ఐపీఎల్-2020

రోహిత్ శర్మ సారథ్యంలోని డిఫెండింగ్ చాంపియన్ ముంబై ఇండియన్స్ తాజా టైటిల్ గెలుచుకొని ఐదోసారి ట్రోఫీని తమ ఖాతాలో వేసుకుంది. యునెటైడ్ అరబ్ ఎమిరెట్స్‌లోని దుబాయ్‌లో నవంబర్ 10న జరిగిన ఫైనల్లో ముంబై 5 వికెట్ల తేడాతో ఢిల్లీ క్యాపిటల్స్‌పై విజయం సాధించింది. టాస్ గెలిచి ముందుగా బ్యాటింగ్‌కు దిగిన శ్రేయస్ అయ్యర్ నేతృత్వంలోని ఢిల్లీ క్యాపిటల్స్ 20 ఓవర్లలో 7 వికెట్ల నష్టానికి 156 పరుగులు చేసింది. అనంతరం ముంబై 18.4 ఓవర్లలో 5 వికెట్లకు 157 పరుగులు సాధించి గెలిచింది. విజేత ముంబై ఇండియన్స్ జట్టుకు రూ. 20 కోట్లు... రన్నరప్ ఢిల్లీ క్యాపిటల్స్ జట్టుకు రూ. 12 కోట్ల 50 లక్షలు ప్రైజ్‌మనీగా లభించాయి.

ఐపీఎల్-2020 అవార్డులు

• పవర్ ప్లేయర్ ఆఫ్ ద సీజన్: ట్రెంట్ బౌల్ట్ (ముంబై); ప్రైజ్‌మనీ: రూ. 10 లక్షలు
• సూపర్ స్ట్రయికర్ ఆఫ్ ద సీజన్ పొలార్డ్ (ముంబై); ప్రైజ్‌మనీ: రూ.10 లక్షలు
• డ్రీమ్-11 గేమ్ చేంజర్ ఆఫ్ ద సీజన్ అవార్డు కేఎల్ రాహుల్ (పంజాబ్); ప్రైజ్‌మనీ: రూ.10 లక్షలు
• ఫెయిర్ ప్లే అవార్డు ముంబై ఇండియన్స్.
• ఆరెంజ్ క్యాప్ (అత్యధిక పరుగులు చేసిన బ్యాట్స్‌మన్) కేఎల్ రాహుల్ 670 పరుగులు-కింగ్‌‌స ఎలెవన్ పంజాబ్; ప్రైజ్‌మనీ: రూ. 10 లక్షలు
• పర్పుల్ క్యాప్ (అత్యధిక వికెట్లు తీసిన బౌలర్) కగిసో రబడ 30 వికెట్లు- ఢిల్లీ క్యాపిటల్స్; ప్రైజ్‌మనీ: రూ. 10 లక్షలు
• ఎమర్జింగ్ ప్లేయర్ దేవ్‌దత్ పడిక్కల్ 473 పరుగులు-రాయల్ చాలెంజర్స్ బెంగళూరు; ప్రైజ్‌మనీ: రూ. 10 లక్షలు
• మోస్ట్ వాల్యుబుల్ ప్లేయర్ జోఫ్రా ఆర్చర్-రాజస్తాన్ రాయల్స్; ప్రైజ్‌మనీ: రూ.10 లక్షలు

మరికొన్ని విశేషాలు...

• ఐపీఎల్‌లో 200 మ్యాచ్‌లు పూర్తి చేసుకున్న రెండో ప్లేయర్ రోహిత్ శర్మ. ఎమ్మెస్ ధోని (204 మ్యాచ్‌లు) తొలి స్థానంలో ఉన్నాడు.
• ఐపీఎల్‌లో ‘ఆరెంజ్ క్యాప్’ నెగ్గిన నాలుగో భారత క్రికెటర్‌గా కేఎల్ రాహుల్ నిలిచాడు. గతంలో సచిన్ టెండూల్కర్ (2010), రాబిన్ ఉతప్ప (2014), విరాట్ కోహ్లి (2016) ఈ ఘనత సాధించారు.
• ముంబై ఇండియన్స్ తాజా ఐపీఎల్ టైటిల్‌తో టి20 ఫార్మాట్‌లో అత్యధిక టైటిల్స్ నెగ్గిన ప్లేయర్‌గా వెస్టిండీస్ క్రికెటర్ కీరన్ పొలార్డ్ (15 టైటిల్స్) గుర్తింపు పొందాడు. 14 టైటిల్స్‌తో డ్వేన్ బ్రేవో (వెస్టిండీస్) పేరిట ఉన్న రికార్డును పొలార్డ్ సవరించాడు.