యూపీఎస్సీ సివిల్స్-2018కి అనుసరించాల్సిన వ్యూహాలు..

వ్యక్తిగత సామర్థ్యంపై అంచనా..
బలాలు, బలహీనతలు: సివిల్స్ ఔత్సాహిక అభ్యర్థులు ముందుగా తమ వ్యక్తిగత సామర్థ్యంపై స్పష్టమైన అవగాహన ఏర్పరచుకోవాలి. అకడమిక్‌గా తమకున్న నైపుణ్యాలు, బలాలు, బలహీనతలు, సివిల్స్ ప్రిపరేషన్ పరంగా అనుసరించాల్సిన టైం మేనేజ్‌మెంట్ తదితర అంశాలపై స్పష్టత ఏర్పరచుకోవాలి.

ఆత్మవిశ్వాసంతో..: వ్యక్తిగత స్థామర్థ్యంపై ఆత్మవిశ్వాసం లభించాక ప్రిపరేషన్‌కు సిద్ధమవాలి. పరీక్ష విధానానికి సంబంధించి సిలబస్‌లోని అంశాలు, వాటిపై పట్టు సాధించేందుకు అందుబాటులో ఉన్న వనరుల (మెటీరియల్, ఇతర సదుపాయాలు)ను సేకరించుకోవాలి.

ఆప్షనల్‌పై అవగాహన: ప్రిలిమ్స్ ప్రిపరేషన్‌కు సిద్ధమయ్యే ముందు మెయిన్స్‌లో ఎంపిక చేసుకోవాల్సిన ఆప్షనల్‌పై స్పష్టత ఏర్పరచుకోవాలి. ఎందుకంటే కొన్ని ఆప్షనల్ పేపర్ల (పాలిటీ, పబ్లిక్ అడ్మినిస్ట్రేషన్, ఎకనామిక్స్, సోషియాలజీ)లో ప్రిలిమ్స్, మెయిన్స్ ఉమ్మడి ప్రిపరేషన్‌కు వీలుంటుంది.

శిక్షణపై నిర్ణయం..
సివిల్స్ ఔత్సాహికులు గుర్తించాల్సిన మరో ముఖ్య విషయం.. శిక్షణ. ఇప్పటికే తమ వ్యక్తిగత సామర్థ్య స్థాయిపై స్పష్టత ఏర్పరచుకున్న అభ్యర్థులు.. శిక్షణ తీసుకోవాలా.. వద్దా? అని దానిపై వీలైనంత త్వరగా నిర్ణయం తీసుకోవాలి. వాస్తవానికి శిక్షణ అనేది గెడైన్స్ టూల్ మాత్రమే అని.. అది అభ్యర్థులు సరైన మార్గంలో పయనించేలా చేయడానికి మాత్రమే ఉపకరిస్తుందని, విజయాన్ని శాసించేది మాత్రం అభ్యర్థిలోని నిజమైన సామర్థ్యమేనని శిక్షణ నిపుణులు సైతం అభిప్రాయం వ్యక్తం చేస్తున్నారు. దీన్ని దృష్టిలో ఉంచుకొని కోచింగ్‌పై నిర్ణయం తీసుకోవాలి.

ప్రిపరేషన్ సన్నాహాలు...
ప్రాథమికంగా వ్యక్తిగత సామర్థ్యాలపై అవగాహన, స్పష్టత ఏర్పరచుకున్న అభ్యర్థులు.. ఇక తదుపరి దశలో పరీక్ష ప్రిపరేషన్ విషయంపై దృష్టి సారించాలి. ఈ క్రమంలో అనుసరించాల్సిన వ్యూహాలు..

సిలబస్ పరిశీలన...
సివిల్స్ లక్ష్యాన్ని బలంగా నిర్దేశించుకున్న అభ్యర్థులు ముందుగా సిలబస్‌ను పూర్తిస్థాయిలో పరిశీలించాలి. ఆపై తమకు అను కూలంగా, ప్రతికూలంగా ఉన్న అంశాలు/ పేపర్లతో వేర్వేరుగా జాబితాలను రూపొందిం చుకోవాలి. ప్రతి కూలంగా భావిస్తున్న అంశాలపై ప్రత్యేకంగా దృష్టిసారించాలి. సదరు పేపర్/సబ్జెక్టులో రాణించేందుకు అవసరమైన, అందుబాటులో ఉన్న సెల్ఫ్ లెర్నింగ్ టూల్స్‌ను ఉపయోగించుకోవాలి. ప్రస్తుత ఇంటర్నెట్ యుగంలో ప్రతీ అంశానికి సంబంధించిన సమాచారం ఒక్క క్లిక్‌తో కళ్ల ముందు ప్రత్యక్షమవుతోంది.

