ఆరిలోవ: విశాఖ రేంజ్‌ పరిధిలో ఎస్‌ఐ ఉద్యోగాల నియామకాల కోసం బుధవారం నుంచి మహిళా అభ్యర్థులకు దేహదారుఢ్య పరీక్షలు నిర్వహించనున్నారు. కై లాసగిరి ఏఆర్‌ పోలీస్‌ మైదానంలో ఈ నెల 25 నుంచి పరీక్షలు జరుగుతున్న విషయం తెలిసిందే. మంగళవారం పురుష అభ్యర్థులకు పరీక్షలు చేశారు. రేంజ్‌ పోలీస్‌ అధికారులు 800 మంది అభ్యర్థులకు హాల్‌ టిక్కెట్లు పంపగా వారిలో 589 మంది హాజరయ్యారు. వారికి పరుగు, లాంగ్‌ జంప్‌, కొలతలు తీసి, సర్టిఫికెట్లు పరిశీలించారు. ఈ సందర్భంగా రేంజ్‌ డీఐజీ ఎస్‌.హరికృష్ణ మాట్లాడుతూ ఈ నెల 30 నుంచి సెప్టెంబరు 2 వరకు మహిళా అభ్యర్థులకు దేహదారుఢ్య పరీక్షలు నిర్వహించనున్నట్లు తెలిపారు. వారి కోసం ఇక్కడ ప్రత్యేకంగా ఏర్పాట్లు చేశామన్నారు. 2,745 మంది మహిళా అభ్యర్థులకు నాలుగు రోజులపాటు పరీక్షలు జరుపుతామన్నారు. పరీక్షలను డీఐజీతోపాటు అనకాపల్లి ఎస్పీ కె.వి.మురళీకృష్ణ తదితరులు పర్యవేక్షించారు.
