విద్యాసంస్థలకు.. న్యాక్ నూతన గ్రేడింగ్

యూనివర్సిటీ గ్రాంట్స్ కమిషన్ (యూజీసీ) ఆధ్వర్యంలో న్యాక్.. ప్రత్యేక విభాగంగా కార్యకలాపాలు నిర్వహిస్తోంది. యూజీసీ చట్టంలోని 2 (ఎఫ్), 12 (బి) క్లాజ్‌ల ప్రకారం ఏర్పాటైన విద్యా సంస్థలు న్యాక్ గుర్తింపు పొందడం వల్ల నిధుల సాధనలో ప్రత్యేక ప్రాధాన్యం పొందుతాయి. ముఖ్యంగా ఇటీవల కాలంలో దేశంలో భారీ సంఖ్యలో ప్రభుత్వ యూనివర్సిటీలు, డీమ్డ్ యూనివర్సిటీలు, ప్రైవేటు యూనివర్సిటీలు, అటానమస్ ఇన్‌స్టిట్యూట్‌లు ఏర్పాటవుతున్నాయి. వీటికి నిధులు మంజూరు చేయడంలో ఇబ్బందులు ఎదురవుతున్న సంఘటనలు ఎన్నో ఉన్నాయి. వీటిని దృష్టిలో ఉంచుకొని యూనివర్సిటీలు, ఇన్‌స్టిట్యూట్‌లకు వాటి పనితీరు, ఇతర ప్రమాణాలను పరిగణనలోకి తీసుకొని, గ్రేడ్‌లు ఇచ్చి వాటి ఆధారంగా నిధులు మంజూరుకు వీలుకల్పించేలా న్యాక్ గుర్తింపు, గ్రేడ్‌లు ఎంతో ఉపయోగపడుతున్నాయి.

న్యాక్ గుర్తింపు ప్రక్రియ
యూజీసీ, ఇతర కేంద్ర ప్రభుత్వ విభాగాల నుంచి నిధులు కోరుకునే విద్యా సంస్థలు న్యాక్ గుర్తింపు పొందేందుకు స్వయంగా దరఖాస్తు చేసుకోవాలి. ఇన్‌స్టిట్యూట్‌లోని మౌలిక సదుపాయాల నుంచి ఆర్ అండ్ డీ తీరుతెన్నుల వరకు అన్ని విషయాలనూ దరఖాస్తులో పొందుపరచాలి. ఈ దరఖాస్తులను పరిశీలించిన న్యాక్... ప్రత్యేకంగా నిపుణుల బృందాన్ని ఏర్పాటు చేసి, విద్యాసంస్థలో ప్రత్యక్ష తనిఖీలు నిర్వహిస్తుంది. అన్ని ప్రమాణాలను పరిశీలించి నిపుణుల బృందం.. న్యాక్ ఉన్నత వర్గాలకు నివేదిక అందజేస్తుంది. ఈ నివేదికలోనే ఇన్‌స్టిట్యూట్‌కు మంజూరు చేయగలిగే గ్రేడ్‌లను పేర్కొంటుంది.

ఇప్పటి వరకు ఉన్న గ్రేడింగ్ విధానం
న్యాక్.. ఇప్పటి వరకు ఇన్‌స్టిట్యూట్‌లకు నాలుగు రకాల (ఏ, బీ, సీ, డీ) హోదాల్లో గుర్తింపు ఇస్తోంది. దీనికోసం పరిగణనలోకి తీసుకుంటున్న అంశాలు...
కరిక్యులర్ సంబంధిత అంశాలు
టీచింగ్
లెర్నింగ్ వాల్యుయేషన్
రీసెర్చ్ కన్సల్టెన్సీ అండ్ ఎక్స్‌టెన్షన్
లెర్నింగ్ ఇన్‌ఫ్రాస్ట్రక్చర్
స్టూడెంట్ సపోర్ట్, ప్రోగ్రెషన్.
గవర్నెన్స్, లీడర్‌షిప్, మేనేజ్‌మెంట్
ఇన్నోవేషన్, బెస్ట్ ప్రాక్టీసెస్

ఈ అంశాలకు సంబంధించి గరిష్ట పాయింట్లు నిర్ణయిస్తుంది. ఇన్‌స్టిట్యూట్‌లోని వాస్తవ పరిస్థితుల ఆధారంగా క్యుమిలేటివ్ గ్రేడ్ పాయింట్ యావరేజ్ (సీజీపీఏ)గా క్రోడీకరించి గ్రేడ్‌లు ఇస్తుంది. ఒక్కో సీజీపీఏ శ్రేణికి ఒక్కో గ్రేడ్ ఇస్తుంది. వివరాలు..
సీజీపీఏ 3.01-4.00 మధ్యలో ఉంటే ఏ గ్రేడ్; 2.01-3.00 మధ్యలో ఉంటే బీ గ్రేడ్; 1.51-2.00 మధ్యలో ఉంటే సీ గ్రేడ్, 1.51 లోపు ఉంటే ‘డీ’ గ్రేడ్ మంజూరు చేస్తుంది.

కొత్త గ్రేడింగ్.. ఏడు రకాలు
కొత్తగా 2016, జూలై 1 నుంచి అమల్లోకి వచ్చిన గ్రేడింగ్ విధానంలో ఏడు రకాల గ్రేడ్‌లు ఉన్నాయి. అంతేకాకుండా ఇన్‌స్టి ట్యూట్‌లలోని సదుపాయాలు వాటికి ఇచ్చిన గరిష్ట వెయిటేజీ పాయింట్లలోనూ మార్పులు జరిగాయి.

సీజీపీఏ	గ్రేడ్	హోదా
3.76-4.00	ఎ++	అక్రెడిటెడ్
3.51-3.75	ఎ+	అక్రెడిటెడ్
3.01-3.50	ఎ	అక్రెడిటెడ్
2.76-3.00	బి++	అక్రెడిటెడ్
2.51-2.75	బి+	అక్రెడిటెడ్
2.01-2.50	బి	అక్రెడిటెడ్
1.51-2.00	సి	అక్రెడిటెడ్
1.50 లేదా అంతకంటే తక్కువ	డి	నాట్ అక్రెడిటెట్

విద్యాసంస్థల్లో ప్రమాణాలను మరింత పకడ్బందీగా అమలయ్యేలా చూసేందుకు, నిధుల మంజూరుకు పటిష్ట విధానాన్ని అనుసరించేందుకు కొత్త గ్రేడింగ్ విధానాన్ని తెచ్చినట్లు భావించొచ్చు. న్యాక్ గుర్తింపు కోసం ఇన్‌స్టిట్యూట్‌లే దరఖాస్తు చేసుకోవాల్సిన పరిస్థితి వల్ల చాలా సంస్థలు చొరవ చూపడం లేదు. యూజీసీ నిధుల మంజూరు పరంగా న్యాక్ గ్రేడ్‌ను తప్పనిసరి చేసినప్పటికీ కొన్ని ప్రభుత్వ యూనివర్సిటీలు సైతం దరఖాస్తు చేసుకోకపోవడం లేదా తదుపరి దశ దరఖాస్తుకు అనుమతి కోరడం వంటివి చేస్తున్నాయి. దీనివల్ల ఇన్‌స్టిట్యూట్‌లకే నష్టమని గుర్తించాలి. - ప్రొఫెసర్ వి.ఎస్.ప్రసాద్, న్యాక్ మాజీ డెరైక్టర్.