింగ్‌కు సంబంధించిన సర్టిఫికేషన్స్ ఉంటే ఉద్యోగావకాశాలు రెట్టింపవడం ఖాయం. ప్రస్తుతం ఈ సర్టిఫికేషన్‌ను అంతర్జాతీయ స్థాయిలో పేరు గడించిన అమెరికాకు చెందిన అసోసియేషన్ ఆఫ్ సర్టిఫైడ్ ఫ్రాడ్ ఎగ్జామినర్స్ (ఏసీఎఫ్‌ఈ) సంస్థ అందిస్తోంది. దీన్ని ఆన్‌లైన్‌లోనే అభ్యసించి నిర్ణీత వ్యవధిలోని కోర్సు పూర్తి అయ్యాక నిర్వహించే ఆన్‌లైన్ పరీక్షలో ఉత్తీర్ణత సాధిస్తే సర్టిఫైడ్ ఫ్రాడ్ ఎగ్జామినర్ హోదా లభిస్తుంది. ఈ సర్టిఫికెట్ ఆధారంగా ఫోరెన్సిక్ ఆడిటర్, ఫోరెన్సిక్ అకౌంటెంట్ వంటి ఉద్యోగాలు సొంతం చేసుకోవచ్చు.

ఏసీఎఫ్‌ఈ మెంబర్‌షిప్‌కు మార్గం :
అసోసియేషన్ ఆఫ్ సర్టిఫైడ్ ఫ్రాడ్ ఎగ్జామినర్స్(ఏసీఎఫ్‌ఈ)లో మెంబర్‌షిప్ పొందాలంటే.. ముందుగా ఔత్సాహికులు సదరు వెబ్‌సైట్‌లో పేరు నమోదు చేసుకోవాలి. ఆన్‌లైన్‌లో, వెబినార్స్, లింక్డ్‌ఇన్ తదితర మార్గాల ద్వారా కోర్సుకు సంబంధించిన సబ్జెక్ట్‌లలో అభ్యసనం పూర్తిచేయాలి. ఆ తర్వాత ఆన్‌లైన్ పద్ధతిలో పరీక్ష రాసేందుకు దరఖాస్తు చేసుకుంటే.. అనుమతి లభిస్తుంది. ఈ పరీక్ష మొత్తం నాలుగు విభాగాల్లో ఉంటుంది. అవి..

1. ఫైనాన్షియల్ ట్రాన్సాక్షన్స్ అండ్ ఫ్రాడ్ స్కీమ్స్
2. ఫ్రాడ్ ప్రివెన్షన్ అండ్ డిటెరెన్స్
3. ఇన్వెస్టిగేషన్
4. లా. ఏసీఎఫ్‌ఈ నిర్వహించే సర్టిఫికేషన్ కోర్సును మన దేశంలోనూ అభ్యసించే వీలుంది. ఏసీఎఫ్‌ఈకి అంతర్జాతీయంగా చాప్టర్లుగా పిలిచే ప్రాంతీయ కేంద్రాలు ఉన్నాయి. మన దేశంలో హైదరాబాద్, బెంగళూరు తదితర ప్రముఖ నగరాల్లో వీటిని ఏర్పాటు చేశారు

1. www.acfe.com  
2. https://indiaforensic.com/  
3. www.gfsu.edu.in  
4. www.gujarathuniversity.ac.in

ఉత్సుకత, సునిశిత పరిశీలన ప్రధానం..
ఫోరెన్సిక్ ఆడిటింగ్‌లో బీకాంతోనే కెరీర్ ప్రారంభించే అవకాశముంది. ఈ విభాగంలో అడుగుపెట్టాలనుకునే వారికి ఉత్సుకత, సునిశిత పరిశీలన వంటి లక్షణాలు తప్పనిసరి. ఈ కెరీర్‌లో ఇష్టంగా పనిచేస్తే ఆకాశమే హద్దుగా ఎదగొచ్చు. ప్రతి కేస్‌లో ఒక కొత్త విషయం తెలుసుకునే అవకాశం లభిస్తుంది. మన దేశంలో ఇప్పుడిప్పుడే ఫోరెన్సిక్ ఆడిటర్లకు డిమాండ్ పెరుగుతోంది. ఇది అప్ కమింగ్ కెరీర్‌గా మారుతోంది. కాబట్టి ఇప్పుడే దీనివైపు దృష్టి సారిస్తే.. రానున్న రోజుల్లో అవకాశాలు సొంతం చేసుకోవడంలో ముందంజలో నిలవొచ్చు.
- పి.శరత్ కుమార్, సీఏ, ఏసీఎఫ్‌ఈ హైదరాబాద్ చాప్టర్ ప్రెసిడెంట్.