సమాధానాలు రాసేటప్పుడు తీసుకోవాల్సిన జాగ్రత్తలు, ప్రశ్నలోని పదాలను ఎలా ఆకళింపు చేసుకోవాలి? ఏ పదానికి ఎలా సమాధానం రాయాలి?

Explain, Enumerate, Analyse, Critically Analyse, Comment, Describe లాంటి పదాలు ప్రశ్నల్లో తరచూ కనిపిస్తాయి. ఈ పదాలు రాయబోయే సమాధానానికి దిక్సూచి లాంటివి. ఈ పదాల అర్థం సరిగ్గా ఆకళింపు చేసుకుంటేనే.. అభ్యర్థి సమాధానం సరైన దిశలో సాగుతుంది.

Describe అనే పదం అర్థం పరిశీలిస్తే.. తెలుగులో ‘వర్ణించటం’ దానికి సమానార్థకం. ఏదైనా విషయాన్ని వర్ణించమన్నప్పుడు చిన్న ప్పుడు బామ్మలు, తాతయ్యలు కథలను ఎలా వర్ణించి చెప్పేవారో? ఒక్కసారి మనం స్ఫురణకు తెచ్చుకోవాలి. ఈ వర్ణనలో పాటించాల్సిన క్రమాన్ని కూడా సమాధానం రాసేటప్పుడు దృష్టిలో ఉంచుకోవాల్సి ఉంటుంది. ఒక మనిషిని గురించి వర్ణించేటప్పుడు.. శిరస్సుతో ప్రారంభమై, పాదాలతో ముగుస్తుంది. అంటే.. ప్రాముఖ్యతా క్రమాన్ని తప్పకుండా వర్ణిస్తేనే.. వర్ణన రక్తికడుతుంది.

Analyse అంటే.. విశ్లేషించటం. విశ్లేషణలో ఆ విషయానికి సంబంధించిన ముఖ్యమైన అంశాలపై లోతైన పరిశీలన అవసరం. అలాగే critically Analyse అంటే... విమర్శనాత్మక దృక్పథంతో లోతైన అధ్యయనం కలిగిన సమాధానం రాయమని అర్థం. Analyse, critically Analyse కు తేడా ఏంటంటే... Analyse అన్నప్పుడు అభ్యర్థి తటస్థ విశ్లేషకుడిగా సమాధానం రాస్తే..critically Analyse అన్నప్పుడు విమర్శనాత్మక దృక్పథంతో కూడిన విశ్లేషణ రాయాల్సి ఉంటుంది.

Enumerate అంటే.. విషయానికి సంబంధించిన ముఖ్యమైన అంశాలను యధాతథంగా చెప్పటం. అలాగే Explain అంటే.. ముఖ్యాంశాలను యధాతథంగా చెప్పటమే కాక, వాటిని స్పష్టంగా వివరించటం అవసరం. అలాగే comment అన్నప్పుడు, విషయా నికి సంబంధించిన ముఖ్యమైన అంశాలను చెబుతూనే.. అభ్యర్థి తన అభిప్రాయాలను కూడా వ్యక్తం చేయాల్సి ఉంటుంది. అంటే.. ముఖ్య మైన అంశాలపై అభ్యర్థి వ్యాఖ్యాతగా వ్యవహరించాల్సి ఉంటుంది. క్లుప్తంగా చెప్పాలంటే... Describe అన్నప్పుడు కవి లాగా.. Analyse అన్నప్పుడు విషయాన్ని విశ్లేషించే అధ్యాపకుడిలా గానూ.. critically Analyse అన్నప్పుడు విమర్శనాత్మక పాత్రికే యుడిగా.. Enumerate అన్నప్పుడు వార్తల్లో ముఖ్యాంశాలు చదివే News Reader లాగాను.. Explain అన్నప్పుడు వివరాలతో సహా వార్తలను అందించే విలేఖరిలాగాను.. Discuss అన్నప్పుడు ఏదైనా ఒక విషయంపై జరిగే చర్చలో సంచాలకుడిగాను... Comment అన్నప్పుడు విషయాన్ని ప్రత్యక్షంగా పరిశీలిస్తూ, దానికి సంబంధించిన అన్ని అంశాలపై వ్యాఖ్యానించే వ్యాఖ్యాతగాను (ఉదాహరణ: టీవీల్లో చూసే ప్రత్యక్ష వ్యాఖ్యానాలు-విషయంపై వ్యాఖ్యాత అభిప్రాయాలు కూడా వ్యక్తమవుతుంటాయి) అభ్యర్థి వ్యవహరించాలి. News Reader కవిలా మారినా.. సంచాలకుడు వ్యాఖ్యాతగా మారినా.. పాత్రికేయుడు అధ్యాపకుడిగా మారినా... రక్తి కట్టకపోగా రసాభాసగా మారుతుంది.