త్వరలో కాగ్నిజెంట్‌లో 23,000పైగా పోస్టుల్లో ఫ్రెషర్ల నియామకాలు

2020తో పోలిస్తే ఇది 35 శాతంపైగా ఎక్కువ అని సంస్థ సీఎండీ రాజేశ్ నంబియార్ తెలిపారు. భారత్‌లో సంస్థకు 2.04 లక్షల ఉద్యోగులు ఉన్నారు. అత్యంత ప్రతిభ కలిగిన ఇంజనీరింగ్, సైన్స్, మేనేజ్‌మెంట్ విద్యార్థులతోపాటు ఇతర నిపుణుల నియామకాలను దేశంలో పెద్ద ఎత్తున కొనసాగిస్తున్న సంస్థల్లో ఒకటిగా నిలుస్తామని ఆయన చెప్పారు. గతేడాది క్యాంపస్ రిక్రూట్‌మెంట్ల ద్వారా 17,000 మంది ఫ్రెష్ గ్రాడ్యుయేట్లను సంస్థలో చేర్చుకున్నట్టు వెల్లడించారు. నిపుణులను దక్కించుకోవడంలో కీలక కేంద్రాల్లో భారత్ ఒకటిగా ఉంటుందని అన్నారు. కంపెనీ చరిత్రలో తొలిసారిగా ఈ ఏడాది జనవరి-మార్చిలో పెద్ద ఎత్తున నియామకాలు ఉంటాయని వివరించారు. 18 నెలల్లో 1.3 లక్షల మంది ఉద్యోగులకు డిజిటల్ నైపుణ్యాలను కల్పించామన్నారు. కాగ్నిజెంట్‌లో గతేడాది 5,000 మంది ఇంటర్న్‌షిప్ పూర్తి చేశారు. 2020లో 10,000 మందికి అవకాశం కల్పించారు.