ఈసారి డిగ్రీ కోర్సుల ప్రవేశాల్లో భారీగా పెరుగుదల.. ఎందుకంటే..

గతంలో డిగ్రీ తదితర నాన్ ప్రొఫెషనల్‌ కోర్సుల్లో బాలుర శాతంతో పోలిస్తే బాలికల చేరికలు 25 నుంచి 30 శాతం వరకు మాత్రమే ఉండేవి. కానీ, ఇప్పుడు దాదాపు 50 శాతానికి చేరువయ్యాయి. ప్రైవేటు కాలేజీల చుట్టూ సీట్ల కోసం తిరగాల్సి రావడం, తమకు సమీపంలోని కాలేజీల్లో నచ్చిన కోర్సులో సీటు రాని పరిస్థితుల్లో సుదూర ప్రాంతాల్లో చదవలేక చాలామంది బాలికలు డిగ్రీ కోర్సుల్లో చేరలేని పరిస్థితి నిన్న మొన్నటి వరకు ఉండేది. దీనికితోడు మహిళలకు 33.5 శాతం సీట్లు కేటాయించాల్సి ఉన్నా యాజమాన్యాలు వాటిని అమలుచేయకపోవడం కూడా బాలికల చదువులకు ఆటంకంగా ఉండేది. కానీ, ఈ ఏడాది సీఎం వైఎస్‌ జగన్ సర్కారు తీసుకున్న ఆన్‌లైన్ అడ్మిషన్ల విధానంతో బాలికలకు ఆ ఇక్కట్లు తప్పాయి. కాలేజీల్లో చేరికలు పెరిగేందుకూ దోహదం చేసింది.

ఓఏఎండీసీ ద్వారా సీట్ల భర్తీ
ప్రభుత్వ, ఎయిడెడ్, ప్రైవేటు కాలేజీలన్నింటిలోని సీట్లను ఉన్నత విద్యామండలి ఆంధ్రప్రదేశ్‌ సెంటర్‌ ఫర్‌ ఫైనాన్షియల్‌ సిస్టమ్‌ అండ్‌ సర్వీసెస్‌ (ఏపీసీఎఫ్‌ఎస్‌ఎస్‌) సహకారంతో ‘ఆన్‌లైన్ అడ్మిషన్ మాడ్యూల్‌ ఫర్‌ డిగ్రీ కాలేజెస్‌’ (ఓఏఎండీసీ) ద్వారా భర్తీ చేయించింది. విద్యార్థులు ఆన్‌లైన్ లో దరఖాస్తు చేసుకుంటే వారికి ఆన్‌లైన్ ద్వారానే సీట్లు కేటాయించారు. అన్ని కాలేజీల్లోనూ 33.5 శాతం సీట్లను బాలికలతో భర్తీచేయడంవల్ల వారు కాలేజీల చుట్టూ తిరగకుండానే సీట్లు దక్కించుకోగలిగారు. పది యూనివర్సిటీల పరిధిలోని అన్ని కాలేజీల్లో ఫస్టియర్‌ ఆన్‌లైన్ అడ్మిషన్లలో బాలురు 1,35,724 మంది చేరగా, బాలికలు 1,25,659 మంది ఉన్నారు. ఇదిలా ఉంటే.. బాలికల్లో ఎక్కువ శాతం మంది బీఎస్సీ కోర్సు వైపు మొగ్గు చూపారు. బాలురకన్నా బాలికలే ఈ కోర్సుల్లో ఎక్కువమంది ఉన్నారు. బీఎస్సీ ఫస్టియర్‌ అడ్మిషన్లలో బాలికలు 71,554 మంది ఉండగా.. బాలురు 58,949 మంది ఉన్నారు.

ప్రైవేటు అక్రమాలకు చెక్‌
గతంలో ఆన్‌లైన్ అడ్మిషన్లు లేని సమయంలో ఫీజు రీయింబర్స్‌మెంటు నిధుల కోసం ప్రైవేటు డిగ్రీ కాలేజీల యాజమాన్యాలు చేరికలు పెంచుకునేందుకు అక్రమాలకు పాల్పడేవి. ప్రభుత్వ కాలేజీల్లో విద్యార్థులు చేరకుండా తమ కాలేజీల్లో చేరేలా ప్రలోభాలకు గురిచేసేవి. కానీ, ఈ ఏడాది ఆన్‌లైన్ అడ్మిషన్ల విధానం ద్వారా సీట్ల భర్తీ చేపట్టడంతో కాలేజీ యాజమాన్యాలకు ఇందులో ఎలాంటి పాత్ర లేకుండాపోయింది. అలాగే, వారి ఒత్తిళ్ల ప్రభావం కూడా విద్యార్థులపై పడలేదనే చెప్పాలి. దీంతో ప్రభుత్వ కాలేజీల్లో సీట్ల భర్తీ గతంలో కన్నా ఈసారి రెట్టింపుయ్యింది. గతంలో 50 వేలలోపే ప్రభుత్వ, ఎయిడెడ్, వర్సిటీ కాలేజీల్లో సీట్లు భర్తీ అయ్యేవి. ఈసారి 80,662 సీట్లు భర్తీ అయ్యాయి. ప్రైవేటు కాలేజీల్లో 1,80,721 సీట్లు భర్తీ చేశారు.

వర్సిటీ	బీఎస్సీ		బీ.కాం		బీఏ		ఇతర కోర్సులు
	బాలురు	బాలికలు	బాలురు	బాలికలు	బాలురు	బాలికలు	బాలురు	బాలికలు
నాగార్జున	8,948	10,307	8,248	4,993	1,796	1,146	789	495
నన్నయ	10,313	13,855	7,022	5,511	2,685	2,132	1,959	1,587
ఆంధ్రా	12,386	12,841	3,861	3,637	2,519	1,981	1,411	1,020
బీఆర్‌ అంబేద్కర్‌	5,178	6,384	1,542	1,435	1,692	1,570	151	157
కృష్ణా	3,899	4,964	3,912	3,458	862	603	673	365
రాయలసీమ	4,350	5,804	4,913	2,815	2,741	1,689	601	326
శ్రీకృష్ణదేవరాయ	3,875	4,938	5,256	3,790	2,000	1,038	903	527
శ్రీవెంకటేశ్వర	4,843	5,331	8,590	5,609	1,215	766	1,580	979
విక్రమసింహపురి	2,215	3,433	2,820	1,922	600	416	1,405	715
యోగివేమన	2,942	3,697	3,847	2,644	849	690	333	89
మొత్తం	58,949	71,554	50,011	35,814	16,959	12,031	9,805	6,260