దూరవిద్యలో విద్యార్థి కేంద్రిత విధానం తీసుకురావాలి

కాకతీయ యూనివర్సిటీ దూరవిద్య కేంద్రం, ఇండియన్ డిస్టెన్స్ ఎడ్యుకేషన్ అసోసియేషన్ (ఐడియా) సంయుక్త ఆధ్వర్యంలో ‘ఇంప్రూవ్‌‌డ యాక్సెస్ టు డిస్టెన్స్ హయ్యర్ ఎడ్యుకేషన్ ఫోకస్ ఆన్ అండర్‌సర్వ్‌డ్ కమ్యూనిటీస్ అండ్ అన్ కవర్డ్ రీజియన్స్’అంశంపై రెండు రోజుల అంతర్జాతీయ సదస్సు హన్మకొండలోని కేయూ క్యాంపస్‌లో ఆగస్టు 11న ప్రారంభమైంది. కె.నాగేశ్వర్ మాట్లాడుతూ.. విద్యార్థి కేంద్రిత విధానాన్ని కొనసాగించాల్సి ఉన్నప్పటికీ... దాన్ని ఆచరణలో పెట్టడం లేదన్నారు. దూరవిద్య సంస్థలకు న్యాక్ గుర్తింపు కోసం విధివిధానాలు రూపొందించేందుకు దేశవ్యాప్తంగా 7 సార్లు కార్యశాలలు నిర్వహించినట్లు తెలిపారు. ఇగ్నో ఆధ్వర్యంలో ఉత్తరాఖాండ్‌లో మారుమూల ప్రాంతాల వారికి కంప్యూటర్ ఎడ్యుకేషన్ కోర్సును ఫ్రీ ఆఫ్ కాస్ట్‌తో అవకాశం కల్పిస్తే ఒక సంవత్సరం 9 వేలమంది అడ్మిషన్లు రాగా.. మరో సంవత్సరం 18వేల మంది అడ్మిషన్లు పొంది చదువుకున్నారన్నారు. ఇలా తెలుగు లాంగ్వేజ్‌లో కూడా అడ్మిషన్లు చేపట్టవచ్చని సూచించారు. దూరవిద్య కోర్సుల సిలబస్, స్టడీమెటీరియల్‌ను ఎప్పటికప్పుడు అప్‌గ్రేడ్ చేయాల్సిన అవసరం ఉన్నప్పటికీ..అలా జరగడం లేదన్నారు. ఆధునిక టెక్నాలజీతో వెబ్‌సైట్‌ల ద్వారా కూడా సిలబస్, స్టడీమెటీరియల్‌ను విద్యార్థులకు అందుబాటులోకి తీసుకురావాలన్నారు. డాక్టర్ బీఆర్ అంబేద్కర్ ఓపెన్ యూనివర్సిటీ వీసీ ప్రొఫెసర్ కె.సీతారామారావు మాట్లాడుతూ.. యూనివర్సిటీలు చట్టబద్ధంగా ఏర్పడిన సంస్థలే.. అయితే వివిధ కోర్సుల నిర్వహణకు మళ్లీ రెగ్యులేటరీ బాడీస్ ద్వారా అనుమతులు తీసుకోవాలనేది సరికాదన్నారు. దేశంలో ఉన్నత విద్యలో 78శాతం ప్రైవేట్ రంగంలోనే కొనసాగుతుందని.. 22 శాతమే ప్రభుత్వ సెక్టార్‌లో ఉందని ఇండియన్ డిస్టెన్స్ ఎడ్యుకేషన్ అసోసియేషన్ అధ్యక్షుడు ప్రొఫెసర్ మురళీమనోహర్ చెప్పారు.