ఫ్రెంచ్‌ ఓపెన్‌ పురుషుల సింగిల్స్‌ టైటిల్‌ విజేత ఎవరు?

ఫ్రాన్స్‌ రాజధాని పారిస్‌లో జూన్‌ 13న జరిగిన పురుషుల సింగిల్స్‌ ఫైనల్లో టాప్‌ సీడ్, ప్రపంచ నంబర్‌వన్‌ జొకోవిచ్‌ 4 గంటల 11 నిమిషాల్లో 6–7 (6/8), 2–6, 6–3, 6–2, 6–4తో ఐదో సీడ్‌ సిట్సిపాస్‌ (గ్రీస్‌)పై గెలిచి టైటిల్‌ కైవసం చేసుకున్నాడు. దీంతో జొకోవిచ్‌... తన కెరీర్‌లో రెండోసారి ఫ్రెంచ్‌ ఓపెన్‌ చాంపియన్‌గా నిలువడంతోపాటు 19వ గ్రాండ్‌స్లామ్‌ సింగిల్స్‌ టైటిల్‌ను హస్తగతం చేసుకున్నాడు. 2016లో తొలిసారి అతను ఈ టైటిల్‌ నెగ్గాడు. విజేత జొకోవిచ్‌కు 14 లక్షల యూరోలు (రూ. 12 కోట్ల 41 లక్షలు)... రన్నరప్‌ సిట్సిపాస్‌కు 7 లక్షల 50 వేల యూరోలు (రూ. 6 కోట్ల 65 లక్షలు) ప్రైజ్‌మనీగా లభించాయి.

విశేషాలు...

• పురుషుల టెన్నిస్‌లో ‘కెరీర్‌ గ్రాండ్‌స్లామ్‌’ (నాలుగు వేర్వేరు గ్రాండ్‌స్లామ్‌ టైటిల్స్‌ గెలవడం) ఘనతను రెండుసార్లు చొప్పున నమోదు చేసిన మూడో ప్లేయర్‌ జొకోవిచ్‌. గతంలో రాడ్‌ లేవర్‌ (ఆస్ట్రేలియా–1969), రాయ్‌ ఎమర్సన్‌ (ఆస్ట్రేలియా–1967) మాత్రమే ఈ ఘనత సాధించారు.
• జొకోవిచ్‌ నెగ్గిన గ్రాండ్‌స్లామ్‌ టైటిల్స్‌ (ఆస్ట్రేలియన్‌ ఓపెన్‌–9; ఫ్రెంచ్‌ ఓపెన్‌–2; వింబుల్డన్‌–5; యూఎస్‌ ఓపెన్‌–3). ఫెడరర్, రాఫెల్‌ నాదల్‌ (20 గ్రాండ్‌స్లామ్‌ టైటిల్స్‌తో) సంయుక్తంగా అగ్రస్థానంలో ఉన్నారు.

క్విక్‌ రివ్యూ :
ఏమిటి : ఫ్రెంచ్‌ ఓపెన్‌ పురుషుల సింగిల్స్‌ టైటిల్‌ విజేత ఎవరు?
ఎప్పుడు : జూన్‌ 13
ఎవరు : సెర్బియా టెన్నిస్‌ స్టార్‌ నోవాక్‌ జొకోవిచ్‌
ఎక్కడ : పారిస్, ఫ్రాన్స్‌