Elon Musk: భవిష్యత్తులో యుద్ధాలన్నీ డ్రోన్లతోనే.. ఎలాన్ మస్క్‌

ఎఫ్‌-35 వంటి ఆధునిక ఫైటర్‌ జెట్‌ల కంటే డ్రోన్‌ల వల్లే ఎక్కువ మేలు జరుగుతుందని మస్క్‌ అభిప్రాయపడ్డారు. ఈ మేరకు ఎక్స్‌(ట్విటర్‌)లో మస్క్‌ ఒక పోస్ట్‌ చేశారు. భవిష్యత్తులో యుద్ధాలన్నీ డ్రోన్‌లతోనే జరుగుతాయన్నారు.

యుద్ధాల్లో మానవ సహిత ఫైటర్‌ జెట్‌లు పైలట్‌లను చంపేస్తున్నప్పటికీ కొంతమంది ఎఫ్‌-35 వంటి మనుషులు నడిపే యుద్ధ విమానాలను తయారుచేస్తున్నారని విమర్శించారు. అయితే ఈ యుద్ధ విమానాలు ఆధునిక యుద్ధ అవసరాలకు అనుగుణంగా లేవని మస్క్‌ తెలిపారు. 

కాగా.. ఎఫ్‌-35 ఫైటర్‌ జెట్‌లు ప్రపంచంలోనే అత్యంత అధునాతన యుద్ధవిమానాలు. వీటిలో అధునాతన టెక్నాలజీతో కూడిన ఫీచర్లు, రాడార్‌ కంటపడకుండా ఉండే స్టెల్త్‌ వ్యవస్థలు ఉన్నాయి. అయితే వీటి ఖర్చు, నిర్వహణ భారం వల్ల కొన్ని సమస్యలు ఎదురవుతున్నాయి. ఈ నేపథ్యంలో ఎఫ్‌-35 ఫైటర్‌ జెట్‌లపై మస్క్‌ ట్వీట్‌ చర్చనీయాంశమవుతోంది.