విద్యా వసతుల విషయంలో పట్టణ, పల్లె ప్రాంతాల మధ్య భారీ వ్యత్యాసం: ఎన్‌ఎస్‌వోసర్వే

పాఠశాలలు వంటి మౌలిక వసతుల నుంచి.. ఆన్‌లైన్ తరగతుల నిర్వహణ నేపథ్యంలో కంప్యూటర్లు అందుబాటులో ఉండటం వరకూ అన్నిటిలోనూ భారీ వ్యత్యాసం కనిపిస్తోంది. ‘నేషనల్ స్టాటస్టికల్ ఆఫీస్’ (ఎన్‌ఎస్‌వో) నిర్వహించిన తాజా సర్వే ఈ అంశాలను సమగ్రంగా విశ్లేషించింది. దేశంలోని 8 వేల గ్రామాలు, 6 వేల పట్టణాల్లో 1.13 లక్షల కుటుంబాలను ఎన్‌ఎస్‌వో సర్వే చేసింది. వివిధ స్థాయిల్లో చదువుతున్న దాదాపు 1.52 లక్షల మంది విద్యార్థుల అభిప్రాయాలను క్రోఢీకరించింది.

సర్వే చెబుతోందిలా..

• దేశవ్యాప్తంగా పల్లె విద్యార్థుల్లో కేవలం 4 శాతం మందికి మాత్రమే కంప్యూటర్లు అందుబాటులో ఉండగా.. పట్టణాల్లో 23 శాతం మంది విద్యార్థులకు కంప్యూటర్లు అందుబాటులో ఉన్నాయి.
• పల్లెల్లో 15 శాతం జనాభాకు ఇంటర్నెట్ సౌకర్యం ఉండగా.. పట్టణాల్లో 42 శాతం జనాభాకు ఈ సౌకర్యం అందుబాటులో ఉంది.
• 15 ఏళ్ల నుంచి 29 ఏళ్లలోపు వారిలో పల్లెల్లో 24 శాతం మందికి మాత్రమే కంప్యూటర్ పరిజ్ఞానం ఉండగా.. పట్టణాల్లో 56 శాతం మందికి ఉంది.
• పల్లెల్లో 38 శాతం కుటుంబాలకు ప్రాథమికోన్నత పాఠశాలలు అందుబాటులో ఉన్నాయి. పట్టణాల్లో 70 శాతం కుటుంబాలకు అందుబాటులో ఉన్నాయి.
• 7 ఏళ్లు దాటిన వారిలో అక్షరాస్యత గ్రామీణ ప్రాంతాల్లో 73.50 శాతం కాగా.. పట్టణాల్లో 87.70 శాతంగా ఉంది.
• పాథమిక, ప్రాథమికోన్నత విద్య కోసం పల్లెల్లో 76.10 శాతం మంది ప్రభుత్వ పాఠశాలలకు వెళ్తున్నారు. పట్టణాల్లో 38 శాతం మంది మాత్రమే ప్రభుత్వ పాఠశాలల్లో చదువుతున్నారు.
• గాడ్యుయేషన్ స్థాయిలో 49.70 శాతం మంది పల్లెల్లోని ప్రభుత్వ విద్యా సంస్థల్లో చదువుతుండగా.. పట్టణాల్లో 41 శాతం మంది మాత్రమే ప్రభుత్వ విద్యా సంస్థల్లో చదువుతున్నారు.
• మాధ్యమిక విద్య కోసం పల్లె కుటుంబాలు ఒక్కో విద్యార్థిపై సగటున ఏడాదికి రూ.5,856 వెచ్చిస్తుండగా.. పట్టణాల్లో రూ.9,148 వెచ్చిస్తున్నారు.
• ఉన్నత విద్య కోసం పల్లెల్లో ఒక్కో విద్యార్థిపై సగటున ఏడాదికి రూ.17,518 ఖర్చు చేస్తుండగా.. పట్టణాల్లో రూ.23,832 ఖర్చు చేస్తున్నారు.