తెలంగాణలో 12 నుంచి ఎంసెట్ కౌన్సెలింగ్

సాక్షి, హైదరాబాద్: ఇంజనీరింగ్, ఫార్మసీ కాలేజీల్లో ప్రవేశాల కోసం ఈ నెల 12 నుంచి టీఎస్ ఎంసెట్-2017 కౌన్సెలింగ్ నిర్వహించాలని ఎంసెట్ ప్రవేశాల కమిటీ నిర్ణయించింది. ఈనెల 3న ఉన్నత విద్యా మండలి కార్యాలయంలో మండలి చైర్మన్ ప్రొఫెసర్ తుమ్మల పాపిరెడ్డి అధ్యక్షతన జరిగిన ఎంసెట్ ప్రవేశాల కమిటీ సమావేశంలో ఈ మేరకు ప్రవేశాల షెడ్యూల్‌ను ఖరారు చేశారు. జేఎన్‌టీయూహెచ్ అధికారులు ఇంజనీరింగ్, ఫార్మసీ కాలేజీల అనుబంధ గుర్తింపును ఈ నెల 10లోగా ఇస్తామని పేర్కొనడంతో షెడ్యూల్‌ను ప్రకటించారు. ఈ నెల 12 నుంచి సర్టిఫికెట్ల వెరిఫికేషన్, 16 నుంచి వెబ్ ఆప్షన్ల ప్రక్రియను ప్రారంభించనున్నారు. వెరిఫికేషన్ కోసం రాష్ట్రవ్యాప్తంగా 21 హెల్ప్‌లైన్ కేంద్రాలను ఏర్పాటు చేశారు. సమావేశంలో సాంకేతిక విద్య కమిషనర్, ఎంసెట్ ప్రవేశాల కమిటీ కన్వీనర్ వాణిప్రసాద్, క్యాంపు ఆఫీసర్ శ్రీనివాస్, జేఎన్‌టీయూహెచ్ అధికారులు పాల్గొన్నారు.