Joshua Cheptegei: ఒలింపిక్స్‌లో చెప్తెగాయ్‌కు స్వర్ణం.. నాలుగేళ్లుగా ఈయ‌న పేరిట ఉన్న ప్రపంచ రికార్డు!
ఆగ‌స్టు 3వ తేదీ జరిగిన ఫైనల్లో జోషువా 26 నిమిషాల 43.14 సెకన్లలో అందరికంటే వేగంగా 10,000 మీటర్లను పూర్తి చేసి అగ్రస్థానంలో నిలిచాడు. ఈ క్రమంలో కొత్త ఒలింపిక్ రికార్డును నమోదు చేయడంతోపాటు ‘పారిస్’ గేమ్స్‌లో ఉగాండాకు తొలి పసిడి పతకాన్ని అందించాడు.
ఒలింపిక్ రికార్డు: జోషువా 2008 బీజింగ్‌ ఒలింపిక్స్‌లో కెనెనిసా బెకెలె (ఇథియోపియా; 27ని:01.17 సెకన్లు) నెలకొల్పిన రికార్డును ‘పారిస్’లో బద్దలు కొట్టాడు.
ఉగాండాకు తొలి పసిడి: ఈ విజయంతో ఉగాండాకు పారిస్ గేమ్స్‌లో తొలి స్వర్ణ పతకం లభించింది.
అంతర్జాతీయ అనుభవం: జోషువా ఇంతకు ముందు టోక్యో ఒలింపిక్స్‌లో రజతం, గత మూడు ప్రపంచ చాంపియన్‌షిప్‌లలో 10,000 మీటర్ల విభాగంలో స్వర్ణ పతకాలు గెలుచుకున్నాడు.
ప్రపంచ రికార్డు: 2020 వాలెన్సియా మీట్‌లో జోషువా 10,000 మీటర్లను 26 నిమిషాల 11 సెకన్లలో పూర్తి చేసి ప్రపంచ రికార్డును నమోదు చేసుకున్నాడు. నాలుగేళ్లుగా ఈ ప్రపంచ రికార్డు చెప్తెగాయ్‌ పేరిటే ఉంది.