Question
Civils preparation: సివిల్‌ సర్వీసెస్‌ ప్రిలిమ్స్ సిలబస్, ప్రిపరేషన్ టిప్స్‌ చెప్పండి?
ప్రిలిమ్స్ సబ్జెక్టుల వారీగా
- చరిత్ర: ఆధునిక చరిత్ర; జాతీయోద్యమం;ప్రాచీన, మధ్యయుగ చరిత్రకు సంబంధించి సాహిత్యం, కళలు, మత ఉద్యమాలు, రాజకీయ–సామాజిక–ఆర్థిక చరిత్ర అంశాలు. ఆధునిక చరిత్రలో బ్రిటిష్‌ సామ్రాజ్య స్థాపన– పరిపాలన విధానాలు;బ్రిటిష్‌కు వ్యతిరేక తిరుగుబాట్లు–ఉద్యమాలు(ప్రధానంగా స్వాతంత్య్ర పోరాటం),సంస్కరణోద్యమాలపై దృష్టి పెట్టాలి.
పాలిటీ
- రాజ్యాంగం: రాజ్యాంగ పరిషత్, రాజ్యాంగ సవరణ ప్రక్రియ, పీఠిక, ఇప్పటివరకు జరిగిన ముఖ్య రాజ్యాంగ సవరణలు–వాటికి సంబంధించిన రాజ్యాంగ ప్రకరణలు.
- రాజకీయ వ్యవస్థ: పార్లమెంటరీ వ్యవస్థ, రిపబ్లికన్‌ ప్రభుత్వం, అర్థ సమాఖ్య, రాష్ట్రపతి, గవర్నర్, పార్లమెంట్, రాష్ట్ర శాసనసభలు, సుప్రీంకోర్టు, హైకోర్టు, ఎన్నికల కమిషన్, ఆర్థిక కమిషన్, పబ్లిక్‌ సర్వీస్‌ కమిషన్లు, అటార్నీ జనరల్, అడ్వకేట్‌ జనరల్ వాటికి సంబంధించి రాజ్యాంగ ప్రకరణలు.
- పంచాయతీరాజ్‌ వ్యవస్థ: బల్వంత్‌రాయ్, అశోక్‌మెహతా, హన్మంతరావ్, జి.వి.కె.రావ్, సింఘ్వీ కమిటీల సిఫార్సులు. 73వ రాజ్యాంగ సవరణ చట్టం.
- ప్రభుత్వ విధానం: విధాన రూపకల్పన ఎలా జరుగుతుంది? అందులో ప్రముఖ భాగస్వాములెవరు? విధానాల అమలు, వాటి సమీక్ష. ఇటీవల ప్రభుత్వం తీసుకున్న ముఖ్య విధానపర నిర్ణయాలు; కేంద్ర–రాష్ట్ర సంబంధాలు; ఇటీవల కాలంలో చర్చనీయాంశంగా మారిన అంశాలు.
ఎకానమీ
- ఆర్థికాభివృద్ధిలో సహజ వనరులు–మూలధన వనరుల పాత్ర; ఆర్థిక వ్యవస్థలో వివిధ రంగాల ప్రగతి(వ్యవసాయ రంగం, పారిశ్రామిక రంగం, సేవారంగం); ఆర్థిక సంస్కరణల నేపథ్యంలో.. దేశంలో ఆర్థిక–సాంఘికాభివృద్ధి; పారిశ్రామిక తీర్మానాలు–వ్యవసాయ విధానం; నీతి అయోగ్‌; బ్యాంకింగ్‌ రంగం, ప్రగతి–సంస్కరణలు; తాజా మానవాభివృద్ధి, ప్రపంచ అభివృద్ధి నివేదికలు; ఎకనామిక్‌ సర్వే, బడ్జెట్‌
సైన్స్‌ అండ్‌ టెక్నాలజీ
పరీక్షకు ముందు ఏడాది కాలంలో ఇస్రో ప్రయోగించిన ఉపగ్రహాలు; ఇటీవల కాలంలో సంభవిస్తున్న వ్యాధులు–కారకాలు; ఇన్ఫర్మేషన్‌ టెక్నాలజీ–అందుకు సంబంధించి ప్రభుత్వ పరంగా తీసుకుంటున్న చర్యలు; రక్షణ రంగంలో కొత్త మిస్సైల్స్‌ ప్రయోగాలు; ముఖ్యమైన ఘట్టాలు, సంఘటనలు; ఏడాది కాలంలో జరిగిన జాతీయ,అంతర్జాతీయ పరిణామాలు
టైమ్‌ మేనేజ్‌మెంట్‌ ముఖ్యం
- జూన్‌ 5న ప్రిలిమ్స్ జరుగుతున్న నేపథ్యంలో ఇప్పటి నుంచి ఏప్రిల్‌ రెండు లేదా మూడో వారం వరకు ప్రిలిమ్స్, మెయిన్స్‌ సబ్జెక్ట్‌లను అనుసంధానం చేసుకుంటూ చదవాలి.
- ఆ తర్వాత నుంచి ప్రిలిమ్స్ పరీక్ష తేదీ వరకూ పూర్తిగా ప్రిలిమ్స్ ప్రిపరేషన్, రివిజన్‌కు కేటాయించాలి.
- ఈ సమయంలో కనీసం మూడు మాక్‌ లేదా మోడల్‌ టెస్ట్‌లకు హాజరు కావడం ఉపయుక్తంగా ఉంటుంది.
- ప్రతి రోజు అన్ని సబ్జెక్ట్‌లను చదివే విధంగా సమయం విభజించుకోవాలి.
- ప్రతి చాప్టర్‌/యూనిట్‌ పూర్తయిన తర్వాత అందులోని ముఖ్యాంశాలతో సొంత నోట్స్‌ రూపొందించుకోవాలి.
- పరీక్ష తేదీకి నెల రోజుల ముందు నుంచి అంతకు ముందు ఏడాది వ్యవధిలో జరిగిన ముఖ్యమైన సమకాలీన అంశాలపై పట్టు సాధించాలి.
