హెచ్‌ఈసీఐ విధి- విధానాలు...!

నిధుల మంజూరు అధికారం :
ఇప్పటిదాకా దేశంలో ఉన్నత విద్య ప్రమాణాల పెంపు, నిధుల మంజూరు అధికారాలు యూజీసీకి ఉన్నాయి. కానీ, హెచ్‌ఈసీఐ ముసాయిదా చట్టం ప్రకారం కమిషన్ కేవలం విద్యా (అకడమిక్) సంబంధ అంశాలకే పరిమితమవుతుంది. హెచ్‌ఈసీఐకి ఎలాంటి ఆర్థిక అధికారాలు ఉండవు. ఆయా యూనివర్సిటీలకు నిధుల మంజూరు, పంపిణీ, ఇతర ఆర్థిక అధికారాల అంశం ప్రభుత్వ పరిధిలో ఉంటుంది. అది కూడా పనితీరు ఆధారంగా నిధులు అనడాన్ని పలువురు వ్యతిరేకిస్తున్నారు. ఇప్పటికే పలు రాష్ట్రాల్లో యూనివర్సిటీల్లో నిధుల లేమి కారణంగా ఫ్యాకల్టీ కొరత, మౌలిక సదుపాయాల సమస్య, పరిశోధనల నత్తనడక వంటి సమస్యలు నెలకొన్నాయి. పనితీరు ఆధారిత నిధుల మంజూరు అనే నిబంధన కారణంగా.. ఇప్పటికే సమస్యలతో కొట్టుమిట్టాడుతున్న వర్సిటీలు, ఉన్నత విద్యా సంస్థలకు మరిన్ని ఇబ్బందులు ఎదురయ్యే ఆస్కారముందని నిపుణులు పేర్కొంటున్నారు.

స్వయం ప్రతిపత్తి :
హెచ్‌ఈసీఐ ముసాయిదా ప్రకారం ఉన్నత విద్యా సంస్థలకు స్వయం ప్రతిపత్తి ఇవ్వడంపై కమిషన్ దృష్టి పెడుతుందని పేర్కొనడం కూడా చర్చనీయాంశంగా మారింది. ఇన్‌స్టిట్యూట్స్‌కు అవసరానికి మించి స్వయం ప్రతిపత్తి ఇస్తే నిర్దిష్ట లక్ష్యాలు నెరవేరకపోగా.. స్వయం ప్రతిపత్తి పొందిన సంస్థలు తమ ఇష్టానుసారం వ్యవహరించే ప్రమాదముందనే వాదన వినిపిస్తోంది. ఇటీవల 62 విద్యా సంస్థలకు స్వయం ప్రతిపత్తి ఇవ్వడంపై నిరసన వ్యక్తమవడాన్ని పలువురు ఉదహరిస్తున్నారు. అయితే ఉన్నత విద్యా సంస్థలకు స్వయం ప్రతిపత్తి కల్పిస్తే.. విద్యా ప్రమాణాలు పెరిగే అవకాశామే ఎక్కువగా ఉంటుందని పలువురు పేర్కొంటున్నారు. ఇందుకు ఇప్పటికే స్వయం ప్రతి పత్తి ఉన్న సంస్థలు రాణిస్తున్న విషయాన్ని వారు చెబుతున్నారు.

పరిమిత పర్యవేక్షణ :
ప్రతిపాదిత హెచ్‌ఈసీఐకు ఉన్నత విద్యా సంస్థలపై పరిమిత పర్యవేక్షణ అధికారాలు మాత్రమే కల్పించనున్నారు. ఒకవైపు హెచ్‌ఈసీఐ 'ఏటా ఆయా ఇన్‌స్టిట్యూట్‌ల అకడమిక్ పనితీరును మూల్యాంకనం చేయాలి' అని ముసాయిదా చట్టంలో ప్రస్తావించారు. మరోవైపు 'లెస్ గవర్నమెంట్ అండ్ మోర్ గవర్నెన్స్' అని పేర్కొంటూ.. విద్యా సంస్థల నిర్వహణలో జోక్యం ఉండదని స్పష్టం చేశారు. దీంతో విద్యా సంస్థలు నిర్వహణపరంగా తమ ఇష్టానుసారం వ్యవహరించేందుకు ఆస్కారముందనే అభిప్రాయం వ్యక్తమవుతోంది. హెచ్‌ఈసీఐ ముసాయిదా చట్టం ప్రకారం ఇన్‌స్టిట్యూట్‌లలో తనిఖీలు నిర్వహించే విషయంలోనూ పరిమితులు విధించింది. ఆయా విద్యా సంస్థలే తమ వెబ్‌సైట్లలో నిర్వహణ, అకడమిక్ పరమైన అంశాలను అందరికీ అందుబాటులో ఉంచాలని పేర్కొంది. దీనివల్ల కొన్ని విద్యా సంస్థలు తప్పుదోవ పట్టించే విధంగా సమాచారం పొందుపరిచే ఆస్కారముందంటున్నారు.

