నీట్+ ఇంటర్ పరీక్షల... ప్రిపరేషన్ ఒక్కటే!

ప్రాక్టీస్‌తోనే టాప్ స్కోర్...
  నీట్ ప్రిపరేషన్ పరంగా పాఠ్యాంశాలను చదవడం ఎంత ముఖ్యమో.. నిరంతరం ప్రాక్టీస్ చేయడం కూడా అంతే ప్రధానం అని గుర్తించాలి. సరైన ప్రాక్టీస్ లేకుంటే.. చదివిన అంశాలు సైతం మర్చిపోయే ఆస్కారం ఉంటుంది. కాబట్టి ప్రాక్టీస్‌కు సంబంధించి కింది పద్ధతులను అనుసరించాలి. పాత నీట్ ప్రశ్నపత్రాలను సాధన చేయాలి. ప్రశ్నపత్రాల సాధనలో చేస్తున్న తప్పులను గుర్తించి విశ్లేషించుకోవాలి. కష్టసాధ్యంగా అనిపించే ప్రశ్నలను గుర్తించి.. వాటిని రివిజన్ సమయంలో తప్పనిసరిగా ప్రాక్టీస్ చేయాలి. సులభంగా ఉన్న ప్రశ్నలను సైతం రివిజన్ చేయాలి.

 ప్రామాణిక మెటీరియల్ : 
 నీట్‌కు ప్రిపేరయ్యే అభ్యర్థులు ప్రామాణిక మెటీరియల్ లేదా బుక్స్‌ను అనుసరించాలి. ఈ దిశగా ఫ్యాకల్టీ, నిపుణులు, సీనియర్లను సంప్రదించాలి. నీట్ పరీక్ష పూర్తిగా ఎన్‌సీఈఆర్‌టీ సిలబస్ చుట్టూ తిరుగుతుంది. కాబట్టి ఎన్‌సీఈఆర్‌టీ పుస్తకాలను చదవడం తప్పనిసరి. పుస్తకాల్లో ముఖ్యమైన అంశాలను గుర్తించాలి. వాటిని రివిజన్ సమయంలో ప్రత్యేకంగా చదవాలి. ప్రాక్టీస్ చేసేటప్పుడే ముఖ్య ప్రశ్నలను గుర్తించాలి.

 ఊహలొద్దు..
 నీట్ విజయంలో కచ్చితత్వం కీలకంగా నిలుస్తుంది. కాబట్టి తెలియని ప్రశ్నలకు సమాధానాలను ఊహించి రాసేందుకు ప్రయత్నించొద్దు. పరీక్షలో నెగిటివ్ మార్కింగ్ విధానం అమల్లో ఉంది. కాబట్టి ఊహించిన సమాధానం తప్పయితే ఒక మార్కు కోల్పోతారు. దానికంటే సదరు ప్రశ్నను ప్రయత్నించకపోవడమే ఉత్తమం.

 షార్ట్ నోట్స్ : 
 ప్రిపరేషన్ సమయంలో షార్ట్ నోట్స్ రూపొందించుకోవాలి. దీనివల్ల సమయం ఆదా అవడంతోపాటు ముఖ్య అంశాలపై ఏకాగ్రత నిలిపేందుకు అవకాశం లభిస్తుంది. నీట్ బయాలజీ ప్రిపరేషన్‌కు సంబంధించి ఫ్లోచార్ట్‌లు, డయాగ్రమ్స్, షార్ట్ కట్స్‌ను ఉపయోగించాలి.

 మాక్ టెస్టులు :
 మాక్ టెస్టులకు హాజరవ్వాలి. ఇలా చేయడం వల్ల ఆత్మవిశ్వాసం పెరగడంతోపాటు పరీక్ష పరంగా స్వీయ సామర్థ్యాలను ఎప్పటికప్పుడు అంచనా వేయొచ్చు. మాక్‌టెస్టులో చూపిన ప్రతిభ ఆధారంగా ప్రిపరేషన్ వ్యూహాలను మార్చుకోవాలి. బలహీనంగా ఉన్న అంశాలపై ప్రత్యేక దృష్టిపెట్టాలి. పరీక్షకు నెల రోజుల సమయం ఉందనగా కొత్త చాప్టర్లు, అంశాల జోలికి పోకూడదు. ఆ సమయంలో చదివిన అంశాలనే రివిజన్ చేస్తుండాలి.

