Sakshi Education

సాక్షి, అమరావతి: కరోనా, లాక్‌డౌన్‌తో ఒడిదుడుకులు ఎదుర్కొంటున్న విద్యారంగాన్ని గాడిలో పెట్టేందుకు ఆంధ్రప్రదేశ్ ప్రభుత్వం జాగ్రత్తలు తీసుకుంటోంది.

2020-21 విద్యాసంవత్సరానికి సంబంధించి స్కూళ్లను ఆగస్టు 3నుంచి ప్రారంభించాలని సీఎం వైఎస్ జగన్ ఆదేశించిన నేపథ్యంలో విద్యాశాఖ ప్రణాళికలు సిద్ధం చేసింది. పాఠశాల విద్యాశాఖ కమిషనర్ చినవీరభద్రుడు దీనిపై ఇప్పటికే ప్రభుత్వానికి ప్రతిపాదనలు పంపారు.

వీటిలో ముఖ్యమైనవి ఇవీ..

స్కూళ్లు పునఃప్రారంభించేందుకు స్టాండర్డ్ ఆపరేటింగ్ ప్రొసీజర్’ అనుసరించాలి. కోవిడ్-19 ప్రభావం పిల్లల మానసిక, శారీరక పరిస్థితిపై పడకుండా జాగ్రత్తపడాలి.
స్కూళ్ల ప్రధాన గేట్ మొదలుకొని అన్నిటిని పూర్తిగా డిస్ ఇన్‌ఫెక్ట్ చేయాలి.
విద్యార్థులు లోపలకు వచ్చేముందు శారీరక ఉష్ణోగ్రత పరిశీలించాలి.
ప్రవేశ ప్రదేశంలోనే ప్రతి 30 మంది విద్యార్థులకు చేతులు శుభ్రం చేసుకొనేందుకు రెండు ఆటోమేటెడ్ హేండ్ వాష్ కేంద్రాలుపెట్టాలి.
విద్యార్థులు, టీచర్లకు వాష్‌బుల్ మాస్కులు అందించాలి.హేండ్ కర్చీఫ్‌లు తప్పనిసరి.
మధ్యాహ్న భోజనం కార్యక్రమంలో పాల్గొనే టీచర్లు, సిబ్బంది మాస్కులు, గ్లౌజ్‌లను వాడటం తప్పనిసరి.
ఉదయం ఆరు బయట అసెంబ్లీని రద్దుచేసి తరగతి గదుల్లో స్పీకర్ల ద్వారా నిర్వహించాలి.
30 మంది మాత్రమే ఉండే స్కూళ్లలో గదికి 15 మంది చొప్పున ఉదయం 8 నుంచి 12 వరకే తరగతులు నిర్వహించాలి.
తరగతికి 30 మందికన్నా ఎక్కువ మంది విద్యార్థులుంటే ఉదయం 8 నుంచి 12.30 వరకు ఒక షిఫ్టు, ఆ తరువాత 12.30 నుంచి 4.30 వరకు రెండో షిఫ్టు నిర్వహించాలి.
50 నుంచి 100 మంది ఉంటే రెండు బ్యాచ్‌లుగా రోజు విడిచి రోజు స్కూలు నడపాలి.
ఇంటిదగ్గర అభ్యసించేందుకు వర్కుబుక్‌లు అందించాలి.
నీరు తాగేందుకు, భోజనానికి 10 మంది చొప్పున క్యూలో వెళ్లేలా గంట మోగించాలి.
ప్రతి రోజూ కరోనా జాగ్రత్తలపై విద్యార్థులకు 15 నిమిషాలు వివరించి వారి సమీప ప్రాంతాల్లో కోవిడ్ కేసులున్నాయేమో తెలుసుకోవాలి.
యోగాను ఎవరికి వారు చేసేలా బోధించాలి.
పరీక్షల సమయంలో హాల్‌కు 10 మంది మాత్రమే ఉండేలా చూడాలి.
కోవిడ్ లక్షణాలు కనిపించే పిల్లలను ప్రత్యేక ఐసోలేషన్ గదులలో పరీక్ష రాయించాలి. వాటిని పరీక్షకు ముందు, తరువాత డిస్ ఇన్‌ఫెక్ట్ చేయించాలి.