10th Class & Inter: హాల్‌టికెట్‌ ఇవ్వకుంటే చర్యలు

Sakshi Education

‘తమ పిల్లలను ఎలాగైనా మంచి చదువులు చదివించాలన్న లక్ష్యంతో ప్రైవేట్‌ కళాశాలలు, పాఠశాలల్లో ప్రవేశాలు తీసుకున్న విద్యార్థుల తల్లిదండ్రులు ఇబ్బందులు పడుతున్నారు.

ఎస్సెస్సీ, ఇంటర్మీడియట్‌ వార్షిక పరీక్షలు సమీపిస్తుండటంతో ప్రైవేట్‌ విద్యాసంస్థల నిర్వాహకులు ఫీజుల కోసం వేధింపులకు గురిచేస్తున్నారు. నిత్యం పిల్లల తల్లిదండ్రులకు ఫోన్లు చేయడంతోపాటు మెస్సేజ్‌లు పంపి, ఫీజులు కట్టాలని లేదంటే హాల్‌టికెట్‌ ఇవ్వబోమని తెగేసి చెబుతున్నారు.

ప్రైవేట్‌ యాజమాన్యాలు ఉన్నతాధికారుల ఆదేశాలను బేఖాతరు చేస్తున్నాయన్న ఆరోపణలున్నాయి. మానవత్వంతో ఆలోచించక విద్యార్థులను వెనక్కి పంపుతుండటంతో పరీక్షల సమయంలో వారు మానసిక వేదనకు గురవుతున్నారు. ఇంత జరుగుతున్నా విద్యాశాఖ అధికారులు చూసీచూడనట్లు ఉంటున్నారన్న విమర్శలు వ్యక్తమవుతున్నాయి.’

ఫీజుల పేరిట విద్యార్థులను, వారి తల్లిదండ్రులను వేధింపులకు గురిచేయడం తగదు. హాల్‌టికెట్‌ ఇవ్వకుంటే సంబంధిత కళాశాలలపై చర్యలు తీసుకుంటాం. మానవీయ కోణంలో ఆలోచించి, విద్యార్థులకు సహకరించాలి.
– జగన్మోహన్‌రెడ్డి, డీఐఈవో

అధికారులు పట్టించుకోవడం లేదు

ప్రైవేట్‌ యాజమాన్యాలు బరితెగించి ఫీజులు వసూలు చేస్తున్నాయి. అధికారులు మామూళ్లకు అలవాటుపడి, చర్యలు తీసుకోవడం లేదు. హాల్‌టికెట్లు ఇవ్వకుంటే ఊరుకోం. విద్యాసంస్థల తీరుపై డీఐఈవో, డీఈవో దృష్టిసారించాలి.
– మచ్చ రమేశ్‌, ఏఐఎస్‌ఎఫ్‌ జిల్లా ప్రధాన కార్యదర్శి

Published date : 26 Feb 2024 01:16PM