సివిల్స్ ప్రిపరేషన్ ఎలా..?
సివిల్ సర్వీసెస్.. దేశంలో క్రేజీ సర్వీసులు ఐఏఎస్, ఐపీఎస్, ఐఎఫ్ఎస్ వంటి 24 కేంద్ర ప్రభుత్వ ఉద్యోగాల్లో అభ్యర్థుల ఎంపికకు ఏటా నిర్వహించే పరీక్ష! ‘కోవిడ్–19’ ప్రభావంతో మే నెలలో జరగాల్సిన సివిల్స్ ప్రిలిమ్స్–2020 అక్టోబర్ 4వ తేదీకి వాయిదా పడింది. పరీక్షలు వాయిదా పడినా.. ఈ సమయాన్ని సక్రమంగా ఉపయోగించుకోవాలని నిపుణులు సూచిస్తున్నారు. ప్రస్తుతం పరీక్షలకు 50 రోజుల వ్యవధి ఉన్నందున సరైన ప్రణాళికతో చదవాలని సలహా ఇస్తున్నారు. సివిల్స్ ప్రిలిమ్స్కు దరఖాస్తు చేసుకున్న అభ్యర్థులకు ప్రధానంగా ఎదురయ్యే సందేహాలకు నిపుణుల సమాధానాలు..
కొవిడ్ కారణంగా సివిల్స్ ప్రిలిమ్స్ పరీక్ష వాయిదా పడటంతో నా ప్రిపరేషన్ గందరగోళంలో పడింది. ఇప్పుడు మొదట చదివినంత శ్రద్ధ పెట్టలేకపోతున్నాను. ఇలాంటి పరిస్థితుల్లో ప్రిలిమ్స్ రాయాలా, లేక ఈ అటెంప్ట్ వాయిదా వేసుకోవాలా?
సివిల్స్ ప్రిలిమ్స్ పరీక్ష వాయిదా పడటం సీరియస్గా ప్రిపేర్ అవుతున్న చాలామంది అభ్యర్థులను కలవరపరిచింది. సివిల్స్ మాత్రమే కాదు.. పోటీ పరీక్షలు రాసే అందరిదీ ఇదే పరిస్థితి. కాబట్టి ఆందోళన చెందాల్సిన అవసరం లేదు. ఇంకా దాదాపు 50 రోజుల సమయం అందుబాటులో ఉంది. ఇప్పటికే చాలావరకు సిలబస్ పూర్తిచేసిన అభ్యర్థులు ఈ సమయాన్ని మరింతగా సద్వినియోగం చేసుకొని పరీక్షలు రాయడమే మంచిది.