 ఆరోగ్యమే మహాభాగ్యం :
 పరీక్షకు ప్రిపేరయ్యే అభ్యర్థులు శారీరక, మానసిక ఆరోగ్యాలపై దృష్టిపెట్టాలి. మంచి సమతుల ఆహారం తీసుకోవాలి. జంక్ ఫుడ్‌కి దూరంగా ఉండాలి. రోజూ వ్యాయామం చేయాలి. ఆరు నుంచి ఏడు గంటల పాటు తప్పనిసరిగా నిద్రపోవాలి. ప్రిపరేషన్ పరంగా సానుకూల దృక్పథం ప్రదర్శించాలి. తద్వారా సానుకూల ఫలితాలను పొందేందుకు అవకాశం ఉంటుంది. ఆత్మవిశ్వాసాన్ని అతి విశ్వాసంగా మారకుండా చూసుకోవాలి. కష్టపడి చదివితే విజయం దానంతట అదే వస్తుందని గుర్తించాలి.
 
 నీట్ యూజీ -2020 నోటిఫికేషన్ వివరాలు..
 నేషనల్ టెస్టింగ్ ఏజెన్సీ(ఎన్‌టీఏ)..నేషనల్ ఎలిజిబిలిటీ కమ్ ఎంట్రెన్స్ టెస్ట్(నీట్)-2020కు ఇటీవల నోటిఫికేషన్ విడుదల చేసింది. ప్రస్తుతం దరఖాస్తుల ప్రక్రియ కొనసాగుతోంది. దీనిద్వారా దేశవ్యాప్తంగా ఉన్న అన్ని వైద్య కళాశాలల్లోని అండర్ గ్రాడ్యుయేట్(యూజీ) మెడికల్ కోర్సులు ఎంబీబీఎస్/ బీడీఎస్‌ల్లో ప్రవేశం లభిస్తుంది. దీంతోపాటు వైద్య సంబంధిత కోర్సులైన బీఏఎంఎస్/బీఎస్‌ఎంఎస్/బీయూఎంఎస్/బీహెచ్‌ఎంఎస్‌ల్లోనూ ప్రవేశాలు కల్పిస్తారు.
 - నీట్‌లో బయాలజీ(బోటనీ, జువాలజీ), ఫిజిక్స్, కెమిస్ట్రీల నుంచి మొత్తం 180 ప్రశ్నలు అడుగుతారు. సాధారణంగా బోటనీ, జువాలజీల నుంచి 45 చొప్పున.. అలాగే ఫిజిక్స్, కెమిస్ట్రీల నుంచి 45 చొప్పున ప్రశ్నలు ఉంటాయి. ఒక్కో ప్రశ్నకు 4 మార్కులు కేటాయించారు. అంటే.. నీట్ పరీక్ష 180 ప్రశ్నలకు గాను మొత్తం 720 మార్కులకు జరుగుతుంది. నెగిటివ్ మార్కింగ్ విధానం అమల్లో ఉంది. ప్రతి తప్పు సమాధానానికి ఒక మార్కు కోత విధిస్తారు.
 
 అర్హత: 10+2/ఇంటర్మీడియెట్ బైపీసీ.
 వయసు: 17-25 ఏళ్ల మధ్య ఉండాలి.
 దరఖాస్తు విధానం: ఆన్‌లైన్‌లో దరఖాస్తు చేసుకోవాలి.
 దరఖాస్తులకు చివరితేది: 31.12.2019
 దరఖాస్తు ఫీజు: రూ.1500
 పరీక్ష తేది: 03.05.2019
 పూర్తి వివరాలకు వెబ్‌సైట్: www.ntaneet.nic.in