AP Tenth Class Exams :పదో తరగతి విద్యార్థులకు ఎస్‌ఏ–1 మ్యాథ్స్‌ పరీక్ష వాయిదా...

తిరుపతి  : ఆరు నుంచి పదో తరగతి విద్యార్థులకు సోమవారం నిర్వహించాల్సిన ఎస్‌ఏ–1 మ్యాథ్స్‌ పరీక్ష 20వ తేదీకి వాయిదా పడింది. ఈ పరీక్షకు సంబంధించిన మ్యాథ్స్‌ ప్రశ్నపత్రం ఉదయాన్నే యూట్యూబ్‌లో ప్రత్యక్షం కావడంతో విద్యాశాఖాధికారులు ఖంగుతిన్నారు. వెంటనే ఈ పరీక్షను రాష్ట్ర వ్యాప్తంగా నిలుపుదల చేయాలంటూ పాఠశాల విద్యాశాఖ కమిషనర్‌ డీఈఓలకు ఉత్తర్వులు జారీచేశారు. పదో తరగతి పబ్లిక్‌ పరీక్ష తరహాలోనే ఈ ప్రశ్నపత్రాలను సమీప పోలీస్‌స్టేషన్లో భద్రపరిచి పరీక్ష సమాయానికి ముందు తెచ్చుకోవాలని ఆదేశించారు. దీంతో డీఈఓ కేవీఎన్‌.కుమార్‌ సూచనల మేరకు జిల్లా కామన్‌ ఎగ్జామినేషన్‌ బోర్డు కార్యదర్శి ఆర్‌.వంశీరాజ పర్యవేక్షణలో ఎంఈఓలు ప్రశ్నపత్రాలను పోలీస్‌ స్టేషన్లకు తరలించారు.