బాలికల కోసం 20 శాతం సూపర్‌న్యూమరరీ సీట్లపెంపు

ఇంజనీరింగ్ విద్యపట్ల బాలికలు పెద్దగా ఆసక్తి చూపడం లేదని, బాలురతో పోల్చుకుంటే బాలికల సంఖ్య చాలా తక్కువగా ఉంటోందని గుర్తించిన కేంద్రం.. ఐఐటీల్లో వారి సంఖ్య పెంచేందుకు చర్యలు చేపట్టింది. నాలుగేళ్లలో కనీసం 20 శాతం మంది బాలికలకు అదనంగా సీట్లను ఇవ్వాలని 2017లో నిర్ణయించింది. అందుకనుగుణంగా చర్యలు చేపట్టింది. ఐఐటీ కౌన్సిల్ కూడా అదే విద్యా సంవత్సరం ప్రారంభానికి ముందే సీట్ల పెంపుపై నిర్ణయం తీసుకుంది. అయితే పలు ఐఐటీలు అప్పట్లో దీనిపై అభ్యంతరం వ్యక్తం చేశాయి. తగిన మౌలిక సదుపాయాలు లేకుండా సూపర్‌న్యూమరరీ సీట్లను సృష్టిస్తే నాణ్యతా ప్రమాణాలు దెబ్బతింటాయని ఆందోళన వెలిబుచ్చాయి. దీంతో ఆ ఒక్క సంవత్సరం మాత్రం సదుపాయాలు ఉన్న ఐఐటీల్లో బాలికల కోసం అదనంగా సీట్లను కేటాయించాలని కేంద్రం స్పష్టం చేసింది. ఆ ఏడాది నుంచి ఐఐటీలు సీట్లను క్రమంగా పెంచుతూ వస్తున్నాయి. వచ్చే విద్యా సంవత్సరంలో (2020-21) భారీగా సీట్ల పెంపునకు ఐఐటీ కౌన్సిల్ నిర్ణయం తీసుకుంది. ప్రస్తుతం ఐఐటీల్లో ఉన్న సీట్లకు అదనంగా 20 శాతం సీట్లను బాలికల కోసమే సూపర్‌న్యూమరరీగా సృష్టించి కేటాయించేందుకు చర్యలు చేపట్టింది.

మూడేళ్లలో సీట్ల పెరుగుదల ఇలా..
2016-17 విద్యా సంవత్సరంలో దేశంలోని ఐఐటీల్లో 10,435 సీట్లు ఉన్నాయి. కేంద్రం నిర్ణయంతో 2017-18లో ఆ సీట్ల సంఖ్య 10,957కు, 2018-19లో 11,326కు, 2019-20లో 13,376కు పెరిగింది. అయితే ఇందులో 2019-20 విద్యా సంవత్సరం నుంచి అమల్లోకి తెచ్చిన ఈడబ్ల్యూఎస్ కోటా కింద వెయి్య సీట్ల వరకు ఉన్నాయి. ఇవి మినహాయిస్తే గత మూడేళ్లలో బాలికల కోసమే ఐఐటీల్లో 1,941 సీట్లు అదనంగా వచ్చాయి. వచ్చే విద్యా సంవత్సరంలో 20 శాతం సీట్లను పెంచాలనే నిర్ణయంతో జూన్‌లో ప్రారంభమయ్యే ప్రవేశాల కౌన్సెలింగ్‌లో మరో 2,676 సీట్లు అందుబాటులోకి రానున్నాయి. దీంతో నాలుగేళ్లలో బాలికల కోసం అదనంగా పెంచిన సీట్ల సంఖ్య 4,600 దాటనుంది.

ఐఐటీలవారీగా మొత్తం సీట్ల వివరాలు..

ఐఐటీ	2018	2019	2020 (పెరిగే అంచనా)
భువనేశ్వర్	360	419	83
భిలాయ్	120	143	28
బాంబే	960	1,115	224
ఢిల్లీ	851	1,061	213
ధన్‌బాద్ (మైనింగ్)	912	952	191
ధార్వాడ్	120	137	27
గాంధీనగర్	211	212	42
గోవా	90	150	30
గౌహతి	645	785	157
హైదరాబాద్	285	317	64
ఇండోర్	260	294	59
జమ్మూ	150	213	43
జోధ్‌పూర్	240	352	71
కాన్పూర్	831	1,016	203
ఖరగ్‌పూర్	1,342	1,585	317
మద్రాసు	846	967	194
మండి	182	282	56
పాలక్కడ్	160	181	36
పట్నా	225	361	72
రూర్కీ	975	1,136	227
రోపర్	280	346	69
తిరుపతి	180	202	40
వారణాసి	1,071	1,149	230
మొత్తం	11,296	13,376	2,676