ఆసియా షూటింగ్‌లో భారత్‌కు రెండు స్వర్ణాలు

మార్చి 27న జరిగిన 10 మీటర్ల ఎయిర్ పిస్టల్ మిక్స్‌డ్ ఈవెంట్ ఫైనల్లో భారత్‌కి చెందిన మను భాకర్-సౌరభ్ చౌధరీ జంట 484.8 పాయింట్లు స్కోరు చేసి అగ్రస్థానాన్ని దక్కించుకోవడంతోపాటు స్వర్ణం సొంతం చేసుకుంది. ఈ ఈవెంట్‌లో హవాంగ్ సియోన్‌జెయున్-కిమ్ మోస్ (కొరియా-481.1 పాయింట్లు) జంట రజతం... వు చియా యింగ్-కు కువాన్ టింగ్ (చైనీస్ తైపీ-413.3 పాయింట్లు) జోడీ కాంస్యం గెల్చుకున్నాయి. క్వాలిఫయింగ్‌లో మను-సౌరభ్ జంట 784 పాయింట్లు స్కోరు చేసి కొత్త ప్రపంచ రికార్డు నెలకొల్పింది. గతంలో ఈ రికార్డు విటాలినా బత్సరష్‌కినా-అర్తెమ్ చెర్ముసోవ్ (రష్యా-782 పాయింట్లు) పేరిట ఉండేది.

మరోవైపు జూనియర్ మిక్స్‌డ్ 10 మీటర్ల ఎయిర్ పిస్టల్ విభాగంలో హైదరాబాద్ షూటర్ ఇషా సింగ్ తన భాగస్వామి విజయ్‌వీర్ సిద్ధూతో కలిసి స్వర్ణం సాధించింది. ఫైనల్లో ఇషా-విజయ్‌వీర్ ద్వయం 478.5 పాయింట్లు స్కోరు చేసి విజేతగా నిలిచింది.

క్విక్ రివ్యూ :
ఏమిటి : ఆసియా ఎయిర్‌గన్ షూటింగ్ చాంపియన్‌షిప్‌లో భారత్‌కు రెండు స్వర్ణాలు
ఎప్పుడు : మార్చి 27
ఎవరు : మను భాకర్-సౌరభ్ చౌధరీ జంట, ఇషా సింగ్-విజయ్‌వీర్ సిద్ధూ జంట
ఎక్కడ : చైనీస్ తైపీ