ఐఐటీల్లో కరోనా నిరోధ‌క ప‌రిక‌రాల త‌యారీ

ఇండియన్‌ ఇనిస్టిట్యూట్‌ ఆఫ్‌ టెక్నాలజీ (ఐఐటీ) సంస్థలు కరోనా వైరస్‌ను నిరోధించే పరికరాలను తయారు చేస్తూ అతి తక్కువ ఖర్చుతో ప్రజలకు అందుబాటులో ఉంచేలా చర్యలు చేపట్టాయి.

ఇన్ఫెక్షన్‌ ప్రూఫ్‌ ఫ్యాబ్రిక్స్‌

• ఆస్పత్రుల్లోని సిబ్బంది, రోగులకు ఇన్ఫెక్షన్‌ రాకుండా నిరోధించడానికి ‘ఇన్ఫెక్షన్‌ ప్రూఫ్‌ ఫ్యాబ్రిక్స్‌’ను కేంద్ర శాస్త్ర, సాంకేతిక శాఖ సహకారంతో ఢిల్లీ ఐఐటీ అభివృద్ధి చేసింది.
• అధునాతన టెక్స్‌టైల్‌ టెక్నాలజీ ద్వారా సాధారణ కాటన్‌ను ఇన్ఫెక్షన్‌ ప్రూఫ్‌గా మార్పు చేశారు. ఇది శక్తివంతమైన యాంటీ మైక్రోబయాల్‌గా మారి ఇన్ఫెక్షన్లను నిరోధిస్తుంది.

ఆటోమేటెడ్‌ స్ప్రేయర్‌ డ్రోన్‌

• రోడ్లు, పార్కులు, మైదానాలు, ఇతర ప్రాంతాల్లో మానవ రహితంగా శానిటైజర్‌ను స్ప్రే చేసేందుకు గౌహతిలోని ఐఐటీ విద్యార్థులు ఆటోమేటెడ్‌ స్ప్రేయర్‌ డ్రోన్‌ను అభివృద్ధి చేశారు.
• మొబైల్‌ ఫోన్‌తో నియంత్రించే డ్రోన్‌ .. 3 కిలోమీటర్ల పరిధిలో సిగ్నలింగ్‌ వ్యవస్థ ద్వారా ఇది పని చేస్తుంది.

రియల్‌ టైమ్‌ పీసీఆర్‌

• కరోనా వైరస్‌ను గుర్తించేందుకు రియల్‌ టైమ్‌ పాలిమరైజ్‌ చైన్‌ రియాక్షన్‌ (పీసీఆర్‌) యంత్రాలను ఐఐటీ గౌహతి రూపొందించింది.
• రోబో ఆధారిత స్క్రీనింగ్‌ యూనిట్లు, హైకెపాసిటీ ఆటోక్లేవ్‌ మెషిన్లు, టెంపరేచర్‌ మెజరింగ్‌ యూనిట్లు త‌యారు చేసింది.
• ఈశాన్య రాష్ట్రాల్లో కోవిడ్‌–19 నివారణకు ఐఐటీ గౌహతిలో పరిశోధన కేంద్రాన్ని ఏర్పాటు చేస్తున్నారు

తక్కువ ఖర్చుతో వెంటిలేటర్‌

• ఐఐటీ కాన్పూర్‌ తక్కువ ఖర్చుతో.. నాణ్యమైన వెంటిలేటర్‌ను అభివృద్ధి చేసింది. మార్కెట్లో రూ.4 లక్షలకు పైగా ఉండే వెంటిలేటర్‌ను దేశీయంగా లభించే పరికరాలు వినియోగించి రూ.70 వేలతోనే దీనిని రూపొందించింది.
• అవసరమైనప్పుడు ఆక్సిజన్‌ సిలిండర్‌ను అమర్చుకునే వీలు కూడా ఉన్న ఈ ప‌రిక‌రాన్ని మొబైల్‌కు అనుసంధానించి సమాచారాన్ని ఎప్పటికప్పుడు తెలుసుకోవచ్చు.

బ్యాగ్‌ వాల్వ్‌ మాస్క్‌ వెంటిలేటర్‌

• ఎక్కడికైనా తీసుకువెళ్లేందుకు వీలుగా ‘అంబు బ్యాగ్‌’ పేరుతో బ్యాగ్‌ వాల్వ్‌ మాస్క్‌ వెంటిలేటర్‌ను హైదరాబాద్‌ ఐఐటీ సిద్ధం చేసింది.
• అత్యవసర పరిస్థితుల్లో శ్వాసక్రియను కొనసాగింప చేయడానికి ఇది ఉపయోగపడుతుంది.