‘వర్క్ ఫ్రం హోమ్’తో ఐటీ కంపెనీలకు నిర్వహణవ్యయ ప్రయాసలు తగ్గాయ్: నైట్ ఫ్రాంక్ ఇండియా నివేదిక

ప్రధానంగా వ్యయ ప్రయాసలు తగ్గడం వారికి సానుకూలంగా ఉంది. మరోవైపు ఐటీ కంపెనీలు సైతం నిర్వహణ వ్యయం తగ్గుతోందని సంతృప్తి చెందుతున్నాయి. ప్రముఖ మార్కెట్ కన్సల్టెన్సీ నైట్ ఫ్రాంక్ ఇండియా తాజాగా దేశంలో 9 ప్రధాన నగరాల్లోని ఐటీ కంపెనీలు, ఉద్యోగులతో ‘వర్క్ ఫ్రం హోమ్’ విధానంపై సర్వే నిర్వహించింది. ఈ ఏడాది చివరి వరకూ ఇదే విధానాన్ని కొనసాగించాలన్న ఏకాభిప్రాయం దాదాపు వ్యక్తం కావడం గమనార్హం.

ఆ సర్వే నివేదికలోని ప్రధాన అంశాలు..

• ఒక్కో ఐటీ ఉద్యోగికి నెలకు సగటున రూ.5,520 ఖర్చు తగ్గింది. ప్రయాణ ఖర్చులు, ఆహారం, దుస్తుల ఖర్చు ప్రధానంగా తగ్గిందని ఉద్యోగులు చెప్పారు. ఇది సగటు ఐటీ ఉద్యోగి జీతంలో 17 శాతం.
• గతంలో ప్రతి ఐటీ ఉద్యోగి ఆఫీసుకు వెళ్లి వచ్చేందుకు రోజుకు సగటున గంటన్నర సమయం వెచ్చించాల్సి వచ్చేది. ప్రస్తుతం ఆ సమయం మిగులుతోంది.
• దాంతో పని గంటలు కూడా పెరుగుతున్నాయి. దీనివల్ల ఏడాదికి ఒక్కో ఉద్యోగి సగటున 44 గంటలు అదనంగా పనిచేయగలరని అంచనా వేశారు.
• కనీసం 100 మంది ఉద్యోగులు ఉన్న ఐటీ కంపెనీ ఏడాదికి 18 అదనపు రోజులు పని చేసినట్టు అవుతుంది.
• అందుకే 74 శాతం మంది ఐటీ ఉద్యోగులు ‘వర్క్ ఫ్రం హోమ్’ విధానానికే మొగ్గు చూపారు.
• ఇక 80 శాతం మంది ఉద్యోగులు కరోనా వైరస్ ముప్పు తొలగే వరకూ తాము ఉద్యోగం చేస్తున్న నగరాల నుంచి కాకుండా తమ స్వస్థలాలకు వెళ్లి అక్కడి నుంచి పనిచేయడానికి ఇష్టపడుతున్నారు.
• కాగా ఇంటర్నెట్ సమస్యలు మాత్రం ఐటీ ఉద్యోగులను వేధిస్తున్నాయి. 35 శాతం మంది ఇంటర్నెట్ తగినంత స్పీడ్ ఉండటం లేదని చెప్పారు.
• ఇక 47శాతం మంది తమ ఇళ్లల్లో పని వాతావరణం సరిగా లేదని కూడా చెప్పారు. ప్రధానంగా డెస్క్, సీటింగ్ సమస్యలు ఉన్నాయన్నారు.
• ఇంట్లో ఉండి పనిచేసేందుకు ప్రత్యేక ప్రదేశం, సరైన నెట్‌వర్క్ ఉంటే ‘వర్క్ ఫ్రం హోమ్’ విధానం పూర్తిస్థాయిలో విజయవంతం అవుతుందని 71శాతం మంది చెప్పారు.
• ఈ విధానంతో సగటున కార్యాలయాల నిర్వహణ వ్యయం 2 శాతం తగ్గిందని ఐటీ కంపెనీల యాజమాన్యాలు చెప్పాయి.
• చిన్న ఐటీ కంపెనీలకు 4.7 శాతం, మధ్యస్థాయి కంపెనీలకు 4.40 శాతం, పెద్ద కంపెనీలకు 3.60 శాతం నిర్వహణ వ్యయం తగ్గింది.