ఇస్రో చరిత్రలోనే ‘బరువైన’ ప్రయోగం

ఇస్రో వాణిజ్య విభాగం యాంత్రిక్స్ కుదుర్చుకున్న ఒప్పందం ప్రకారం.. బ్రిటన్‌కు చెందిన ‘సర్రే శాటిలైట్ టెక్నాలజీ లిమిటెడ్(ఎస్‌ఎస్‌టీఎల్)’ రూపొందించిన ఐదు ఉపగ్రహాలను పీఎస్‌ఎల్‌వీ-సీ28 ద్వారా నెల్లూరు జిల్లా శ్రీహరికోట నుంచి ప్రయోగించనున్నట్లు ఇస్రో వెల్లడించింది. అంతరిక్ష వాణిజ్యంలో ఇస్రోకు కీలక మైలురాయి అయిన నేపథ్యంలో ఈ ప్రయోగం గురించి పలు విశేషాలు...

• బ్రిటన్ ఉపగ్రహాలివే.. డీఎంసీ3-1, డీఎంసీ3-2, డీఎంసీ3-3, సీబీఎన్‌టీ-1, డీ-ఆర్బిట్‌సెయిల్. వీటిలో డీఎంసీ3 ఉపగ్రహాలు ఒక్కోటి 447 కిలోలు, సీబీఎన్‌టీ-1 శాటిలైట్ 91 కిలోలు, డీ-ఆర్బిట్‌సెయిల్ 7 కిలోలు మొత్తం 1,440 కిలోల బరువుంటాయి.
• డీఎంసీ3 ఉపగ్రహాలను పీఎస్‌ఎల్‌వీ రాకెట్ 647 కి.మీ. ఎత్తులోని సూర్యానువర్తన కక్ష్యలోకి, ఒక్కో ఉపగ్రహానికి మధ్య 120 డిగ్రీల కోణంలో తేడా ఉండేలా ప్రవేశపెట్టనుంది.
• ప్రతిరోజూ భూమిపై ఏ లక్ష్యాన్ని నిర్దేశించినా, ఇవి ఫొటోలు తీయగలవు. ప్రధానంగా వనరులను సర్వే చేయడం, పర్యావరణ అధ్యయనం, ప్రకృతి విపత్తుల పర్యవేక్షణ వంటి వాటికి ఇవి ఉపయోగపడనున్నాయి.
• ఒక్కోటి 3 మీటర్ల పొడవుండే మూడు ఉపగ్రహాలనూ ప్రస్తుత పేలోడ్‌లోనే ఉంచి ప్రయోగించడమనేది ఇస్రోకు సవాలు కానుంది. ఇందుకోసం వృత్తాకార లాంచర్ అడాప్టర్‌ను, త్రికోణాకారంలోని మల్టిపుల్ శాటిలైట్ అడాప్టర్-వెర్షన్ 2(ఎంఎస్‌ఏ-వీ2) వేదికనూ ఇస్రో ప్రత్యేకంగా తయారు చేసింది.
• ఇక సీబీఎన్‌టీ-1, డీ-ఆర్బిట్‌సెయిల్ ఉపగ్రహాలను సాంకేతికత ప్రదర్శన కోసమే బ్రిటన్ రూపొందించింది. సీబీఎన్‌టీ-1ని భూ పరిశీలన టెక్నాలజీని పరీక్షించుకోవడం కోసం పంపనుండగా.. పలుచని తెరచాప లాంటి సెయిల్ ఆధారంగా వస్తువులను క్రమంగా దిగువ కక్ష్యలోకి రప్పించే టెక్నాలజీని పరీక్షించుకోవడం కోసం డీ-ఆర్బిట్‌సెయిల్ నానో ఉపగ్రహాన్ని పంపనున్నారు.