ఆర్టిజన్ల పదవీ విరమణ వయస్సు 58 ఏళ్ల నుంచి 61 ఏళ్లకు పొడిగింపు

2021 మే 1 నుంచి ఆర్టిజన్లకు పర్సనల్‌ పే ఆధారంగా డీఏ, హెచ్‌ఆర్‌ఏ చెల్లిస్తామని వెల్లడించింది. కార్మిక శాఖ కమిషనర్‌ నైపుణ్యం లేని శ్రామికుల కోసం నిర్దేశించిన కనీస వేతనాన్ని (జీతం+డీఏ+ఈపీఎఫ్‌+ఈఎస్‌) టీఎస్‌ ఎన్పీడీసీఎల్‌లోని అన్‌మ్యాన్డ్‌ ఉద్యోగులకు వర్తింపుజేస్తామని తెలియజేసింది. తెలంగాణ ఎలక్ట్రిసిటీ ఎంప్లాయీస్‌ 1104 యూనియన్‌తో ఇటీవల జరిగిన చర్చల సందర్భంగా తీసుకున్న నిర్ణయాలను ప్రకటిస్తూ ట్రాన్స్‌కో జేఎండీ సి.శ్రీనివాసరావు బుధవారం యూనియన్‌కు లేఖ రాశారు.

ఇతర నిర్ణయాలు ఇలా ఉన్నాయి.

•  ఆర్టిజన్‌ గ్రేడ్‌–1 కోసం కొత్తగా సెలక్షన్‌ గ్రేడ్‌ పే–స్కేల్‌ ఖరారు చేస్తాం
•  క్షేత్రస్థాయిలో పనిచేస్తూ టూర్లకు వెళ్లే ఆర్టిజన్లకు టీఏ, డీఏ సదుపాయం
•  వాచ్‌మన్‌, ఆఫీస్‌ సబార్డినేట్‌ వంటి పోస్టుల నుంచి జేఎల్‌ఎంగా కన్వర్షన్‌/అపాయింట్‌మెంట్‌ అయినవారికి, కారుణ్య నియామకాల కింద నియమితులైన జేఎల్‌ఎంలకు స్తంభం ఎక్కే పరీక్ష నుంచి ఒకసారి మినహాయింపు
•  గ్రేడ్‌–4 మహిళా ఆర్టిజన్లకు సైతం నిబంధనల ప్రకారం ప్రసూతి సెలవులు
•  కోవిడ్‌–19 బారిన పడిన ఆర్టిజన్లకు 15 రోజుల ప్రత్యేక సెలవు
•  1104, టీఆర్‌వీకేఎస్, 1535 యూనియన్‌ నేత లకు ఫుల్‌టైం పర్మిషన్‌ (విధుల నుంచి మినహాయింపు). పురుష ఆర్టిజన్లకు పెటర్నిటీ సెలవు
•  అన్ని విద్యుత్‌ సంస్థల్లో అవసరం మేరకు ఫోర్‌మన్‌ గ్రేడ్‌–1 పోస్టుల సృష్టి
•  2020 సెప్టెంబర్‌ 1 నుంచి ఆర్టిజన్లందరికీ వార్షిక గ్రేడ్‌ ఇంక్రిమెంట్లు
•  సర్కిల్‌ నుంచి సర్కిల్‌కు, డివిజన్‌ నుంచి డివిజన్‌కు, ఒక విద్యుదుత్పత్తి కేంద్రం నుంచి మరో విద్యుదుత్పత్తి కేంద్రానికి ఆర్టిజన్ల పరస్పర బదిలీలు
•  ఇతర ఉద్యోగులతో సమానంగా ఆర్టిజన్లకు గ్రూప్‌ ఇన్సూరెన్స్‌ సదుపాయం
•  విద్యుదుత్పత్తి కేంద్రాల్లో పనిచేసే ఆర్టిజన్లకు లభ్యతను బట్టి క్వార్టర్లు
•  అన్ని విద్యుత్‌ సంస్థల్లోని ఓఅండ్‌ఎం ఉద్యోగులకు ఎల్డీసీ/జూనియర్‌ అసిస్టెంట్‌గా పదోన్నతి కల్పించడానికి ప్రతి ఏటా ఒకసారి స్క్రీనింగ్‌ పరీక్ష
•  ప్రభుత్వం నిర్ణయించిన రేట్ల ఆధారంగా డయాలసిస్‌ చేయించుకునే ఉద్యోగుల వైద్య ఖర్చులను విద్యుత్‌ సంస్థలు చెల్లిస్తాయి
•  ట్రాన్స్‌కోలో అవసరాల మేరకు ఫోర్‌మన్‌–1, ఫోర్‌మన్‌–2 పోస్టుల సృష్టి
•  గ్రేడ్ల వారీగా ఆర్టిజన్ల సీనియారిటీ జాబితాల తయారీ. ఆర్టిజన్ల సర్వీసు రిజిస్టర్ల నిర్వహణను సత్వరంగా ప్రారంభిస్తారు
•  5 ఏళ్ల సర్వీసు పూర్తికాక ముందే మరణించిన ఆర్టిజన్ల కుటుంబాలకు నిబంధనల మేరకు గ్రాట్యుటీ చెల్లింపు
•  డిస్కంలలోని ప్రతి ఆపరేషన్‌ సెక్షన్‌లో డివిజన్‌ యూనిట్‌గా 2 లైన్‌ ఇన్‌స్పెక్టర్‌ పోస్టుల సృష్టి
•  విద్యుత్‌ ఉద్యోగుల తదుపరి పీఆర్సీ కమిటీకి సింగిల్‌ మాస్టర్‌ స్కేల్‌ను రూపొందించే బాధ్యతలు అప్పగింత