కాళేశ్వరం, భగీరథకు ప్రతిష్టాత్మక అవార్డు

సాగునీటి కల్పన లో జరుగుతున్న కృషి, పట్టణ తాగునీటి సరఫరాలో తీసుకుంటున్న చొరవకు సంబంధించి కాళేశ్వరం ప్రాజెక్టుతో పాటు మిషన్ భగీరథ పథకాలకు స్మార్ట్ వాటర్ అండ్ వేస్ట్ వరల్డ్ మ్యాగజైన్ (ఎస్‌డబ్ల్యూడబ్ల్యూడబ్ల్యూ) ఈ అవార్డులు ప్రకటించింది. పత్రిక సంపాదక వర్గం దేశవ్యాప్తంగా సాగునీరు, వ్యర్థ జలాల శుద్ధి, పట్టణ తాగునీటి సరఫరా సంబంధిత రంగాల్లో ప్రభుత్వ రంగంలోని మొత్తం 30 ప్రాజెక్టులను పరిశీలించింది. అనంతరం ఆయా రంగాల్లో అత్యుత్తమైనవిగా పరిగణించి 11 ప్రాజెక్టులను ఈ అవార్డుకు ఎంపిక చేయగా.. ఇందులో కాళేశ్వరం ప్రాజెక్టు, మిషన్ భగీరథ ఉన్నాయి.

ప్రాజెక్టు సీఈగా గర్వపడుతున్నా..
ఫిబ్రవరి 19 రాత్రి చెన్నైలో ఏర్పాటు చేసిన అవార్డుల ప్రదానోత్సవంలో కాళేశ్వరం ప్రాజెక్టు చీఫ్ ఇంజనీర్ నల్లా వెంకటేశ్వర్లు అవార్డును స్వీకరించారు. ఈ సందర్భంగా ఆయన మట్లాడుతూ.. కాళేశ్వరం ప్రాజెక్టుకు ఈ అవార్డు దక్కినందుకు ప్రాజెక్టు చీఫ్ ఇంజనీర్‌గా గర్వపడుతున్నానని చెప్పారు. ప్రాజెక్టును నిర్దేశిత కాలంలో పూర్తిచేసి ప్రాజెక్టు ప్రయోజనాలను ప్రజలకు అందిస్తామన్నారు. తెలంగాణ సీఎం కేసీఆర్ ప్రత్యక్ష పర్యవేక్షణలో ప్రాజెక్టు పనులు శరవేగంగా ముందుకు సాగుతున్నాయని, ఈ జూన్ నెలలోనే ప్రాజెక్టు నుంచి నీటిని ఎత్తిపోస్తామన్నారు. మిషన్ భగీరథ తరఫున అవార్డును ఈఈ రాజేశ్వరరావు స్వీకరించారు.

క్విక్ రివ్యూ :
ఏమిటి : కాళేశ్వరం, భగీరథకు ఎస్‌డబ్ల్యూడబ్ల్యూడబ్ల్యూ అవార్డులు
ఎప్పుడు : ఫిబ్రవరి 19
ఎక్కడ : చెన్నై
ఎవరు : నల్లా వెంకటేశ్వర్లు
ఎందుకు : సాగునీటి కల్పనలో జరుగుతున్న కృషికి