ఐటీ ఫ్రెషర్స్ రిక్రూట్‌మెంట్స్.. ముందుంది మంచి కాలమేనా!

కొవిడ్ కారణంగా సాఫ్ట్‌వేర్ కొలువుల ఆశలు గల్లంతవుతున్నాయి. ఇప్పుడున్న పరిస్థితుల్లో నాలుగేళ్లు చదివిన బీటెక్ చదువుకు సార్థకత కష్టమే. ఐటీ కంపెనీల్లో ఒకవేళ నియామకాలు జరిగినా.. సీనియర్ల స్థాయిలోనే ఉంటాయి. ఫ్రెషర్స్‌ను నియమించుకునేందుకు కంపెనీలు అంతగా ఆసక్తి చూపకపోవచ్చు.-ఇలాంటి భావన ప్రస్తుతం కొంతమంది బీటెక్ విద్యార్థుల్లో కనిపిస్తోంది!!

వాస్తవానికి సంస్థలు ఫ్రెషర్స్‌ను రిక్రూట్ చేసుకునే దిశగా అడుగులు వేస్తున్నాయనే అంచనాలు వెలువడుతున్నాయి. కారణం.. కంపెనీలు వచ్చే ఆర్థిక సంవత్సరంలో.. కొత్తగా నియామకాలు చేపట్టే విధంగా ప్రణాళికలు రూపొందిస్తుండటమే! ఫ్రెషర్స్‌కు ఆఫర్లు ఇచ్చేముందు అకడమిక్ అర్హతల తోపాటు స్కిల్స్‌ను పరిగణనలోకి తీసుకోనున్నాయి.

గాడిలో పడుతున్న ఐటీ..
కొవిడ్ కాలంలో ఐటీ రంగంలో నియామకాలు కొంత తగ్గుముఖం పట్టినా.. ఇప్పుడు మళ్లీ గాడిలో పడుతున్నాయి. దేశంలోని ప్రముఖ ఐటీ దిగ్గజ సంస్థలు.. తాము ఫ్రెషర్స్ రిక్రూట్‌మెంట్స్ చేపడతామని ప్రకటించడమే ఇందుకు నిదర్శనం. రెండు నెలల క్రితమే టీసీఎస్, విప్రో, ఇన్ఫోసిస్, హెచ్‌సీఎస్ వంటి ప్రముఖ కంపెనీలు.. ఈ ఏడాది తాము కొత్త నియామకాలు చేపట్టనున్నట్ల ప్రకటించాయి. మధ్య స్థాయి ఐటీ సంస్థలు మాత్రం ఫ్రెషర్స్ రిక్రూట్‌మెంట్స్ కోణంలో కొంత వేచి చూసే ధోరణితో అడుగులు వేస్తున్నాయి. ఇటీవల ఓ ప్రముఖ సంస్థ నిర్వహించిన సర్వే ప్రకారం-ఐటీ, ఐటీఈఎస్ రంగంలోని 13 శాతం సంస్థలు.. ఈ ఆర్థిక సంవత్సరం క్యూ-2, క్యూ-3లలో నియామకాలు కొంత మేర తగ్గించిన పరిస్థితి ఉంది.

ఇంకా చదవండి: part 2: కోవిడ్- 19 కాలంలోనూ క్యాంపస్ ప్లేస్‌మెంట్స్ షురూ.. కోర్ టెక్నికల్ విభాగాల్లోనూ ఆశాజనకమే..