ఇంజనీరింగ్‌లో కాలేజీ ముఖ్యమా...బ్రాంచా !

ఇంజనీరింగ్ ప్రవేశాల సందడి మొదలవుతుంది. ఇప్పుడు విద్యార్థులు, తల్లిదండ్రులకు ఎదురయ్యే ప్రధాన ప్రశ్న.. ఏ కాలేజీలో చేరాలి? ఏం బ్రాంచ్‌ను ఎంపిక చేసుకోవాలి? మరోవైపు ప్రైవేటు ఇంజనీరింగ్ కాలేజీల నుంచి ఆకర్షణీయ ప్రకటనలు. ఫలానా బ్రాంచ్‌లో చేరితేనే ఉద్యోగాలు లభిస్తాయనే విశ్లేషణలు. ఈ నేపథ్యంలో ఇంజనీరింగ్ కాలేజీ, బ్రాంచ్ ఎంపికలో విద్యార్థులు పరిగణనలోకి తీసుకోవాల్సిన అంశాలేంటో తెలుసుకుందాం...

కొంతకాలం క్రితం వరకూ దేశంలో ఇంజనీరింగ్ క్రేజీ కోర్సు. ఈ కోర్సుకు ఏర్పడిన డిమాండ్‌కు తగ్గట్టుగానే కుప్పలుతెప్పలుగా కాలేజీలు ఏర్పాటయ్యాయి. వాటిలో లక్షల సంఖ్యలో సీట్లు. ఐటీ బూమ్ కొనసాగినంత కాలం క్యాంపస్ ప్లేస్‌మెంట్స్, భారీ జీతాలు, ఎంఎన్‌సీ జాబ్స్, విదేశీ కొలువులతో ఇంజనీరింగ్ విద్యార్థుల పంటపడింది. కానీ, కొంతకాలంగా ఐటీ రంగంలో ఉద్యోగాల కోత, కొత్త కొలువులకు సంబంధించి ఆశాజనక పరిస్థితులు లేకపోవడం వల్ల జాబ్ మార్కెట్ పరిస్థితి కొంత స్తబ్దుగానే ఉన్నా.. నేటికీ ఎక్కువ మంది కోరుకునే కోర్సు ఇంజనీరింగ్! నేటి ఏఐ, ఆటోమేషన్, ఐఓటీ వంటి సరికొత్త టెక్నాలజీ యుగంలో... పుట్టుకొచ్చే ఉద్యోగాలు తక్కువ. ఉన్న కొద్ది ఉద్యోగాల కోసం జాబ్ మార్కెట్‌లో పోటీ ఎక్కువగా ఉంటుంది. అలాంటి పరిస్థితితో సరైన బ్రాంచ్‌ను ఎంచుకున్న విద్యార్థులు భవిష్యత్‌లో మంచి అవకాశాలు అందుకోగలరు. కాబట్టి త్వరలో ఇంజనీరింగ్ కౌన్సెలింగ్‌కు హాజరయ్యే విద్యార్థులు.. బ్రాంచ్ ఎంపికలో ఆచితూచి వ్యవహరించాలని నిపుణులు సూచిస్తున్నారు.

