సాధారణ ఇంజనీరింగ్ కాలేజీలకు ‘ఈడబ్ల్యూఎస్’ షాక్!

ఈడబ్ల్యూఎస్ కోటా కింద 10 శాతం సీట్ల పెరుగుదల సాధారణ కాలేజీలకు నష్టదాయకం కానుండగా, టాప్ కాలేజీలకు మేలు చేకూర్చనుంది. ప్రవేశాల్లో విద్యార్థుల్లో ఎక్కువ శాతం మంది టాప్ కాలేజీ లకే ప్రాధాన్యం ఇవ్వనున్నారు. దీంతో ఈడబ్ల్యూఎస్ కోటాలో టాప్ కాలేజీల్లో సీట్లు పూర్తిగా భర్తీ అయ్యే అవకాశం ఉండగా, సాధారణ కాలేజీల్లో ప్రవేశాల సంఖ్య తగ్గిపోయే ప్రమాదం నెలకొంది. సాధారణ కాలేజీల్లో సీట్లు పెరిగినా పెద్దగా ఉపయోగం ఉండదని ఉన్నత విద్యా మండలి వర్గాలు పేర్కొంటున్నాయి.

మొదలైన కౌన్సెలింగ్ కసరత్తు..
2020-21 విద్యా సంవత్సరంలో రాష్ట్రంలో ఈడబ్ల్యూఎస్ కోటా అమలుకు ఇప్పటికే ఉన్నత విద్యామండలి చర్యలు చేపట్టింది. ఈ మేరకు ప్రభుత్వానికి ప్రతిపాదనలు పంపించింది. దీనిపై త్వరలోనే ప్రభుత్వం నిర్ణయం వెలువడనుంది. ఈ నేపథ్యంలో యాజమాన్యాలు తమ అంచనాల్లో పడ్డాయి. తమ కాలేజీలకు ఉన్న డిమాండ్ ప్రకారం ఎంత మేలు చేకూరుతుంది.. ఎవరికి నష్టం చేకూరుతుందన్న లెక్కలు వేసుకుంటు న్నాయి. మరోవైపు యాజమాన్యాల వారీగా, కోర్సుల వారీగా 10 శాతం సీట్ల పెంపుతో ఎలా కౌన్సెలింగ్ నిర్వహించాలన్న కసరత్తును ప్రవేశాల క్యాంపు కార్యాలయం ప్రారంభించింది. ఇందుకు అవసరమైన ఆన్‌లైన్ ప్రోగ్రామింగ్ రూపకల్పనకు చర్యలు చేపట్టింది.

40 నుంచి 50 కాలేజీల్లోనే 100% ప్రవేశాలు..
రాష్ట్రంలో 205 ఇంజనీరింగ్ కాలేజీలుండగా, గతేడాది కన్వీనర్ కోటాలో 183 కాలేజీల్లోని 65,544 సీట్లలో ప్రవేశాలకు కౌన్సెలింగ్ ని ర్వహించారు. మరికొన్ని మైనారిటీ కాలేజీల్లో ఆయా యాజమాన్యాలే సొంత ప్రవేశాలను చేపట్టాయి. కన్వీనర్ కోటాలో చేపట్టిన ప్రవేశాల్లో కేవలం 44 కాలేజీల్లోనే సీట్లు 100 శాతం భర్తీ అయ్యాయి. అందులో 12 యూనివర్సిటీ ఇంజనీరింగ్ కాలేజీలుండగా, 32 ప్రైవేటు కాలేజీలున్నాయి. ఇక ఒక్క విద్యార్థి చేరని కాలేజీలు 3 ఉండగా, అన్ని బ్రాంచీల్లో కలిపి 10 లోపే ప్రవేశాలు వచ్చిన కాలేజీలు 90కి పైగా ఉన్నాయి. ఇటు 100 శాతం సీట్లు భర్తీ అయిన 44 కాలేజీలతోపాటు ఒక్కో కాలేజీలో 200 మందికి మించి విద్యార్థులు చేరిన మరికొన్ని కాలేజీల్లోనే 45 వేలకు పైగా సీట్లు ఉన్నాయి. ఈ నేపథ్యంలో ఆయా కాలేజీల్లోనే 10 శాతం ఈడబ్ల్యూఎస్ కోటాలో 4,500కు పైగా సీట్లు పెరుగనున్నాయి. దీంతో విద్యార్థులు కూడా ఆయా టాప్ కాలేజీల్లో పెరిగిన సీట్లలో చేరేందుకు ఆసక్తి చూపనున్నారు. 100లోపే ప్రవేశాలు వచ్చిన 90కి పైగా కాలేజీల్లో ఈడబ్ల్యూఎస్ కోటాలో 10 శాతం సీట్లు పెరిగినా పెద్దగా ప్రయోజనం ఉండే అవకాశం లేదు. పైగా టాప్ కాలేజీల్లో సీట్లు పెరగనున్న నేపథ్యంలో సాధారణ కాలేజీల్లో చే రాల్సిన విద్యార్థులు టాప్ కాలేజీలవైపే మొగ్గు చూపే అవకాశముంది. దీంతో సాధారణ కాలేజీలపై ఆ ప్రభావం తీవ్రంగా పడే అవకాశం ఉందని ఉన్నత విద్యా మండలి చై ర్మన్ తుమ్మల పాపిరెడ్డి పేర్కొన్నారు.

ఎంబీఏ, ఇతర వృత్తి విద్యా కోర్సుల్లోనూ..
రాష్ట్రంలో ఎంబీఏ, ఎంసీఏ, లా, బీఎడ్, ఇంజనీరింగ్ లేటరల్ ఎంట్రీ (ఈసెట్) వంటి ఇతర సాంకేతిక, వృత్తి విద్యా కోర్సుల్లోనూ ఇదే ప్రభావం ఉండనుంది. వాటిల్లోనూ టాప్ కాలేజీల్లో పెరిగే సీట్లలోనే విద్యార్థులు చేరేందుకు మొగ్గుచూపనున్నారు. ఇక ఎంబీఏను తీసుకుంటే గతేడాది 276 కాలేజీల్లో 22,434 సీట్లను భర్తీ చేశారు. అయితే అందులో 184 కాలేజీల్లోనే 100 శాతం సీట్లు భర్తీ అయ్యాయి. మరో 92 కాలేజీల్లో వంద శాతం సీట్లు భర్తీ కాలేదు. అందులో తక్కువ అడ్మిషన్లున్న కాలేజీలు 65కు పైగా ఉన్నాయి. ఈ నేపథ్యంలో తక్కువ అడ్మిషన్లు ఉన్న కాలేజీలకు సీట్లు పెరిగినా పెద్దగా ప్రయోజనం లేకపోగా, ఎక్కువ డిమాండ్ ఉన్న కాలేజీల్లో పెరిగే సీట్లలో చేరేందుకే సాధారణ కాలేజీల్లో చేరాల్సిన విద్యార్థులే వెళ్లే అవకాశముంది.