పీజీ నీట్- 2020 పరీక్షా ఫలితాలు విడుదల

పరీక్ష రాసిన వారి లో 55 శాతం మంది ఉత్తీర్ణులయ్యారు. దేశవ్యాప్తంగా 1,67,102 మంది నీట్ పీజీ రాసేందుకు దరఖాస్తు చేసుకోగా, అందులో 1,60,888 మంది పరీక్షకు హాజరయ్యారు. ఇందులో 89,549 మంది ఉత్తీర్ణులైనట్లు ఎన్‌బీఈ ప్రకటించింది. తెలంగాణ నుంచి దాదాపు 10 వేల మంది వరకు పరీక్ష రాసి ఉంటారని కాళోజీ హెల్త్ యూనివర్సిటీ వర్గాలు తెలిపాయి. అయితే ఎంతమంది తెలంగాణ నుంచి ఉత్తీర్ణులయ్యారన్న విషయం తమకు ఇంకా సమాచారం రాలేదని వెల్లడించాయి. దేశవ్యాప్తంగా 41 పట్టణాల్లో నీట్ పీజీ ప్రవేశ పరీక్షలు జరిగాయి. దేశంలోని మెడికల్ కాలేజీల్లో ఎండీ, ఎంఎస్, పీజీ డిప్లొమా కోర్సుల్లో ప్రవేశం కోసం ఈ పరీక్ష నిర్వహించారు. ఈ నెల 3వ తేదీ నాటికి ప్రతీ విద్యార్థి స్కోర్ కార్డును ఎన్‌బీఈ అప్‌లోడ్ చేస్తుంది. ఈ నెలలోనే ఆలిండియా స్థాయిలో పీజీ వైద్య విద్య ప్రవేశాలకు సంబంధించిన దరఖాస్తు ప్రక్రియ ప్రారంభమైతే, రాష్ట్రంలో మార్చి 15 నుంచి మొదలవుతుందని వర్గాలు పేర్కొన్నాయి. మొత్తం 1,200 మార్కులకు నీట్ పీజీ పరీక్ష నిర్వహించారు. అందులో జనరల్ /ఈడబ్ల్యూఎస్ అభ్యర్థులకు కట్-ఆఫ్ 366, జనరల్ పీహెచ్ అభ్యర్థులకు 342, ఓబీసీ/ఎస్సీ/ఎస్టీ అభ్యర్థులకు కట్ ఆఫ్ 319గా నిర్ధారించారు. అలాగే రాష్ట్రంలో ప్రభుత్వ, ప్రైవేట్ మెడికల్ కాలేజీల్లో 1,624 వరకు పీజీ వైద్య విద్య సీట్లున్నాయి. ఒక్క ప్రభుత్వ వైద్య విద్య కాలేజీల్లోనే 760 సీట్ల వరకు ఉన్నాయి. ఇటీవలే నిజామాబాద్ మెడికల్ కాలేజీకి 54 పీజీ సీట్లు వచ్చాయి. వాటిలో కూడా ఈ సంవత్సరం నుంచే ప్రవేశాలుంటాయని అధికారులు వెల్లడించారు. పరీక్షలో అడిగిన ఒక ప్రశ్న తప్పు అని తేలడంతో అభ్యర్థులందరికీ ఆ ప్రశ్నకు పూర్తి మార్కులు లభించాయి. ఆ ప్రశ్నకు సమాధానం రాసినా, రాయకపోయినా అభ్యర్థులందరికీ పూర్తి మార్కులు ఇచ్చినట్లు ఎన్‌బీఈ ప్రకటించింది.