టీఎస్ బీ-పాస్ బిల్లుకు తెలంగాణ శాసనసభ ఆమోదం

Sakshi Education

భవన నిర్మాణ అనుమతులను సరళీకృతం చేయడంతోపాటు పూర్తి పారదర్శకతకు వీలు కల్పించేలా రూపొందించిన ‘తెలంగాణ రాష్ట్ర భవన నిర్మాణ అనుమతులు, ఆమోద స్వీయ ధ్రువీకరణ విధానం(టీఎస్ బీ-పాస్)’ బిల్లుకు తెలంగాణ శాసనసభ సెప్టెంబర్ 14న ఆమోదం తెలిపింది.

అంతకుముందు పురపాలక మంత్రి కేటీఆర్ బిల్లును సభలో ప్రవేశపెట్టి దాని ప్రత్యేకతలను వివరించారు.

మంత్రి తెలిపిన వివరాల ప్రకారం...

టీఎస్ బీ-పాస్‌తో దళారుల పాత్ర లేని పూర్తి పారదర్శక పద్ధతి అందుబాటులోకి రానుంది.
ఆన్‌లైన్ ద్వారా దరఖాస్తు చేసిన 21 రోజుల్లోనే అన్ని అనుమతులు వచ్చేస్తాయి. ఏదైనా కారణంతో సకాలంలో అధికారులు అనుమతులు ఇవ్వని పక్షంలో 22వ రోజున అనుమతి వచ్చినట్టుగానే అప్రూవల్ పత్రం వస్తుంది.
75 గజాలలోపు స్థలం అయితే అసలు అనుమతులతో ప్రమేయమే లేదు. ఆన్‌లైన్ ద్వారా రిజిస్ట్రేషన్ చేసుకుంటే సరిపోతుంది. దేశంలో మరే రాష్ట్రంలో ఇలాంటి విధానం అందుబాటులో లేదు... కొన్ని విదేశీ నగరాల్లోనే ఇది అమలులో ఉంది.
ఈ చట్టం సరైన విధంగా అమలు జరిగేలా, లోటుపాట్లను గుర్తించేలా జిల్లా కలెక్టర్లు చైర్మన్‌లుగా జిల్లా స్థాయిలో మానిటరింగ్ సెల్‌లు పనిచేస్తాయి.

క్విక్ రివ్యూ :
ఏమిటి : తెలంగాణ రాష్ట్ర భవన నిర్మాణ అనుమతులు, ఆమోద స్వీయ ధ్రువీకరణ విధానం(టీఎస్ బీ-పాస్) బిల్లుకుఆమోదం
ఎప్పుడు : సెప్టెంబర్ 14
ఎవరు : తెలంగాణ శాసనసభ
ఎందుకు : భవన నిర్మాణ అనుమతులను సరళీకృతం చేయడంతోపాటు పూర్తి పారదర్శకతకు వీలు కల్పించేందుకు

Published date : 15 Sep 2020 05:36PM