గత పరీక్షల విశ్లేషణ :
ప్రిపరేషన్ కోణంలో అభ్యర్థులు తదుపరి దశలో అనుసరించాల్సిన విధానం.. గత ప్రశ్నపత్రాల విశ్లేషణ. కనీసం నాలుగైదు ప్రీవియస్ కొశ్చన్ పేపర్లను పరిశీలించాలి. దీని ఆధారంగా పరీక్షల్లో వస్తున్న ప్రశ్నల తీరు, ఆయా అంశాలకు లభిస్తున్న వెయిటేజీ తదితర అంశాలపై అవగాహన ఏర్పడుతుంది. దీనికి అనుగుణంగా ప్రత్యేకంగా దృష్టిసారించాల్సిన అంశాలపైనా అవగాహన లభిస్తుంది.

మెటీరియల్ సేకరణ: పేపర్లు/సబ్జెక్టులకు సంబంధించి ప్రామాణిక మెటీరియల్‌ను సేకరించుకోవాలి. ఒక్కో సబ్జెక్టుకు కనీసం రెండు పుస్తకాలు చదివే విధంగా ప్రణాళిక రూపొందించుకోవాలి.

ప్రిపరేషన్ తీరు..
ప్రిపరేషన్‌కు అనువైన వాతావరణం ఏర్పడ్డాక అభ్యర్థులు పూర్తిస్థాయి ప్రిపరేషన్‌కు ఉపక్రమించాలి. ఈ క్రమంలో అనుసరించాల్సిన వ్యూహాలు..

సమన్వయ పూర్వక ప్రిపరేషన్ : తొలుత సిలబస్‌లోని అంశాలను పరిశీలించి.. అంతర్గత సంబంధం (ఇంటర్ రిలేటెడ్) కలిగిన అంశాలు, సబ్జెక్టులను గుర్తించాలి. తర్వాత దశలో ఆయా అంశాలను సమన్వయం చేసుకుంటూ ప్రిపరేషన్ కొనసాగించాలి. ముఖ్యంగా జాగ్రఫీ-ఎకానమీ, పాలిటీ- ఎకానమీ, కరెంట్ అఫైర్స్-ఎకానమీ, పాలిటీ అంశాల్లో సమన్వయ పూర్వక ప్రిపరేషన్ విధానం అభ్యర్థులకు చక్కగా ఉపయోగపడుతుంది. దీంతో సమయం ఆదా అవడంతోపాటు ఒకేసారి రెండు సబ్జెక్టుల ప్రిపరేషన్ పూర్తి చేయొచ్చు.

కరెంట్ అఫైర్స్‌‘కీలకం’ :
ఇటీవల ప్రిలిమ్స్ ప్రశ్నపత్రాలను పరిశీలిస్తే కరెంట్ అఫైర్స్ ప్రాధాన్యం పెరిగినట్లు అర్థమవుతుంది. దీన్ని దృష్టి లో పెట్టుకుని అభ్యర్థులు రోజూ కరెంట్ అఫైర్స్‌కు సమ యం కేటాయించాలి. కరెంట్ అఫైర్స్‌ను బాగా అధ్యయనం చేస్తే ఇతర సబ్జెక్టుల పరంగానూ ప్రయోజనం ఉంటుంది.

విశ్లేషణాత్మకంగా..
ప్రిలిమ్స్‌ను ఆబ్జెక్టివ్ విధానంలోనే నిర్వహిస్తున్నప్పటికీ.. అభ్యర్థులు మాత్రం విశ్లేషణాత్మక దృక్పథంతో ప్రిపరేషన్ కొనసాగించాలి. ఇలా చేసినప్పుడే మెయిన్స్‌లో రాణించేందుకు అవసరమైన డిస్క్రిప్టివ్ అప్రోచ్ అలవడుతుంది. ఒక సబ్జెక్టులను చదివేటప్పుడు ప్రాక్టీస్ చేసుకుంటూ చదవడం చాలా కీలకం. ఇందులో భాగంగా చదువుతున్న సబ్జెక్టులోని ముఖ్యాంశాలను నోట్స్ రూపంలో రాసుకోవాలి. ఇది రివిజన్ సమయంలో ఉపయోగపడుతుంది.

ప్రిలిమ్స్ + మెయిన్స్ :
ప్రస్తుత సివిల్స్ సిలబస్ ప్రకారం 70 శాతం అంశాలు ప్రిలిమ్స్, మెయిన్స్ రెండిటిలో (ఉమ్మడిగా)ఉన్నాయి. వీటిని ప్రిలిమ్స్ ప్రిపరేషన్ సమయంలోనే విశ్లేషణాత్మక దృక్పథంతో చదివితే.. ప్రిలిమ్స్ దశలోనే మెయిన్స్‌కు సైతం సన్నద్ధత లభిస్తుంది. అయితే ప్రిలిమ్స్‌కు నెల రోజుల ముందు నుంచి పూర్తిగా ప్రిలిమ్స్‌కు ఉపయోగపడేలా రివిజన్‌పై దృష్టిసారించాలి.