‘ఐఐఎస్సీ’ 2020-21 యూజీ, పీజీ ప్రవేశాల నోటిఫికేషన్‌ వివరాలు..

 ఇది గణితం, సైన్స్ పరిశోధనల్లో ప్రపంచవ్యాప్తంగా గుర్తింపు సొంతం చేసుకున్న ప్రతిష్టాత్మక విద్యాసంస్థ. ఐఐఎస్సీ అందించే నాలుగేళ్ల బీఎస్సీ రీసెర్చ్ కోర్సు పూర్తిచేసుకున్న విద్యార్థులు.. దేశ విదేశాల్లో ఉజ్వల అవకాశాలు అందుకోవచ్చు. 2020-21 విద్యా సంవత్సరానికి ఐఐఎస్సీలో యూజీ, పీజీ ప్రవేశాలకు నోటిఫికేషన్ విడుదలైంది. ఈ నేపథ్యంలో.. ఐఐఎస్సీ అందిస్తున్న కోర్సులు.. వాటి ప్రత్యేకత.. ఉన్నత విద్య, ఉద్యోగావకాశాలపై సమగ్ర సమాచారం.

ఐఐఎస్సీ బెంగళూరు:
దేశంలోనే ప్రతిష్టాత్మక ఉన్నత విద్యాసంస్థ.. ఐఐఎస్సీ, బెంగళూరు. ఇది 1909లో 371 ఎకరాల విస్తీర్ణంలో ఏర్పాటైంది. ఈ ఇన్‌స్టిట్యూట్‌కు 1958లో విశ్వవిద్యాలయ హోదా లభించింది. 2018లో ఇన్‌స్టిట్యూట్ ఆఫ్ ఎమినెన్స్ హోదా వరించింది. ప్రపంచ వ్యాప్తంగా యూనివర్సిటీలకు ఇచ్చే ర్యాంకింగ్‌లో టాప్‌లో కొనసాగుతున్న ఉన్నత విద్యా సంస్థగా పేరొంది. జనరల్ అండ్ అప్లయిడ్ కెమిస్ట్రీ, ఎలక్ట్రికల్ టెక్నాలజీ విభాగాలతో ప్రారంభమైన ఈ సంస్థ, ప్రస్తుతం ఆరు సబ్జెక్టులతో 40కుపైగా విభాగాలతో పలు రకాలు కోర్సులను అందిస్తోంది.

అందిస్తున్న కోర్సులు :
ఐఐఎస్సీ బెంగళూరు.. ప్రస్తుతం నాలుగేళ్ల బ్యాచిలర్ ఆఫ్ సైన్స్(రీసెర్చ్ ప్రోగ్రామ్), పోస్ట్ గ్రాడ్యుయేషన్ కోర్సు ఎంటెక్(పీజీ ఎంటెక్), పీజీ(ఎంఈ)కోర్సుకు సంబంధించి నోటిఫికేషన్ విడుదల చేసింది. వీటితోపాటు ఎంటెక్/ఎండిజైన్, ఎం.మేనేజ్‌మెంట్, ఇంటిగ్రేటెడ్ పీహెచ్‌డీ, పీహెచ్‌డీ కోర్సులను అందిస్తోంది.

బీఎస్సీ రీసెర్చ్ :
ఈ కోర్సు వ్యవధి నాలుగేళ్లు. ఎనిమిది సెమిస్టర్లు. మొదటి మూడు సెమిస్టర్లు అందరికీ కామన్. ఆ తర్వాత మూడు సెమిస్టర్లలో స్పెషలై జేషన్ సబ్జెక్టులు చదవాల్సి ఉంటుంది. నాలుగో ఏట పరిశోధనల దిశగా ఫ్యాకల్టీ పర్యవేక్షణలో ప్రాజెక్ట్ పూర్తిచేయాలి. అందుబాటులో ఉన్న స్పెషలైజేషన్లు... ఫిజిక్స్, కెమిస్ట్రీ, మ్యాథ్స్, బయాలజీ, మెటీరియల్స్, ఎర్త్ అండ్ ఎన్విరాన్‌మెంటల్ సైన్స్. వీటిలో ఏ సబ్జెక్టునైనా స్పెషలైజేషన్‌గా ఎంచుకోవచ్చు. విద్యార్థికున్న ఆసక్తితోపాటు మొదటి మూడు సెమిస్టర్లలో చూపిన ప్రతిభ ఆధారంగా స్పెషలైజేషన్‌ను కేటాయిస్తారు.

యూజీ కోర్సులకు అర్హతలు..

