Skip to main content

జీ20-2020 సమావేశాలు

గ్రూప్ ఆఫ్ 20(జీ-20) దేశాల 15వ శిఖరాగ్ర సమావేశాలు సౌదీ అరేబియా నేతృత్వంలో 2020, నవంబర్ 21, 22వ తేదీలలో వర్చువల్ విధానంలో జరిగాయి.
షేడ్యూల్ ప్రకారం సౌదీ అరేబియా రాజధాని రియాద్లో ఈ సదస్సు జరగాలి... అయితే కోవిడ్-19 వైరస్ కారణంగా సదస్సును వర్చువల్ పద్ధతిలో నిర్వహించారు. ఈ సదస్సును తొలిసారి నిర్వహించిన అరబ్ దేశంగా.. సౌదీ అరెబియా నిలిచింది. సౌదీ రాజు సల్మాన్ బిన్ అబ్దులాజీజ్ అల్ సౌద్ సదస్సుకు నేతృత్వం వహించారు. 2023లో జరగనున్న జీ20 భేటీకి భారత్ ఆతిథ్యం ఇవ్వనుంది.

జీ20-2020 సదస్సు థీమ్: ‘‘రియలైజింగ్ ఆపర్చునిటీస్ ఆఫ్ ద ట్వెంటీ ఫస్ట్ (21st) సెంచరీ ఫర్ ఆల్’’

సదస్సులో మోదీ...
జీ20 సదస్సులో భారత ప్రధాని నరేంద్ర మోదీ నవంబర్ 21, 22వ తేదీలలో వర్చువల్ విధానంలో పాల్గొన్నారు. నవంబర్ 22న సేఫ్‌గార్డింగ్ ద ప్లానెట్: ద సర్క్యులర్ కార్బన్ ఎకానమీ అప్రోచ్ అనే అంశంపై ఆయన మాట్లాడారు.

మోదీ ప్రసంగం...
  • రెండో ప్రపంచ యుద్ధం తర్వాత ప్రపంచం ఎదుర్కొటున్న అతిపెద్ద సవాలు కరోనా వైరస్.
  • మొదటగా ఎక్కడినుంచైనా పని చేయడం (వర్క్ ఫ్రం ఎనీవేర్) ఇప్పుడు కొత్త విధానంగా మారింది.
  • జీ20 వర్చువల్ సెక్రటేరియట్‌ను ఏర్పాటు చేయాలి.
  • నాలుగు అంశాలపై ప్రపంచం దృష్టి సారించాలి. నైపుణ్యాలను భారీగా సృష్టించడం, సమాజంలోని అన్ని వర్గాల వారికి సాంకేతికత చేరేలా చూడటం, ప్రభుత్వ విధానాల్లో పాదర్శకత, పర్యావరణ పరిరక్షణ వంటి వాటిని అనుసరించాలి.
  • ప్రపంచాన్ని భయపెడుతున్న వాతావరణ మార్పులపై అరకొర పోరాటం సరిపోదు.
  • పారిస్ ఒప్పందంలోని లక్ష్యాల కంటే ఎక్కువే భారత్ సాధించింది.
  • భారత్‌లో ఉజ్వల పథకం కింద 8 కోట్ల కుటుంబాలకు పొగ రహిత వంటగదులు అందుబాటులోకి తీసుకొచ్చాం. ఇది ప్రపంచంలోనే అతిపెద్ద క్లీన్ ఎనర్జీ కార్యక్రమం.

జీ-20 గురించి...
జీ-20(గ్రూప్ ఆఫ్ 20) అనేది ప్రపంచంలోని 20 అతి పెద్ద ఆర్థిక వ్యవస్థల కూటమి. 1999లో ఆర్థిక మంత్రుల, కేంద్ర బ్యాంకుల గవర్నర్‌ల వేదికగా ఇది ఏర్పడింది. 2008లో ఏర్పడిన ఆర్థిక మాంద్యం తర్వాత ఇది దేశాధినేతల సదస్సుగా రూపాంతరం చెందింది. ఈ వేదికలో ప్రపంచ ఆర్థిక వ్యవస్థలోని ముఖ్యమైన అంశాలను చర్చిస్తారు. జీ-20లో 19 దేశాలు, యూరోపియన్ యూనియన్ (ఈయూ)కు సభ్యత్వం ఉంది. జీ-20 దేశాలు ప్రపంచంలో మూడింట రెండింతల జనాభా కలిగి ఉన్నాయి. ప్రపంచ జీడీపీలో 85 శాతం, ప్రపంచ వాణిజ్యంలో 80 శాతం వాటా ఈ దేశాలదే.

జీ-20 సభ్యదేశాలు...
  1. అర్జెంటీనా
  2. ఆస్ట్రేలియా
  3. బ్రెజిల్
  4. కెనడా
  5. చైనా
  6. ఫ్రాన్స్
  7. జర్మనీ
  8. భారత్
  9. ఇండోనేషియా
  10. ఇటలీ
  11. జపాన్
  12. మెక్సికో
  13. రష్యా
  14. సౌదీ అరేబియా
  15. దక్షిణ కొరియా
  16. దక్షిణాఫ్రికా
  17. టర్కీ
  18. యునెటైడ్ కింగ్‌డమ్
  19. యునెటైడ్ స్టేట్స్
  20. యూరోపియన్ యూనియన్
Published date : 24 Nov 2020 07:16PM

Photo Stories