ఉక్రెయిన్‌పై రష్యా దాడిని నిరసిస్తూ ఐరాస భద్రతా మండలి ముందుకొచ్చిన కీలక తీర్మానంపై ఓటింగ్‌కు భారత్ దూరంగా ఉంది. 67 దేశాల మద్దతుతో అమెరికా ప్రతిపాదించిన ఈ తీర్మానంపై ఫిబ్రవరి 25న ఓటింగ్‌ జరిగింది. 15 సభ్య దేశాల్లో అమెరికాతో పాటు 11 దేశాలు అనుకూలంగా ఓటేయగా భారత్, చైనా, యూఏఈ ఓటింగ్‌కు దూరంగా ఉన్నాయి. శాశ్వత సభ్య దేశమైన రష్యా తన వీటో అధికారాన్ని ఉపయోగించి తీర్మానాన్ని అడ్డుకుంది. వివాదాల పరిష్కారానికి చర్చలే ఏకైక మార్గమని భారత్ పేర్కొంది.
పుతిన్ వ్యక్తిగత ఆస్తులపై ఆంక్షలు విధించిన దేశం?
ఉక్రెయిన్‌పై రష్యా యుద్ధం నేపథ్యంలో.. రష్యా అధ్యక్షుడు వ్లాదిమిర్‌ పుతిన్, విదేశాంగ మంత్రి సెర్గెయ్‌ లావ్‌రోవ్‌ వ్యక్తిగత ఆస్తులపై అమెరికా ప్రభుత్వం ఆంక్షలు విధించింది. ప్రజాస్వామిక సార్వభౌమ రాజ్యమైన ఉక్రెయిన్‌పై చట్టవిరుద్ధమైన ఈ దాడులకు పుతిన్, లావ్‌రోవ్‌ ప్రత్యక్షంగా బాధ్యత వహించాలని అమెరికా పేర్కొంది. ఉత్తరకొరియా నియంత కిమ్‌ జోంగ్‌ ఉన్, బెలారస్‌ అధ్యక్షుడు లూకాషెంకా, సిరియా అధ్యక్షుడు బషర్‌–అల్‌–అసద్‌పై ఇప్పటికే ఇలాంటి ఆంక్షలు అమలవుతున్నాయి.
ఐఎస్‌ఎస్‌ను నియంత్రించే ఇంజిన్లు ఏ దేశ ఆధీనంలో ఉన్నాయి?
ఉక్రెయిన్‌పై దాడులకు ప్రతిగా అమెరికా విధించిన తీవ్ర ఆంక్షలపై రష్యా అంతరిక్ష విభాగం (రోస్‌కాస్మోస్‌) డైరెక్టర్‌ జనరల్‌ దిమిత్రీ రొగోజిన్‌ తీవ్రంగా స్పందించారు. ‘మాకు సహకారాన్ని నిలిపివేస్తే, అంతర్జాతీయ అంతరిక్ష కేంద్రం(ఐఎస్‌ఎస్‌) అనియంత్రిత కక్ష్యలోకి వెళ్లి, అమెరికా–యూరప్‌పై పడితే ఎవరు రక్షిస్తారు? 500 టన్నుల బరువైన ఐఎస్‌ఎస్‌ భారత్, చైనాల పైనే పడేందుకు అవకాశముంది. ఇదే సాకుతో ఆ దేశాలను బెదిరించాలనుకుంటున్నారా? ఐఎస్‌ఎస్‌ రష్యా మీదుగా వెళ్లడం లేదు కాబట్టి, రిస్కంతా మీకే. ఇందుకు సిద్ధంగా ఉన్నారా?’అని అమెరికాను ప్రశ్నించారు. ఐఎస్‌ఎస్‌ కక్ష్య, అంతరిక్షంలో దాని స్థానాన్ని నియంత్రించే ఇంజిన్లు రష్యా అధీనంలో ఉన్నాయి.
Russia-UKraine War: రష్యా బృందంతో చర్చలకు ఉక్రెయిన్‌ అంగీకారం
డౌన్‌లోడ్‌ చేసుకోండి:
తాజా విద్యా సమాచారం, అన్ని రకాల పోటీ పరీక్షలకు సంబంధించిన కరెంట్‌ అఫైర్స్, స్టడీ మెటీరియల్‌తో పాటు తరగతులకు(అకాడెమిక్స్‌) సంబంధించిన స్టడీ మెటీరియల్‌ను పొందడానికి, కెరీర్‌ అవకాశాలను తెలుసుకోవడానికి సాక్షి ఎడ్యుకేషన్‌ యాప్‌ను ఇప్పుడే డౌన్‌లోడ్‌ చేసుకోండి.
యాప్‌ డౌన్‌లోడ్‌ ఇలా..
డౌన్‌లోడ్‌ వయా గూగుల్‌ ప్లేస్టోర్‌
More Articles
Most Read