• ఇంటర్మీడియట్ లేదా తత్సమాన విద్యలో ఫిజిక్స్, మ్యాథ్స్, కెమిస్ట్రీ సబ్జెక్టులుగా ఉండి, 60శాతం మార్కులతో ఉత్తీర్ణత సాధించిన వారై ఉండాలి. ఎస్సీ, ఎస్టీ అభ్యర్థులు ఉత్తీర్ణులైతే సరిపోతుంది.
• ఇంటర్మీడియట్‌లో బయాలజీ, స్టాటిస్టిక్స్, ఎలక్ట్రానిక్స్, కంప్యూటర్ సైన్స్‌లో ఏదైనా ఒక సబ్జెక్టుతోపాటు మ్యాథ్స్, ఫిజిక్స్‌లు సబ్జెక్టులుగా ఇంటర్ ఉత్తీర్ణత సాధించిన వారు కూడా దరఖాస్తు చేసుకోవచ్చు.
• 2019లో ఇంటర్ ఉత్తీర్ణులైన విద్యార్థులతోపాటు 2020లో ఇంటర్మీడియట్ పరీక్షలకు హాజరయ్యే విద్యార్థులు కూడా దరఖాస్తు చేసుకోవచ్చు.

పీజీ కోర్సులకు అర్హతలు :

• పీజీ (పోస్ట్ గ్రాడ్యుయేషన్): మాస్టర్ ఆఫ్ టెక్నాలజీ (ఎంటెక్),మాస్టర్ ఆఫ్ డిజైన్(ఎం.డిజైన్) కోర్సుల్లో చేరాలనుకునే విద్యార్థులు బీఈ, బీటెక్ డిగ్రీ విద్యార్హత కలిగి ఉండి.. ఆగస్టు 01, 2020కి గేట్ స్కోర్ కార్డు కలిగి ఉండాలి.
• మాస్టర్ ఆఫ్ మేనేజ్‌మెంట్(ఎం.ఎంజీటీ): ఈ కోర్సులో ప్రవేశాలు కోరుకునే అభ్యర్థులు బీఈ, బీటెక్, బీ.డిజైన్, బీఆర్క్‌లో డిగ్రీ పట్టాను పొంది ఉండాలి. ఆగస్టు 01, 2020 వరకు వ్యాలిడ్ స్కోర్‌తో గేట్, సీడ్ స్కోర్ కార్డు కలిగి ఉండాలి.

ఎంపిక ప్రక్రియ :

• ఐఐఎస్సీలో ప్రవేశాల కోసం కేవీపీవై-ఎస్‌ఏ(2018 ఫెలోషిప్‌లకు ఎంపికైనవారు), కేవీపీవై-ఎస్‌బీ (2019 ఫెలోషిప్‌లకు ఎంపికైనవారు), లేదా ఐఐటీ జేఈఈ-2020 మెయిన్స్-2020, జేఈఈ అడ్వాన్స్-2020లో 60శాతం మార్కుల సాధించిన వారు, నీట్-యూజీలో 60శాతం మార్కులు సాధించిన అభ్యర్థుల ర్యాంకుల ఆధారంగా ఎంపిక ప్రక్రియ నిర్వహిస్తారు.
• ఎంటెక్ కోర్సులో ప్రవేశాల కోసం అభ్యర్థులు గ్రాడ్యుయేట్ ఆప్టిట్యూట్ టెస్ట్(గేట్ 2018/ 2019/ 2020 సాధించిన స్కోర్‌ను పరిగణనలోకి తీసుకోని ఎంపిక చేస్తారు.
• ఎండిజైన్ కోర్సులకు ఎంపిక ప్రక్రియలో భాగంగా అభ్యర్థులు కామన్ ఎంట్రెన్స్ ఎగ్జామినేషన్ ఫర్ డిజైన్(సీడ్-2020)లో అర్హత సాధించిన వారై ఉండాలి.
• ఎంజీటీ(మాస్టర్ ఆఫ్ మేనేజ్‌మెంట్) ఎంపికకు సంబంధించి అభ్యర్థులు గేట్ 2018/ 2019/-2-0-20 సాధించిన స్కోర్‌ను లేదా క్యాట్, జీమ్యాట్-2020కి సంబంధించిన ఆగస్టు 01, 2020 వరకు వ్యాలిడ్ స్కోర్ కార్డ్ కలిగి ఉండాలి.

ఫీజు :

• ఐఐఎస్సీ యూజీకి దరఖాస్తు చేసుకునే జనరల్, ఓబీసీ అభ్యర్థులకు రూ.500. ఎస్సీ, ఎస్టీ, దివ్యాంగులు రూ.250లను ఫీజుగా చెల్లించాల్సి ఉంటుంది.
• ఐఐఎస్సీ పీజీకి దరఖాస్తు చేసుకునే జనరల్, ఓబీసీ అభ్యర్థులకు రూ.800. ఎస్సీ, ఎస్టీ, దివ్యాంగులు రూ.400లను ఫీజుగా చెల్లించాల్సి ఉంటుంది.

ముఖ్యమైన సమాచారం :
దరఖాస్తు విధానం: ఆన్‌లైన్‌లో దరఖాస్తు చేసుకోవాలి.
యూజీ కోర్సులకు దరఖాస్తు చివరి తేదీ: 30 ఏప్రిల్ 2020
పీజీ కోర్సులకు దరఖాస్తు చివరి తేదీ: 23 మార్చి 2020
పూర్తి వివరాలకు వెబ్‌సైట్: https://ug.iisc.ac.in