కేంద్ర నిర్ణయమే 'ఫైనల్'..
విధుల పరంగా పూర్తిగా కేంద్ర ప్రభుత్వ మార్గదర్శకాల ప్రకారమే హెచ్‌ఈసీఐ నడుచుకోవాల్సిన పరిస్థితి ఏర్పడనుంది. హెచ్‌ఈసీఐకి, కేంద్ర ప్రభుత్వానికి మధ్య ఏదైనా అంశంలో బేధాభిప్రాయాలు నెలకొంటే.. కేంద్రం తీసుకునే నిర్ణయానికే కమిషన్ కట్టుబడాల్సి ఉంటుందని ముసాయిదా చట్టంలో పేర్కొన్నారు. కమిషన్ చైర్‌పర్సన్, వైస్ చైర్‌పర్సన్ సహా సభ్యులందరినీ ఎప్పుడైనా తొలగించే అధికారం కేంద్ర ప్రభుత్వానికి ఉంటుంది. మొత్తంగా హెచ్‌ఈసీఐ ముసాయిదా చట్టాన్ని పరిశీలిస్తే... ఉన్నత విద్యా రంగంలో ప్రభుత్వ ఆధిపత్యమే కొనసాగే ఆస్కారముందనే అభిప్రాయం వ్యక్తమవుతోంది.

ప్రతిపాదిత హెచ్‌ఈసీఐ స్వరూపం

ప్రైవేటుకు ఊతమిచ్చేలా..
 హెచ్‌ఈసీఐ ముసాయిదా చట్టం ప్రతిని పరిశీలిస్తే ప్రైవేటు సంస్థలకు ఊతమిచ్చే విధంగా వ్యవహరిస్తున్నారనిపిస్తోంది. అసలు యూజీసీని రద్దు చేయాలనే ఆలోచనే సరికాదు. ఒకవేళ యూజీసీ పనితీరు సరిగా లేదని భావిస్తే దాన్ని పటిష్టం చేసేలా చర్యలు తీసుకోవాలే తప్ప.. పూర్తిగా ఒక వ్యవస్థను రద్దు చేయడమనేది అసంబద్ధమైన చర్య. సలహా మండలి ఏర్పాటు, నిధుల మంజూరు అధికారం తమ వద్దే ఉంచుకోవడం వంటివి ఉన్నత విద్యలో తమ ఆధిపత్యాన్ని చూపించాలనుకోవడమే. దీనివల్ల భవిష్యత్తులో ఎన్నో ప్రతికూల ఫలితాలు ఎదురవుతాయి. - ప్రొఫెసర్ హరగోపాల్, ప్రముఖ విద్యావేత్త.
 
 అమలు చేయడంలో ఇబ్బందులు...
 హెచ్‌ఈసీఐ ఏర్పాటు చేసినప్పటికీ.. దీన్ని సమర్థమంతంగా అమలు చేయడంలో ఇబ్బందులు ఎదురయ్యే అవకాశముంది. ముఖ్యంగా సంస్థల పనితీరు ఆధారంగా నిధుల కోసం ప్రభుత్వానికి సిఫార్సు చేయడం, దాని ఆధారంగా ప్రభుత్వం నిధులు మంజూరు విషయంలో నిర్ణయం తీసుకోవడం వంటి ప్రతిపాదనల వల్ల కార్యకలాపాల్లో జాప్యం జరిగే ఆస్కారముంది. నిధుల మంజూరు విషయంలోనూ హెచ్‌ఈసీఐకే నేరుగా అధికారాలు ఇచ్చేలా చర్యలు తీసుకుంటే మంచిది.  
- డాక్టర్ డి.ఎన్.రెడ్డి, యూజీసీ మాజీ సభ్యులు.