జేఈఈ మెయిన్ రిజిస్ట్రేషన్లు 21.75 లక్షలు: ఆంగ్లంలో పరీక్ష రాసేందుకే మొగ్గు!

గడువు ముగిసే సమయానికి 21,75,183 మంది అభ్యర్థులు జేఈఈ మెయిన్స్ కు రిజిస్ట్రేషన్ చేసుకున్నారు. కరోనా నేపథ్యంలో విద్యార్థులకు మరిన్ని అవకాశాలు కల్పించే దిశగా కేంద్రం నేషనల్ టెస్టింగ్ ఏజెన్సీ ద్వారా ఈ విద్యా సంవత్సరంలో జేఈఈలో అనేక మార్పులకు శ్రీకారం చుట్టింది. ముఖ్యంగా జేఈఈ పరీక్షలను 4 దశల్లో నిర్వహించే విధానం వల్ల విద్యార్థులు దీన్నొక అవకాశంగా మల్చుకోవడానికి పెద్ద ఎత్తున ఉత్సాహం చూపించారని తాజా రిజిస్ట్రేషన్ గణాంకాలు వెల్లడిస్తున్నాయి.

జేఈఈ మెయిన్2021 సిలబస్, ప్రిపరేషన్ గెడైన్స్, మాక్ టెస్ట్స్, ప్రాక్టీస్ టెస్ట్స్, కట్‌ఆఫ్ ర్యాంక్స్, మోడల్ పేపర్స్... ఇతర తాజా అప్‌డేట్స్ కోసం క్లిక్ చేయండి.

కంప్యూటర్ ఆధారిత పరీక్షలు
దేశ వ్యాప్తంగా ఈ పరీక్షలను కంప్యూటర్ ఆధారిత విధానంలో నిర్వహిస్తున్నారు. ఫిబ్రవరి, మార్చి, ఏప్రిల్, మే నెలల్లో నాలుగేసి రోజుల చొప్పున ఉదయం, సాయంత్రం 2 సెషన్లలో ఈ పరీక్షలను నిర్వహించనున్నారు. ఈసారి జేఈఈ మెయిన్స్ ను ఇంగ్లిష్‌తో పాటు హిందీ, తెలుగు, తమిళం, కన్నడం, మలయాళం, గుజరాతీ, ఒడియా, బెంగాలీ, మరాఠీ, పంజాబీ, ఉర్దూ, అస్సామి భాషల్లో ఈ పరీక్షలు జరగనున్నాయి. ప్రాంతీయ భాషల్లో ప్రశ్నపత్రాలు ఆ భాషతో పాటు ఆంగ్లంలో కూడా ఉంటాయి. ఇప్పటివరకు 21 లక్షల మంది రిజిస్టర్ అవ్వగా, వారిలో 1,49,597 మంది 10 స్థానిక భాషల్లో పరీక్షలు రాసేందుకు మొదటిసారి ఆప్షన్ ఇచ్చినట్లు ఎన్‌టీఏ గణాంకాలు చెబుతున్నాయి. వీరిలో సగం మంది హిందీని ఎంచుకున్నారు. గుజరాతీలో రాసేందుకు 44,094 మంది, బెంగాలీలో రాసేందుకు 24,841 మంది ఆప్షన్లు ఇచ్చారు. అయితే అత్యధికులు ఆంగ్లంలోనే పరీక్ష రాసేందుకు ఆప్షన్ ఇవ్వడం గమనార్హం.

మొదటి దశ పరీక్షకు 6.6 లక్షల మంది దరఖాస్తు
జేఈఈ మెయిన్స్ ను నాలుగు దశల్లో నిర్వహించేందుకు నిర్ణయించడంతో అభ్యర్థులు వారికి నచ్చిన దశలో పరీక్ష రాయనున్నారు. తొలిదశ పరీక్షలకు 6,61,761 మంది దరఖాస్తు చేశారు. కొందరు నాలుగు దఫాలు రాయడానికి దరఖాస్తు చేయగా, కొందరు ఒకటి, రెండు దఫాల్లో పరీక్షలు రాసేందుకు వీలుగా దరఖాస్తు చేశారు.

నాలుగు దశల్లో పరీక్ష రాసేందుకు రిజిస్ట్రేషన్లు

దశ	దరఖాస్తులు
మొదటి దశ (ఫిబ్రవరి)	6,61,761
రెండో దశ (మార్చి)	5,04,540
మూడో దశ (ఏప్రిల్)	4,98,910
నాలుగో దశ (మే)	5,09,972

వివిధ భాషల్లో పరీక్ష రాసేందుకు రిజిస్టర్ అయిన వారు

ప్రాంతీయ భాష	దరఖాస్తు
తెలుగు	371
తమిళం	1,264
కన్నడ	234
మలయాళం	398
మరాఠీ	658
ఒడియా	471
పంజాబీ	107
ఉర్దూ	24
అస్సామీ	700
బెంగాలీ	24,841
గుజరాతీ	44,094
హిందీ	76,459

నాలుగు దశల్లో పరీక్షల షెడ్యూల్

ఫిబ్రవరి	23, 24, 25, 26
మార్చి	15, 16, 17, 18
ఏప్రిల్	27, 28, 29, 30
మే	24, 25, 26, 27, 28

కొన్ని ముఖ్య రాష్ట్రాల్లో దరఖాస్తులు ఇలా..

రాష్ట్రం	ఫిబ్రవరి	మార్చి	ఏప్రిల్	మే	మొత్తం
ఆంధ్రప్రదేశ్	87,797	53,323	53,576	60,222	2,54,918
తెలంగాణ	73,782	52,389	48,868	51,896	2,26,935
మహారాష్ట్ర	76,744	65,775	55,123	69,036	2,66,678
ఉత్తరప్రదేశ్	71,676	50,697	51,868	53,721	2,27,962

పరీక్షల సెషన్ సమయాలు