Sakshi Education

సాక్షి ఎడ్యుకేషన్: మహాత్మా జ్యోతిబా ఫూలే బీసీ ఓవర్సీస్‌ విద్యానిధి పథకంపై ఆశలు పెట్టుకున్న విద్యార్థులకు తలనొప్పిగా మారే పరిణామం చోటు చేసుకుంది. ప్రభుత్వం వేలు మంది విద్యార్థులకు అవకాశం కల్పిస్తామంటూ ఏడాదిన్నరుగా హామీ ఇచ్చినా, తాజాగా విడుదలైన అర్హుల తుది జాబితాలో కేవలం 300 మంది మాత్రమే ఎంపిక కావడం తీవ్ర ఆందోళనకు గురిచేస్తోంది.

Quota reduction for BCs in foreign education

ఎక్కువ కోటా హామీ.. తక్కువ ఎంపికలు

ఈ పథకం కింద రాష్ట్ర బీసీ సంక్షేమ శాఖ ప్రతి సంవత్సరం 300 మందిని మాత్రమే ఎంపిక చేస్తోంది. ఒక్కో విద్యార్థికి రూ.20 లక్షల వరకు పూర్తి సహాయం అందించే ఈ పథకాన్ని ఎప్పటినుంచో వెదజల్లాల్సిన అవసరం ఉన్నా, కోటా పెంపు ప్రతిపాదనలు ప్రభుత్వం వద్ద ఆగిపోయాయి. గతంలో వెయ్యిమందికి అవకాశం కల్పిస్తామని ప్రకటించిన అధికారులు.. తుది జాబితాను కోటా పెంపు ప్రక్రియ పూర్తికాకముందే విడుదల చేయడం విద్యార్థులను నిరాశకు గురి చేసింది.

విదేశాల్లో కోర్సులు చివరి దశలో...

2023 ఫాల్‌ సీజన్‌, 2024 స్ప్రింగ్‌ సీజన్‌లో 6,000 మందికి పైగా విద్యార్థులు దరఖాస్తు చేయగా, మెరిట్‌ జాబితాలో ముందున్న వారు విదేశీ పీజీ కోర్సుల్లో చేరిపోయారు. వారిలో చాలా మంది ఇప్పటికే కోర్సు ముగింపు దశకు చేరుకున్నారు. ఇప్పటికి కూడా ప్రభుత్వం తుది జాబితాలో కేవలం 300 మందినే ఎంపిక చేయడం వల్ల మిగతా అభ్యర్థుల ఆకాంక్షలకు నీళ్లు చల్లినట్టైంది.

చదవండి: ఇంటర్వ్యూ స్లాట్లు అదృశ్యం.. ఆ దేశం నుంచి స్పష్టత రాక ఆందోళన!

ఆర్థికంగా నష్టపోయిన కుటుంబాలు

విదేశాల్లో చదివేందుకు ఆశతో అప్పులు చేసి వెళ్లిన విద్యార్థుల తల్లిదండ్రులు తీవ్ర ఆవేదన వ్యక్తం చేస్తున్నారు. కనీసం ముందుగానే కోటా పెంపు లేదని తెలిస్తే, విదేశాలకు పంపే పరిస్థితి ఉండేది కాదని వాపోతున్నారు. సగటున ఒక్కో పీజీ విద్యార్థిపై రూ.30 లక్షలకి పైగా ఖర్చు అయినట్టు కుటుంబాలు చెబుతున్నాయి.