మొదటి ప్రాధాన్యం దేనికి?
ఇంజనీరింగ్ కౌన్సెలింగ్‌కు సిద్ధమయ్యే విద్యార్థికి ప్రధానంగా ఎదురయ్యే ప్రశ్న... మొదటి ప్రాధాన్యం కాలేజీకా... లేక బ్రాంచ్‌కా..! వాస్తవానికి ఒక విద్యార్థిని ఉన్నతమైన ఇంజనీరింగ్ కెరీర్ దిశగా తీర్చిదిద్దడంలో.. బ్రాంచ్, కాలేజీ రెండూ ముఖ్యమే! నచ్చిన బ్రాంచ్, మెచ్చిన కాలేజీలో సీటు దొరికేది చాలా తక్కువ మందికే! రెండింటిలో ఏదో ఒకటి ఎంచుకోవాల్సి వస్తే.. బ్రాంచ్‌కే ప్రాధాన్యం ఇవ్వాలన్నది ప్లేస్‌మెంట్స్ ఆఫీసర్లు, ప్రొఫెసర్ల అభిప్రాయం. విద్యార్థి మొదట తనకు ఆసక్తి ఉన్న బ్రాంచ్ ఎంపిక చేసుకోవాలని వీరు సూచిస్తున్నారు. ఆ తర్వాత ఆయా బ్రాంచ్‌కు సంబంధించి నాణ్యమైన విద్యను అందించే కాలేజీని ఎంచుకోవాలని సలహా ఇస్తున్నారు. కాలేజీ ఎంపికలో ముఖ్యంగా ఆయా బ్రాంచ్‌లకు అక్రిడిటేషన్, గత కొన్నేళ్లుగా క్యాంపస్ ప్లేస్‌మెంట్స్ పరిస్థితి, ఆయా బ్రాంచ్‌ల విద్యార్థుల ఉత్తీర్ణత శాతం, సదరు కాలేజీలో చేరుతున్న విద్యార్థుల కటాఫ్ ర్యాంకులు తదితర అంశాలపై దృష్టిసారించాలి. స్వయంగా కాలేజీని సందర్శించి సీనియర్ విద్యార్థులతో మాట్లాడి.. సదరు ఇన్‌స్టిట్యూట్‌లో బోధన, ఫ్యాకల్టీ, ప్లేస్‌మెంట్స్ గురించి వాకబు చేయాలి.

ఆసక్తితోనే అందలం..
ఇంజనీరింగ్ సీఎస్‌ఈ, ఈసీఈ, ఈఈఈ, సివిల్, మెకానికల్, ఐటీ, మెటలర్జీ, కెమికల్... ఇలా ఎన్నో బ్రాంచ్‌లు ఉన్నాయి. వీటిలో తనకు నప్పే బ్రాంచ్‌ను ఎంచుకోవడం విద్యార్థికి అంత తేలిక కాదు. ఇక్కడ తల్లిదండ్రులు, స్నేహితుల ప్రభావం కూడా ఉంటుంది. ఉదాహరణకు ఓ విద్యార్థి తండ్రి వృత్తి రీత్యా బిల్డర్. ఆయన తన కుమారుడు సివిల్ ఇంజనీరింగ్‌లో చేరి.. తన బిజినెస్‌లో సహకరించాలని కోరుకుంటాడు. తండ్రి ఒత్తిడి కారణంగా కంప్యూటర్ ఇంజనీరింగ్‌లో చేరాలని ఉన్నా... ఆ విద్యార్థి సివిల్ ఇంజనీరింగ్‌నే ఎంచుకోవాల్సిన పరిస్థితి. అలాకాకుండా విద్యార్థి తన ఆసక్తి, సామర్థ్యం, కెరీర్ ప్లానింగ్‌ను దృష్టిలో పెట్టుకొని బ్రాంచ్‌ను ఎంపిక చేసుకోవాలని నిపుణులు సూచిస్తున్నారు. ఏ కెరీర్లో రాణించాలన్నా... విద్యార్థికి ఆసక్తి, సామర్థ్యం ముఖ్యం. అందుకే ఇంజనీరింగ్ కౌన్సెలింగ్‌కు వెళ్లేముందు విద్యార్థులు తొలుత తాము చేరాలనుకుంటున్న కొన్ని బ్రాంచ్‌ల జాబితా రూపొందించుకోవాలి. ఆయా బ్రాంచ్‌ల్లో చేరితే నాలుగేళ్ల బీటెక్ కోర్సులో భాగంగా అభ్యసించాల్సిన సబ్జెక్టులను పరిశీలించాలి. ఆయా సబ్జెక్టుల్లో తన అభిరుచి ఏంటో తెలుసుకోవాలి.